«ВЕЛЕНЬ КУЛЬТУРАСЬ РЕСПУБЛИКАСА ЭРЬГАВСТА МАЛАСЬКОФНЕВИ ОШЕННЕТИ!»

Мордовия Республикань культурань, национальнай политикань и архивнай тевонь министрть тевонзон тиендисна С.Н.Баулина:
—Кода содаф, Мордовиянь культурань и искусствань сфераса эрьгавста ётафневихть эряфс «Культура» национальнай проектсь и сонь видесонза арьсеф-тиф региональнай проекттне.Светлана Никитовна, тя кизонь тяфтама работать кодапт эсь лацонь ширенза?
—«Культура» национальнай проектсь и региональнай проекттне Мордовия Республикань культурань и искусствань сфераса ётафневихть эряфс 2018 кизоста сявомок. И тяфтама работась, кода и Россиянь лия региоттнень эса, миньцонк кармай вятевома 2024 кизоть самс.
Ся пингста, мзярда республикаса ушедсть ётафневома эряфс «Культура» национальнай проектсь и сонь видесонза арьсеф-тиф региональнай проекттне, Мордовиянь культурань и искусствань сфераса тейнек синь вельдест удалась тиемс лама цебярь тев. Республикань культурань и искусствань учреждениятнень эса ётафтовсть капитальнай ремонтт и реконструкцият, музыкальнай школатненди рамсевсть од инструментт, библиотекатненди—компьютерхт и лия эрявикс тяниень пингонь оборудования, очнай и онлайн форматса кепсевсь культурань работникнень квалификациясна.
Кда корхтамс тя кизонь тяфтама работать квалма, эряви азомс, тяддеть ушетксста сявомок «Культура» национальнай и региональнай проекттнень вельде сяда эрьгавста ушедсь кепсевома тяниень пингонь уровеньц велень культурась. Кепотьксонди, Зубово-Полянскяй райононь Велязем (Покровские Селищи) велеса аделсеви ни Культурань кафта этажень од кудть строямац, эрьгавста вятеви Торбеево посёлкань Культурань дворецть реконструкцияц, строяви Культурань од куд Краснослободскяй райононь Рузонь Маскино велеса, Сире Шайгавонь райононь Богдановка велеса капитальнайста петеви Культурань кудсь, аделсевихть капитальнай ремонтонь и реконструкциянь работатне Рузаевка ошень Ухтомскяень лемса Культурань центраса.
Тяддень сентябрьста Культурань тя центрась панчсыне эсь кенкшензон и кармай макссема Рузаевка ошень эряйхненди и инжихненди культурань лама ширдень услугат.
Культурань лама ширдень услугат республикань посёлкатнень, велетнень эряйснонды тяни тяфта жа кармайхть макссема тостонь Культурань дворецне и куттне. Федеральнай субсидиянь лангс пцтай сембе синь капитальнай ремонтта или реконструкцияда меле пяшкотьфт тяниень пингонь оборудованияса. Сяс, профессиональнай культурань и искусствань виияфтомда башка, посёлкань и велень культурань учреждениятне кармайхть тонафтома ломаттнень национальнай промыслатненди и ремеслатненди, кунардонь пингонь койхненди-обуцятненди, моротненди, национальнай панаронь-щамбялень стамати и цифровой технологиятнень мархта работати.
И кода ётай кизотнень—тядде минь тяфта жа вяттяма од кадрань анокламать коряс оцю работа. Сяс мес, койсон, республикань культурань и искусствань сферав, конань «Культура» национальнай и региональнай проекттнень эряфс ётафтомасна кеподезе-лихтезе од уровеньц, эрявихть од и тяниень пингонь профессиональнай вешфкснень коряс аноклаф кадрат. Сяс Мордовия Республикань культурань, национальнай политикань и архивнай тевонь министерствась тяддень 26 майста ладясь-кемокстась Соглашения Культурань Санкт-Петербургскяй государственнай институтть мархта.
