«Мокшэрзятнень лама вайгяльса морамань асушисна салай мяль сембе мирса»

Мордовия Республикаса Всероссийскяй хоровой обществань филиалть председателец, «МР-нь хоровой музыка» региональнай общественнай организациять руководителец, Российскяй Федерациянь Культурань Заслуженнай работниксь В.Н.Башкиров:
—Вячеслав Никифорович, кодама целень сатоманкса ётафтови 2021 кизонь Всероссийскяй хоровой фестивальсь?
—Всероссийскяй хоровой фестивальсь, конань аноклазе Российскяй Федерациянь Культурань министерствать лезксонц вельде Всероссийскяй хоровой обществась, тя кизоня лемтьф Александр Невскяень шачема шиста 800 кизонь топодемати. А ётафтови  сон «Культура» национальнай проектть эряфс ётафтоманц рамкаса и  2030 кизоти самс государственнай культурнай политикань Стратегиять вешфксонзон коряс.
Всероссийскяй хоровой  фестивальть инь оцю задачац-целец—ванфтомс и виияфнемс российскяй нациянь нароттнень ёньца и ваймоса военно-историческяй и культурнай наследиять, а тяфта жа кемокстамс российскяй нациянь нароттнень ёткса межкультурнай, межнациональнай, межрелигиознай соткснень и гражданскяй марстоньшить.
—Кода тядде ётась Всероссийскяй хоровой фестивальть региональнай этапоц Мордовия Республикаса?
—Коронавируснай пандемиять сюнеда ладяф ограничениятнень инкса тядде региональнай отборочнай турть  ётафтомста савсь сувафтомс кой-кодама полафткст. Кда, кепотьксонди, ётай кизотнень сон фалу ётафневсь Саранскяйса и муниципальнай районца очнай формаса, тядде савсть нолдамс тевс онлайн-форматсь и студиянь записне.
Тяда башка, лама прябала коронавируснай инфекциясь кандсь республикань народнай и профессиональнай коллектифненди, конатнень участниксна сярятькстсть тя урмаса. Сяс коллектифне лоткафнезь репетицияснон, учсемок, мзярда пчкяйхть синь ведущай солистсна.
Но, аф ваномок сембе азф прябалатнень лангс, тейнек удалась Всероссийскяй хоровой фестивальть региональнай отборочнай этапонц миньцонк ётафтомс сатомшка цебярьста. Республикань профессиональнай и народнай сембе хоровой коллектифне онлайн или студийнай записень форматса няфтезь  жюрити эсь произведенияснон, конатнень мархта синь ёрасть няфтемс Мордовиянь хоровой искусствать мазышинц Фестивальть окружной уровеньца.
Окружной отборочнай турсь тяфта жа онлайн и студийнай записень форматса тяддень июль-октябрь ковста ётай Нижняй Новгородса. Пингстонза эсь ётковаст кармайхть пялькстома Приволжскяй федеральнай округонь хорхне, конат арасть сяськикс эсь регионцост. Жюрити ёткстост сави кочкамс кафта хорхт, конат няфтьсазь Приволжскяй федеральнай округонь хоровой искусствать серенц Всероссийскяй хоровой фестивальть финалса, кона тяддень декабрьста арьсекшневи ётафтомс Россиять культурнай столицаса—Санкт-Петербургса.
Мордовия Республикань хоровой искусствать серенц Фестивальть окружной  этапса профессиональнай хорхнень ёткса няфтьсы И.М.Яушевонь лемса Оперань и балетонь театрань хорсь. А идень хорхнень мархта культурнай тя Форумса кармай пялькстома Республиканскяй музыкальнай школань-интернатонь хорсь.
Надиян: конацка ня кафта коллектифнень эзда ётай Всероссийскяй хоровой фестивальть финалс!
—Кирдемок мяльса няйфть-кульфть Фестивалень региональнай этапть ётафтомста, Вячеслав Никифорович, кодама питне тон максолеть Мордовиянь хоровой сферать  серенцты?
—Аф ваномок прябалатнень лангс, конатнень тейнек сембонди кандозень коронавируснай пандемиясь, республикань профессиональнай, народнай, студенческяй и идень хорхне маштозь и, койсон, пяк няевиста няфтезь мокшэрзянь академическяй и народнай хоровой искусствать сембе ширдень мазышинц.
Мордовиянь И.М.Яушевонь лемса  Оперань и балетонь театрань хорсь, «Келу», «Умарина» ансамбльхне, а тяфта жа Н.П.Огарёвонь лемса и М.Е.Евсевьевонь лемса гос-университетонь хорхне, Саранск ошень и республикань муниципальнай райононь народнай и музыкальнай школань идень хоровой коллектифне морайхть стама уровеньца, конань инкса мон марян афкуксонь гордость.
Сяс тейне тячи ули кода азомс: кода морайхть мокшэрзятне—мирса лацост кивок аф морай!
—Тя серть-уровенть  ванфтоманкса и, пади, нинге сяда вяри кеподеманкса, койсот, мезе эряви тиемс тядде республикань культурань сфераса?
—Койсон, сась пинге республикаса тиемс-панжемс идень симфоническяй капелла, коса ванфневольхть и виияфневольхть мокшэрзянь кунардонь пингонь моронь морамань койхне. Тиемс тяфта, кода тисть Татарстан, Башкирия, Чувашия Республикатнень, Пензенскяй, Ульяновскяй областтнень и Россиянь лия региоттнень эса.
Тяфта жа пара улель панжемс Саранскяйса национальнай моронь концертнай зал, коса республикань эряйхненди и инжихненди мокшэрзянь морамань академическяй искусствать няфнелезь сембе мирса содаф «Келу», «Умарина» ансамбльхне, республикань государственнай камернай и народнай хорхне.
Тяфта минь пачфтьсаськ мокшэрзянь моронь морамань уникальнай культурать сай пингонь поколениятненди!
—Удалаза арьсефонте, Вячеслав Никифорович.
—Сюкпря!
В.иосифов.