"СОН—МОКШЭРЗЯНЬ НАРОДТЬ ГОРДОСТЕЦ"!

Минь справканьке: 22 июньцта васьфтезе эсь 85 кизонь юбилеенц Н.П.Огарёвонь лемса Мордовскяй государственнай университетонь Россиянь историянь кафедрань заведующайсь, историческяй наукань  докторсь, профессорсь Николай Фёдорович Мокшин, конань научнай трудонза и лемоц содафт сембе мирса.

Мокшэрзянь содаф учёнайсь, этнографсь, историксь, краеведсь, поэтсь, писательсь, критиксь, педагоксь шачсь 1936 кизонь 22 июньцта Горьковскяй областень Лукояновскяй райононь Иванцево велеса учителень семьяса. Национальностьс коре—мордвин-эрзя.

1959 кизоня оцю сатфкс мархта аделазе МГУ-нь историко-филологическяй факультетть. Сон—историческяй наукань кандидат (1964), историческяй наукань доктор (1987), доцент (1967), профессор (1989),         РСФСР-нь культурань Заслуженнай работник (1990), 2013 кизоста сявомок и тя пингти самс Россиянь историянь кафедрань заведующай.

Сембе мирса содаф учёнайсь наукаса и общественнай эряфонь тевса оцю сатфксонкса казьф лама казнеса. Ётксост—МР-нь наукань Заслуженнай деятель лемсь (2001), Народонь Ялгаксшинь орденць (1996), «Няевикс сатфксонкса работаса» СССР-нь высшай и средняй образованиянь министерствань Сиянь знаксь,   МР-нь Славань III и II степенень ордеттне (2011-2016), государственнай и научнай лия оцю казнетне.

22 июньцта Н.Ф.Мокшинонь 85 кизонь юбилеенц лемс Мордовия Республикань национальнай драматическяй театраса ётафтфоль торжественнай пуромкс. Пингстонза Николай Фёдоровичень юбилеенц мархта поздравляндазь Мордовиянь государственнай, наукань, культурань, литературань и печатень деятельхне, Россиянь и омба масторонь содаф учёнайхне.

Сембе синь арьсесть теенза кеме шумбраши и научнай, творческяй од сатфкст.

Н.Ф.Мокшинонь 85 кизонь юбилеенц мархта торжественнай пуромксса васенцекс поздравляндазе Мордовия Республикань Оцюнять аф лама пингс тевонзон тиендиснон А.А.Здуновонь лемста МР-нь Государственнай Собраниянь Председательть заместителец И.М.Москаев. Илас сафнень инголе сон лувозе юбилярти А.А.Здуновонь Приветствиянц. Эсонза азф: «Кельгома Николай Фёдорович, примайть седи ваксстонь и лямбе поздравлениятнень юбилейцень мархта! Тонь лафтуфнень фтала эряфонь оцю школа и научно-педагогическяй тевонь тиемань-вятемань оцюдонга оцю опыт. Кода талантливай содаф учёнай и исследователь, тон кемотть киза ни служат наукати, азондомок-валдопнемок ломаттненди кизефкснень, конат сотфт этническяй историять, историографиять, Россиянь нароттнень тяниень пингонь историяснон мархта.

Лемдемок эсь эряфцень Россиянь гуманитарнай наукати и путомок-максомок сонь кемокстаманцты и виияманцты ламодонга лама вий, няфтемок научнай руководителень асуцень—тон арать Отечествати служамань афкуксонь кепотьксокс!»

Тяда меле Мордовия Республикань Оцюнять аф лама  пингс тевонзон тиендиснон А.А.Здуновонь лемста И.М.Москаев наукаса оцюдонга оцю сатфксонкса казезе Н.Ф.Мокшинонь «За самоотверженный труд» отличиянь знакса, а республикань Государственнай Собраниять лемста—Почётнай грамотаса, а тяфта жа казсь картина.

Эсь ширденза И.М.Москаев тяфта жа лямбоста поздравляндазе Н.Ф.Мокшинонь 85 кизонь юбилеенц мархта, арьсесь юбилярти кеме шумбраши, од сатфкст наукаса и поэзияса.

Саранскяй и Мордовскяй митрополитсь Зиновий, лямбоста поздравляндамок Н.Ф.Мокшинонь 85 кизонь юбилеенц мархта, тяфта жа макссь оцю питне учёнайть научнай и публицистическяй работанзонды, конатнень сон лемдезень Рузонь Православнай Церькавонь содаф деятельхненди. Синь ётксост—митрополитсь Вадковскяй, кона лама тись Серафим Саровскяень канонизациянцты, и Сембе Русень Патриархсь Никон.

Митрополитсь Зиновий тяфта жа азсь спасибамань валхт  Н.Ф.Мокшинонди Рузонь Православнай Церькавонь Мордовскяй митрополияти лезксонкса и казезе юбилярть цебярь тевонзон инкса Саранскяй епархиянь Святой праведнай воинонь Феодор Ушаковонь I степенень медальса и казсь теенза «Солнце правды» Шкай ликоня.

Мордовия Республикань Культурань, национальнай политикань и архивнай тевонь министерствать эзда Н.Ф.Мокшинонь 85 кизонь юбилеенц мархта седи ваксста поздравляндазе и казсь Приветственнай адрес министрть васенце заместителец А.Е.Губанищев.

Н.П.Огаревонь лемса Мордовскяй государственнай университетть президентоц, профессорсь Н.П.Макаркин, лямбе валса поздравляндамок Н.Ф.Мокшинонь юбилеенц мархта, макссь оцюдонга оцю питне сонь научнай путксонцты университетть позитивнай имидженцты. Кодгемонь кизоста, мзярс Николай Фёдорович работай университетса, сон няфтезе эсь прянц стама учёнайкс и ломанькс, конань инкса ули кода марямс афкуксонь гордость. Сонь научнай трудонзон  содасыне Россиянь и омба масторонь научнай мирсь, мезсь, конешна, сатневи аф любой учёнайти.

Н.П.Макаркин тяфта жа макссь оцю питне Николай Фёдоровичень стихонзонды, конатнень эзда ламотне эрзянь и рузонь кяльса арасть содаф морокс. Сяс ули кода азомс: Н.Ф.Мокшин—мокшэрзянь народть гордостец!

Сяльде учёнайть 85 кизонь юбилеенц мархта лямбоста поздравляндазь М.Е.Евсевьевонь лемса Мордовскяй педагогическяй университетонь ректорсь М.В.Антонова, Мордовскяй  (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин, республикань Правительствать видеса гуманитарнай наукань НИИ-ть директороц, профессорсь Г.А.Куршева, Мордовиянь ингольдень прокурорсь П.Е.Сенькин, «Мокшень правда» газетать главнай редактороц И.С.Лушкин и юбилярть лия ялганза, содафонза и творчестванц кельгиенза.

Торжественнай пуромксть аделавомста Н.Ф.Мокшин азсь спасибамань валхт илас сембе сафненди. А сонь стирец Ю.Н.Сушкова лувозень пуромфнень инголе стихонзон, конатнень сон лемдезень алянцты.

Торжественнай пуромкста меле илас сафненди няфтьфоль концерт, коса кайгсть моротне, конат сёрматфт Н.Ф.Мокшинонь стихонзон лангс.

В.ИОСИФов.