Конешна, тяда инголивок тя институтса тонафнесть и тячивок тонафнихть республикань представительхть. Но тя кизоста сявомок институтсь кармай аноклама од кадрат именна Мордовиянь культурань и искусствань учреждениятненди. Тоса тяфта жа кармайхть ётнема стажировкат республикань культурань и искусствань, народнай творчествань специалисттне. И, тяда башка, Санкт-Петербургскяй институтсь кармай макссема лезкс Мордовия Республикань культурань и искусствань учреждениятненди синь аф фкя лацонь и аф фкя серень проектснон эряфс ётафтомста.
Культурань Санкт-Петербургскяй государственнай институтонь ректорть А.С.Тургаевонь мархта тяддень 26 майста Республикань Кудса тяфта жа васетькшнесь Мордовия Республикань Оцюнять аф лама пингс тевонзон тиендисна А.А.Здунов. Васедемаса, культурань сфераса марстонь тевонь вятемань кизефкста башка, корхтамась мольфтевсь Санкт-Петербургскяй IX Международнай культурнай форумть рамкаса тяддень 11-13 ноябрьста Мордовия Республикань Шитнень ётафтомаснон колга.
Тя международнай форумса тейнек ули кода сядонга кемокстамс культурань и искусствань, а тяфта жа национальнай политикань сфераса сембе ширдень соткснень Россиянь лия региоттнень мархта!
—Тячиень шити республикань сембе театрально-концертнай организациятне Саранскяйса аделазь-сёлгозь ни сезонцнон. Сась гастролень пингсь. Кирдемок мяльса пандемиять инкса ладяф ограничениятнень, Светлана Никитовна, коса кармайхть работама Мордовиянь театратне и концертнай организациятне?
—Июнь ковть ушетксста сявомок республикань театратне ётафнихть ни гастрольнай турхт Мордовиять эзга. Мон корхтан И.М.Яушевонь лемса Музыкальнай, Национальнай, Някань и Рузонь драматическяй театратнень колга.
Июльста и кемонце августти молемс театрань коллектифне кармайхть отпускса.
Сяльде театратне тага кярьмодихть эсь тевозост. Кармайхть ётафнема гастрольнай турхт республикава и Россиянь лия регионга, коса компактнайста эряйхть мокшет и эрзят. И, тяда башка, кармайхть путнема од спектакльхть. Тянди республикань бюджетста теест нолдафт ярмакт.
Гастролень ётафтомань и концертнай од  программань анокламань тяфтама жа форматса работайхть республикань концертнай организациятне.
Сяс, койсон, тяддень сёксеня театрань и концертнай залонь сценатнень лангса Мордовия Республикань эряйхне и минь инжиеньке няихть од спектакльхть и концертнай программат. И, тяда башка, «Соотечественники» Международнай фестивальса, кона тяддень октябрьста ётафтови Мордовиять столицаса, минь ванцаськ Белоруссия, Казахстан Республикатнень, Армениянь и лия странань театратнень и содаф спектакльснон.
—Светлана Никитовна, кодама работа вятеви республикаса тядде российскяй нациянь нароттнень этнокультурнай эсь лацонь ширеснон ванфтоманкса и синь марстоньшиснон кемокстаманкса?
—Ня цельхнень сатоманкса, кода и ётай кизотнень, июньцта нолдави тевс «Акша Келу», «Раскень озкс», «Сабантуй» национально-фольклорнай илатнень потенциалса.
Тя сферас тяфта жа сувафтсазь эсь позитивнай путксснон «Шумбрат», «Кургоня» Межрегиональнай национальнай культурань фестивальхне и «Вейсэ-Марса» республикань культурань марафонць, кона 4 июньцта панжевсь Мордовиять столицаса. Сон миньцонк кармай мольфтевома колма кофт. Пингстонза Саранскяйса культурань эсь лацонь ширеснон няфтьсазь республикань муниципальнай сембе райоттне, конатнень эса эряйхть российскяй нациянь 200 народонь представительхть.
Тяфта жа, койсон, сувафтсы тя сферати эсь няевикс путксонц «Волгась—ялгаксшинь ляй» Международнай ХХ этнокультурнай экспедициясь, кона ётафтови тяддень 19-26 июньцта.
—Светлана Никитовна, удалаза арьсефонте.
—Сюкпря!
В.НЕСТЕРОВ.