Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Тема дня

СИНЬ КАНДСТЬ ЭРЬ КУДТИ КЕНЯРДЕМА

 «Садко» группась «Россия 1» «Привет, Андрей!» ток-шоуса

 

 

Андрей Малаховонь передачанза аф фалу тушендыхть сембонь мяльс. Мялень мольфти сюжеттне, коса няфневи содаф артисттнень рьвяямань-явомань эряфснон колга, ламоц ванондыхнень кунара ни аердафтозь. Но мезе эфирса няфтевсь ётай ёткшить, 23 октябрьста, тя, улема, пуроптозень экранть ваксс сембонь, кие тя ёткть ульсь кудса!

 

Андрей Малахов студияв кочкась стама асу ломатть, конатненди народнай морось лезды эряфса, эрь шинь тевса, сире пингонь лятфнемаса. Главнай геройхне—«Садко» группань участникне: мокшень цёрась Александр Бардин, Александр Лихацкий и Владимир Макаров. Кода азозе передачать вятиец Андрей Малахов, кле, тячи студияса колма богатырьхть, народнай моронь вельмофтыхть. Тияк азсаськ, сембе ня колмоцьке участникне шачсть и кассть велеса, тоса теест сась народнай музыкати кельгомась, тоса кельговсь гармониясь. Тя передачась колма асу од ломанень судьбань колга, кода синь эсь вийснон, талантснон вельде куцсть сценав, пачкодсть российскяй телевиденияв. Мзярда Малахов макссь вал Александр Бардинонди, сон аф виздесь, весяласта азозе: «Мон  Мордовияста, мордвин-мокшан! Идькс пингозе ётась  Сарга велеса, васттне тоса пяк мазыхть, най, мзярда ули пингозе, семьязень мархта арнян тоза».

 

—Минь ули сюжетоньке тя велеста, эрьда марса ванцаськ,—поладозень Александронь валонзон передачань вятись.

 

И тя вастста сявомок, сельмоведьфтома передачась сяда тов ваномс ашель кода. Васенцесь, мезсь таколфтсь седи, съёмкатне эсь мокшэрзянь крайстонк, васттне ламонцненди содафт, мазыхть, серьгядихть вели. Саргась—тя российскяй фкя веленя, коза лядсть эряма аньцек сире ломатть, коса ламось тусь ни историяв. Но кеняртьфти ся, мзярда шири туфне мртцихть эсь шачема кудозост, перьфпяльсь бта меки живолготкшни, кеняртькшни и васьфни инжихть.

 

—Ётада, ётада пара ломатть, ваность коса Саша цёразе ётафтозе идькс пингонц, коса яксесь вири пангс, ляи эшеляма,—азонды вели саф творческяй группати, сюжетонь аноклайхненди Александр Бардинонь тядяц Людмила Федоровна.—Саша идькс пингстокиге кельгозе музыкать, морсесь рузонь, мокшень морот, кядьсонза най ульсь гармонияц. Улендсь стане, озатама илять мархтонза скомняня лангс и морсетяма тяшттнень лисемс. Перьфканк кочксевсь лама велеряй, марса пингське ётнесь аф няевиста.

 

Ня валхнень азомда меле мокшавась Людмила Бардина корхтаманц поладозе мороса, конань марса морсезь цёранц мархта.   Спецэффект вельде тядянц моронц фатнезе Александр и—меки тядяц. Тя эрявсь няемс, седисот эвондакшнесь гордость тя семьять инкса.

 

Аф лама пингонь ётазь сюжетсь нинге сядонга эреклась, мзярда экранца эвондасть Александр Бардинонь свадьбаста кадратне. Тяса ни сембось арась прокс малакс и роднойкс. Кштисть-морасть Сарга велень эряйхне, нюрьхкяняста азондовсь коеньконь-обуцяньконь колга, мзяра ломань кочксевсь гульбас.

 

—А мзяра шис тарксевсь свадьбась?—кизефтезе Малахов Александр Бардинонь.

 

—Мзярс изь аделсев эсь паньфкясь,—весяласта отвечась Александр.—Тяфтамот мокшетнень койсна-обуцясна. Ламоц козятне, няк, свадьбат налхкихть эрь кодама омба масторонь островса, а тейнек рьвязень мархта сяда мала седис шачема ширеса, коса мархтонк сембе радня ломаненьке, ялганьке.

 

Сембе корхнематне студияса поладовсть мороса, кштимаса. Александр Бардинонь судьбац пяк мала «Садко» группать лия участниконзон мархта. Александр  Лихацкий и Владимир Макаров тяфта жа шачсть и кассть велеса, простой крестьянскяй семьяса, коса пяк кельгозь моротнень, сиде моронятнень.

 

Фкясь—Алтайста, омбоцесь—Владимирскяй областьста. Васедсть цёратне Москуса, Гнеситтнень лемса училищаса тонафнема пингть. Тоса и кочказь «Садко» группать и тяни марса кеняртьфнихть лама тёжятть ломанень седи. Удалаза кинте, «Садко» группась, морседа ваймонь эжди морот, кеподесть и шнасть эсь шачема ширентень, марнек Россиять!

 

Н.Лобанов.

 


28.10.2021 №42
 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин