ШКОЛАСЬ—ОМБОЦЕ КУДОЦ

Т.В.Паркина пцтай нильгемонь киза эряй-ащи Атюрьевскяй райононь Перевесье велеса. Тяса сонь кудоц, работама вастоц, кельгома мирдец. Шачсть и кассть кафта иденза.

—Юрхне вдь тонь аф тястоннет?—кизефнеса Татьяна Владимировнань.

—Шачень и касонь Атерьса, трудонь кельги оцю семьяса.

—А кода повоть Перевесьяв?

—Аделайне Атерь велень 2№ средняй общеобразовательнай школать. Эста классонь лядондсть школань выпускникне вели. Миньге сисемнек арьсеме лядомс шачема уженязонк. Саме Перевесьянь колхозу. Касфтоме жуватат.

Тяфта ни лиссь эряфса, вете цёратне аф лама пингонь ётазь кадозь колхозть. Татьяна Кулягина и Зинаида Кабаева лиссть тя вели рьвакс, нолдасть юрхт. Зинаида Павловна работай велень администрацияса, шнама мокшава. Татьяна Владимировнавок Перевесьять гордостец и прянь шнафтома вастоц. Кельгома рьвя, тядя, баба-щава, рьвяня. Вов ни 25 лама киза работай Перевесье велень средняй общеобразовательнай школаса, вяти мокшень, рузонь кялень и литературань урокт, отвечай библиотекань тефнень инкса.

Кода ни азфоль, Татьяна Владимировна шачсь и кассь Атерь велеса, трудонь кельги оцю семьяса. Тядяц, Мария Никифоровна, покодсь строительнай организацияса. Аляц, Владимир Филиппович, кулось пяк рана. Татьянати эста ашель кизонявок. Касфтозе тядяц ськамонза. Соньдедонза башка мокшавать нинге ниле идьтонзольхть. Сембе синь шнама ломатть. Зинаида Владимировна—педагогическяй трудонь ветеран, эряй Сире Теризморга велеса. Иван Владимирович и Виктор Владимирович эрясть Атерьса. Тяни синь ашет шиса. Марина Владимировна—Москуса.

Татьяна Владимировна аф кальдявста тонафнесь школаса. Класснай руководителец, А.С.Панфилова, лама тись сянкса, штоба ученицац кочкалезе учителень тевть. Тяфта и лиссь. Татьяна Владимировна поступась тонафнема М.Е.Евсевьевонь лемса МГПИ-нь филологическяй факультетонь рузонь отделенияв. Тонафнесь аф кальдявста. Вузть аделамда меле мувсь васта Перевесьянь идень садса. Аф лама пинге воспитателель. Кельгозь иттне, родительхне. А меле сявозь работама школав учителькс. И вов ни 25 киза Татьяна Владимировна тонафты шабатненди рузонь кяль и литература. Школаса сон шнама ломань. Лама киза мокшавась трудендась Н.И.Черакшевонь руководстванц ала. Да и школань тяниень директорсь Е.С.Пугаев аф мушенды валхт шнамс учительницать. Пяк ответственнай, дисциплинань кельги, лац тиендьсы эсь тевонц. Татьяна Владимировна учителень, библиотекарень тевда башка отвечай школань переса тефнень инкса. Урожайсь тядде аф кодама, но тевда переса ламоль. Ульсть шувондомат, перень сёронь путомат-валондомат, сор тишень урядамат. А меле касфтф урожайть кочказь, маразь эсь вастозонза.

Т.В.Паркинать семьянц колга Перевесьянь эряйхне корхнихть аньцек шнамань валса. Мирдец, Василий Егорович, передовой механизатор «Перевесье» ограниченнай ответственность мархта обществаса. А трудендама ушедсь нинге школаса тонафнемста. Ульсь комбайнёрти лездыкс. Служась армияса. Армияда меле покодсь колхозса. Тяддевок заняфоль сёронь урядамаса. И тевонза молихть аф кальдявста.

Марсот Паркиттне пцтай 35 киза. Касфтсть кафта итть. Наталья аделазень Зубово-Полянскяй педагогическяй колледжть, М.Е.Евсевьевонь лемса МГПИ-нь начальнай классонь факультетть. Тяни эряй Пензенскяй областьса, работай идень садса. Владимир трудендай Москуса. Касыхть Паркиттнень колма уноксна, конатнень синь пяк кельгсазь.

Татьяна Владимировна и Василий Егорович кирдихть оцю хозяйства. Передост башка улихть тракссна, тувосна, куднармоньцна. Аньцек кенерькшнек. Кода азозе мокшавась, эрямс велеса и аф кирдемс жуватат, визькс эсь эздот. А тя и сиволь, и лофца, и вай. Саты эстеест. Лездыхть идьснонды. А ляды продукцияснон мишендьсазь.

Эрь шобдаваня Т.В.Паркина эряскоды школав. Тяса сонь учсазь учитель ялганза, учениконза. Тяса сонь кельгома тевоц. Уроконзон ётафнесыне мялень салайста. А библиотекасонза фалу порядка. Эрь мезне ётафни илат, выставкат. А сонцень Татьяна Владимировнань пичефтьсы аньцек фкясь, штоба школась эряль ламоняс, афолезь сёлга. А тянь квалма корхнемат улихть.

И.ВЕШКИН.