Мордовия Республикань культурань, национальнай политикань и архивнай тевонь министрсь С.Н.БАУЛИНА: «НАЦИОНАЛЬНАЙ ШИРЕТЬ ВАНФТОМАНЦТЫ-ВИИЯФТОМАНЦТЫ МИНЬ РАБОТАСОНК

Мордовия Республикань Оцюнять А.А.Здуновонь Указса 13 октябрьста республикань культурань, национальнай политикань и архивнай тевонь министронь должностень вастти путф С.Н.Баулина.

Тячиень номерса сон азонды лувиеньконди, кода кармай сяда тов касфневома-виияфневома Мордовиянь лама национальностень культурась, кода кармайхть кемоксневома межкультурнай и межнациональнай сотксне региональнай, межрегиональнай и федеральнай уровеньца, а тяфта жа—кода Мордовияса ётафневихть эряфс «Культура» национальнай проектсь и сонь видесонза арьсеф-тиф республикань «Культурань среда», «Творческяй ломатть» и «Цифровой культура» региональнай проекттне.

—Мордовия Республикань культурась тячи сембе вийса аноклай Санкт-Петербургонь IX Международнай культурань форумти, кона ётафтови тяддень 11-13 ноябрьста Россиять культурнай столицасонза, и конань рамкаса 11-12 ноябрьста ётафтовихть Мордовия Республикань культурань шитне.

Кода содаф, Санкт-Петербургонь культурань Международнай форумсь, конань аноклазь Российскяй Федерациянь Правительствась, Культурань министерствась и Санкт-Петербургонь Правительствась,—тя странаньконь культурань эряфсонза инь няевикс событиясь. Тяддень форумть дискуссионнай и лия площадканзон лангса кармай покодема 45000 лама участник, конат сайхть омба масторста и Россиянь эрь регионцта. Синь пачфтьсазь фкя-фкянди культурань инь няевикс проекттнень, конат ётафтовсть эряфс тядде, а тяфта жа культурань учреждениянь цифровизациянь опытть, кона кочкаф пандемиять пингста.

Тяда башка, Международнай форумть ушедомда инголе, 10 ноябрьста, Санкт-Петербургса ётафтови Российскяй Федерациянь Культурань министерствать Координационнай советонц заседанияц. Пингстонза странань 85 субъектонь культурань министрхне тяфта жа ванцазь С.Д.Эрьзянь скульптурань выставканц и максыхть минь мокшэрзянь национальнай достоянияньконди питне.

Международнай форумть рамкаса, конань работац кармай мольфтевома 30 площадка лангса, Мордовия Республикань культурась няфтеви 3 площадкатнень лангса. Форумонь участникне ванцазь С.Д.Эрьзянь скульптурань выставканц, няйсазь Г.И.Сураевонь-Королёвонь лемса «Келу» и «Мерема» фольклорнай ансамбльхнень мокшэрзянь национальнай программаснон, «Степан Эрьзя» художественнай кинофильмать трейлеронц, «Ётафть эзда сай пингти» картинань, национальнай щамбялень, ремеслань и промыслань выставкать.

Сембе мероприятияньке ётафтовихть Россиянь этнографическяй музейса, Санкт-Петербургонь культурань институтса и А.Л.Штиглицонь лемса Художественно-промышленнай академияса.

Международнай форумть рамкаса республикань делегациясь тяфта жа путы панчфт Мемориальнай стелати, кона стяфтф-путф «Невский пятачок» плацдармса Мордовиянь уроженецнень лемс, конат шавовсть Ленинградть          фашисттнень эзда араламста.

—Светлана Никитовна,  «Культура» национальнай и сонь видесонза арьсеф-тиф региональнай проекттнень эряфс ётафтомаснон вельде республикань лама национальностень культурать тя пингс удалась няевиста касфтомс. Кода кармайхть вятевома тефне тя сфераса сяда тов?

—Конешна, мекольдень колма кизоста, мзярс мольфтеви работась тя сфераса, тиф аф кржа кода ошень, стане и велень культураса. Сембе ня тефне цебярьста няевихть.

Тяфта жа эряви азомс, сембе ня проекттнень эряфс ётафтомста минь сяда лама вий ушедоме макссема велень культурать касфтоманцты. Цельсь фкя—кеподемс велень культурать ошень культурать серьс.

Лиякс мярьгомс, семботь, мезть няендьсы ошень зрительсь—од спектакльхнень, концерттнень, выставкатнень, тяфта жа эряви няендемс велень зрительтивок. И тячи тянь мархта пцтай кодамовок прябалат аш ни. Велень эряйти аньцек эряви самс эсь велень тяниень пингонь Культурань куду и цифровой технологиятнень      ресурсснон вельде ваномс культурань любой мероприятиять ся пингста, мзярда сон ётафтови.

И велень культурать касфтоманц коряс работась эрьгавста кармай мольфтевома сяда тов!

—Кода кармай латцевома-вятевома работась республикань национальнай политикань сфераса?

—Межнациональнай и межкультурнай соткснень кемокстаманкса республикань лама национальностень народть ёткса келиста кармай нолявома тевс Мордовиянь национально-культурнай объединениятнень потенциалсна.

Тяниень пингти синь республикань культурань учреждениятнень мархта марстонь вийса тисть лама цебярь тев, конат Мордовия Республикаса няевиста кемокстазь народть ёткса межнациональнай и межкультурнай соткснень. И мезсь нинге пара—национально-культурнай объединениятне тиендьсазь эсь тевснон грантонь ярмакнень лангс.

Кепотьксонди, ётай кизоня республикань национально-культурнай объединениятне грантонь вельде сатсть 39 миллион цалковай. И ня ярмакнень лангс ётафтовсь лама межрегиональнай и региональнай мероприятия, конат няевиста цебярьгофтозь тефнень республикань национальнай политикань сфераса.

Тядде республикань национально-культурнай объединениятне грантонь сатоманди анокласть 69 проект. И сатсть ни 22 миллионда лама цалковай, конатнень лангс ётафтовсть ни и нинге кармайхть ётафтфт мероприятият республикань национальнай политикань сфераса.

Тяфтама форматса кармайхть вятевома сембе тефне республикань национальнай политикань сфераса сяда тов.

—Светлана Никитовна, удалаза арьсефонте.

—Сюкпря!

В.НЕСТЕРОВ.