Мзярда семьяса азорондай кельгомась

Кемголмува киза газетаса работамста удалась содафтомс аф кржа лама идень семья мархта. Сембе синь эсь лацоннет, но фкясь приметаф—эрть эса азорондай кельгомась, фкя-фкянь ужяльдемась. Шабатне оцю семьяса мзярдовок аф касондыхть анелькакс, меколанкт, синь ёмластокиге маштсазь-содасазь эрь тевть, а эсь ётковаст иттне улендихть цебярь ялгакс. Ули кода азомс тянь и Саранскяйста Макарофнень семьяснон колга, коса касфтовихть ниле итть.

…Лама идень тядясь Елена Николаевна сонць кассь оцю семьяса, вете шабатнень ёткста—васенцесь. Емланятненди Ленась ульсь тядя лаца—и аннекшнезень, и щашендозень- карязень, и налхксель мархтост. Вестевок ашезь сашендов сонь вихцода кошярямс, семботь тиендезе пара мяльса. А кда ни кивок тяряфтоль обжамс дуганнянзон-сазорнянзон, эста кирдеда. Нинге ся пингста Ленась содазе—касы и сонценьге кудоц кармай пяшксе идень весяла вайгяльда. Тяфта и лиссь.
Мирденц мархта Елена Николаевна тонафнесь фкя школаса, а эрясть шабрань кудса. Васетькшнема ушедсть нинге кемонце класса, а сяльде поступасть фкя вузу. Сергей Иванович хуш лама шабань колга ашезь арьсекшне, но мяленза тяфтамотольхть: мзяра идня максы Шкабавазсь, сембе теенза улихть фкя лаца кельговикст.
Верась, Маринась, Кириллсь и Ильясь—тя Макарофнень инь оцю козяшисна, синь гордостьсна. Лангс ванозь, шабатне шарфтыхть фкя-фкянь лангс. Но полатнень валснон коряс, тя аньцек лангс ванозь, афкукс сембе синь эсь лацоннет.
Верась тячи «лийкстась» ни тядянь-алянь пизоняста, сонцень эряфоц. Но стирти пяк питни семьяц. Сон сидеста сашенды инжикс тядянзонды-алянзонды, лажаткшни сазорнянцты-дуганнянзонды. Елена Николаевнань и Сергей Ивановичень седисна аф пичеди оцю стирьснон инкса, сонь сембось лац. Тяни мирттнень-рьвятнень васенце заботасна—ёмла шабатне.
Маринати 14 киза. Сонь пяк мазы вайгялец, кельгсы мораманц. Стирнясь сидеста примси участия аф аньцек школаса ётафневи пуромкснень-илатнень эса, но и республиканскяй лама фестивальса, няфнесыне вокалть коряс маштомошинзон эрь кодама конкурсса и лисенди сяськихнень лувксс. Макарофнень кудсост башка вастса ащихть Маринать дипломонза, грамотанза.
Кирилл и Илья шарфнихть мяль спортти, пара мяльса налхксихть футболса, шахматса, тялонда стяшендыхть конька и сокс лангс. Кирилл тяда башка кельгсы гитараса мораманц, якай музыкальнай школав.
Макарофнень семьяса сембе иттнень синцень тевсна, эрсь вийс коре лезни  тядяти и аляти—куд урядайхть, кядьгонят штайхть, ярхцамска пидихть-панихть, кда эряви. Ваймама шиста семьянь келеса кельгсазь природав лисендемаснон, марса вирьге якамаснон-шяямаснон, тялонда катоку якамаснон, кизонда—велосипедса арнемаснон.
—Старандатама кода можна сяда лама пинге ётафнемс шабаньконь мархта, улемс теест аф аньцек тядякс-алякс, но и цебярь ялгакс, конатненди можна панжемс потмоцень, кизефтемс совет,—мярьгсь Елена Николаевна.
Азома и сявок, што Макарофне Шкаенди верондай ломатть, недляшиста сембе марса улендихть службаса церькавса.
Кода виденцясть мирттне-рьвятне, касфтомс шабатнень аф тёждя, васендакиге мяльса кирдеви материальнай ширесь.
—Пара, мес республикасонк властьса ащихне  аф юкснихть лама идень семьятнень колга, лезнихть тейнек,—мярьгсь Сергей Иванович.
Вейхкса кизода тяда инголе семьясь получась ипотекас коре квартира. Тяда башка, колмоце идть шачемда меле теест максфоль модань участка аф ичкозе ошть эзда, коса синь ушедсть ни кудонь строяма.
Кода мярьгсть корхнемста мирттне-рьвятне Макарофне, оцю семьяса эрямась сяда весяла. И катк, кле, минь аш оцю козяшиньке, сянкса ули инь эрявикссь—кельгомась.

О.ЕВДОКИМОВА.