Артём Здунов панчсь од школа Лямбирскяй райононь АксЁнова велеса

1 сентябрьста, Содамошинь шиста, Лямбирскяй райононь Аксенова велеса панжевсь од школа. Праздничнай мероприятияса примасть участия МР-нь Оцюнять аф лама пингс тевонзон тиендисна Артём Здунов, велень од ломанень Российскяй союзть председателец Юлия Оглоблина, исполнительнай властень и местнай самоуправлениянь органонь представительхне.
Од школась арась цебярь казнекс татаронь велень эряйхненди, сон отвечай од поколениянь федеральнай государственнай образовательнай стандартонь сембе вешфксненди. Нят тяниень пингонь учебнай кабинетт, конат пяшкотьфт сембе эрявиксса, начальнай и старшай школатненди спортивнай комплекст, библиотека, столовай, медицинскяй блок, актовай зал, цёранятненди мастерскойхть, стирнятненди кулинариянь кабинетт, мобильнай лингафоннай кабинет, 100 компьютер, робототехническяй оборудования—сембось афи азондови.
Школаса тиф шумбрашинь ванфты образовательнай среда. Улихть логопедонь и психологонь цебярьста оборудовандаф кабинетт, удоманди комнатат, медицинскяй кабинет.
МР-нь Оцюнять аф лама пингс тевонзон тиендисна поздравляндазень иттнень, тядятнень-алятнень и педагокнень тонафнемань од кизоть ушедоманц мархта, арьсесь сембонди шумбраши и сатфкст.
Школань директорсь Максим Каштанов, пшкядемок школьникнень тядяснонды-аляснонды, мярьгсь, што педагогическяй коллективсь анок сянди, штоба максомс иттненди оцю содамошит.
И вов сон—васенцеда цингоргодсь пайгонясь, кода фалу, сембонь таколфтысь—школьникнень, тядятнень и алятнень, конат кучезь шабаснон содамошинь кити, учительхнень, конат анокт од урокненди. Васенце классонь тонафнихнень класс сувсесь и МР-нь Оцюнять аф лама пингс тевонзон тиендисна Артём Здунов, сон азондозе, што васенце класса мялецоль улемс космонавтокс, арьсесь иттненди цебярь оценкат и пара ялгат.
Республикань руководительти няфтезь марнек школать: сембе кабинеттнень, мастерскойхнень, столовайть, спортивнай и актовай залхнень, а стане жа серьгядезь примамс участия марса педагокнень и иттнень мархта васенце школьнай аллеять озафтомаса. Артём Алексеевич примазе серьгядемать и 11 класса тонафнихнень мархта школать ваксса озафтсь од паргана туя шуфтоня.