COVID-ть КАРШЕС ТЮРЕМАСЬ СТЯШЕНДЫ ПИТНИСТА

2019 кизоня 31 декабрьста марнек мирть-масторть шарозе васенце информациясь сянь колга, што Китаень Ухань ошса аф кржа ломань сярятькстсь пневмонияса. Ламотне эздост повсть больницяв фкакс ащи симптопнень мархта. Синь оцюволь температурасна, козсть, ваймосна стакаста тарксевсь. Тя  сембось бта шарфтсь тонатф пневмониять лангс, аньцек урмась няфнезе прянц сяда оржаста. Теенза эвондафтыкс арась инголи аф содаф коронавируссь, конанди меле максфоль COVID-19 лем.

Тяни моли 2021 кизось.  И мезе стамсь коронавируссь эрсь эздонк содасы аф аньцек Китайста пцтай кафта кизода инголе саф кулятнень вельде. Ули кода азомс, што COVID-19-сь фатязе марнек мирть, тяконь лувксса и оцю Россиять. Ламоц вастова панчсефт ковиднай госпитальхть, конатнень лувкссна, ужяленди, сашендови касфнемс. Аф кржа ломань коронавирусть эзда пря пчкафни кудса. Ковиднай госпитальхнень реанимациясна пяшксет стакаста сярядида, кой-кит эздост ваймоснон тарксесазь ИВЛ-нь аппараттнень вельде… Врачненди, аф ваномок оцю ответственностень марязь, маштозь, тевонь содазь работамаснон лангс (тяфта ковиднай госпитальхнень эса ащи тевсь мекольце пцтай кафта кизотнень), удалси араламс аф сембе сярядихнень эряфснон. Эрь шиня интернетста, телевиденияста таколдозь и ризназь кулендьсаськ мирса-масторса, Россияса, Мордовияса коронавирусть мархта сотф ситуациять колга эсь лацонь «сводкатнень». Да, тя тяфта. Пачфневи сембось кода сводкаса: мекольце сутканя тняра-тняра ломань сярятькстсь, тняра—пчкясь, тняра—тусь эряфста… Седи ацергофты ся, што COVID-19-ть эзда кулсихть кода эряфкшу, стане и средняй и одонь кизоса ломаттне. Улендсть случайхть, мзярда «якстерь зонань» реанимацияв повондсть итть.

Кирдемок мяльса эпидемическяй ситуациять кальдявгодоманц, COVID-19-ть мархта тюреманди здравоохранениянь российскяй системать карьхценза ламода кассть. Россиянь финансонь министрсь А.Силуанов азозе, што кода фалунь обстановкать пингста миньцонк ковидти ётафневсь 2 миллиард  цалковайть малава шити, тяни, ситуациять сяда стакакс араманц мяльса кирдезь, мзярда урмась сядовок келемсь—3,6 миллиард цалковай шити. Финансовай ведомствась азсь мяль кирдемс ОМС-нь системать ширенц 50 миллиард цалковайс.

COVID-19-са сярядихнень лувксснон касоманц мяльс сявозь, 2021 кизонь январьста-сентябрьста Мордовиясь эпидемиять мархта тюреманкса 1 сярядить лангс средняйста ётафнесь 84,4 тёжянь цалковай, мезсь ламода ётнесыне 2020 кизонь мартонь-декабрень карьхцнень, конат  ульсть 71,1 тёжянь цалковай ломанти.

Арьседа тинць. 2021 кизоня урмать тёждяста молемстонза 1 ломанти средняйста тушенды 38,2 тёжянь цалковай, кда урмась ётни аф пяк стакаста—73,8 тёжянь цалковай, стакаста—149,9 тёжянь цалковай, пяк стакаста—181,5 тёжянь цалковай, и  меле пчксеманди—42,2 тёжянь цалковай фкя сярядить лангс.

Улендихть случайхть, мзярда ломанть ковиднай госпитали пачфтеманц инкса тевс нолявихть санитарнай вертолёттне. Тявок веши аф кржа карьхць. Лиемань фкя частть питнец тячиень шити ётнесы 194 тёжянь цалковайть. Пандемиять ушедомста сявомок Мордовиянь авиационнай медикне лиендсть пцтай 300 част.

Нинге и нинге весть лятфтама врачнень и медицинскяй лия работникнень колга, конат вов ни пцтай 2 кизот работайхть шинек-венек, 24 част суткати.

Бюджетста ётафневихть оцю карьхцьт. Кода тянди путомс пе? Вдь сяда тов тяфта аш кода. Конешна, мяльс сявондемат и пяшкотькшнемат COVID-19-ть каршес ноляви сембе мератне. А инь главнай лисема вастсь—коронавируснай инфекциять каршес вакцинациясь.

Материалть аноклазе Т.Владимирова.