Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Демография

«ЦЕЛЬСЬ ФКЯ: АФ КИРЬФТАМС МОКШЭРЗЯТНЕНЬ ЛУВКССНОН!»

Ётай недяляня Саранскяйса мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин ётафтсь рабочай васедема Межрегиональнай организациять Мордовиянь районнай активонц мархта. Пингстонза келиста и крхкаста кепсевсть кизефксне, конат сотфт Населениянь Всероссийскяй переписть ётафтоманц мархта.

 

Рабочай васедемаса ульсть Мордовия Республикань Оцюнянь Администрациянь, Правительствань, Мордовия Республикать эзга государственнай статистикань Федеральнай службань территориальнай органонь представительхне, а тяфта жа Межрегиональнай организациянь Исполкомонь члеттне.

 

 

Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин:

 

—Кельгома ялгат, минь ётафтоме Населениянь Всероссийскяй переписти лемтьф ни аф кржа и аф фкя уровенень мероприятия. И тячиень васедемада мелевок тейнек эрявихть ётафтомс аф фкя форматонь форупт, конатнень эса нинге весть шарфтсаськ мокшэрзянь народть мяленц и ванфонц тяддень Всероссийскяй переписть лац-ряц ётафтоманц лангс.

 

Тевсь ащи вов мезьса. Населениянь Всероссийскяй мекольдень переписнень итогсна няфнесазь: мокшэрзянь народть лувксоц эрь переписень ётафтомда меле няевиста кири. Мзярда—100 тёжянь, а кой-мзярда мянь пцтай 200 тёжянь ломаньда. Сяс тейнек тяддень переписть пингста эряви пачфтемс Россиянь эрь мокшети и эрзяти: сон пови мокшэрзянь народть лувксс аньцек эста, мзярда эсь национальностенц сёрматфтсы «мордвин, или мордвин-мокша, мордвин-эрзя, мордвин-шокша, мордвин-каратай» валса. Кда кивок эздонк эсь национальностенц сёрматфтсы аньцек «мокша, эрзя, шокша, каратай» башка валса, сон аф сувай мокшэрзянь народть марстонь лувксс. А сувафтови «прочие народы» марстонь лувксти.

 

Но улихть цебярь примерхтка. Кепотьксонди, Населениянь Всероссийскяй 2010 кизонь переписть итогонза няфтезь: кассь мокшэрзянь народть лувксоц, кона эряй Саранскяйса и Мордовияса, и пачфтьф 40 процентти. И тя цифрать тейнек республикаса эряви сатомс тяддевок Всероссийскяй переписть итогонзон коряс!

 

А мокшэрзянь народть Всероссийскяй масштабса марстонь лувксонц аф прафтоманкса, кода Мордовия Республикаса, стане и Российскяй Федерациянь лия  субъекттнень эса, коса компактнайста эряйхть мокшэрзят, ётафтовсть «Шумбрат» национально-фольклорнай илат. Населениянь Всероссийскяй переписень кизефксне тяфта жа аф весть ванонтфтольхть Межрегиональнай организацияньконь Исполкомонц заседанияса, коса мархтонк работасть Мордовия Республикань Оцюнясь А.А.Здунов и П.Н.Тултаев, кона аф кунара кочкафоль Федеральнай Собраниянь сенаторкс.

 

Мокшэрзянь Межрегиональнай организациясь тяфта жа ладясь-арьсесь Всероссийскяй переписть лемс мокшэрзянь рекламнай роликонь конкурс, конань итогонза азовихть переписьта меле. Инь цебярьхнень эздост ули кода мумс ни интернетса. Тяда башка, «Синь инксост маряй гордость Россиясь!» лем ала нолдаме плакатт, конатнень эса печатлафт мокшэрзянь народть инь содаф ломанензон портретсна. Сембе ня плакаттне, печатнай буклеттне и рекламнай лия продукциясь пачфтьфт ни республикань эрь райононь школатненди, культурань куттненди и лия общественнай васттненди.

 

Ялгат, целеньке фкя: Населениянь Всероссийскяй переписть итогонзон коряс аф прафтомс мокшэрзянь народть лувксонц!

 

Мордовия Республикать эзга государственнай статистикань Федеральнай службань территориальнай органонь руководительть заместителец Н.А.Зологов:

 

—Кельгома ялгат, Населениянь Всероссийскяй переписть ётафтомста инь оцю прябалат тейнек тиенди-канни коронавируснай пандемиясь. Сяс тейнек райоттнень и велетнень эса эряви пачфтемс ломаттненди—сембе переписчикне вакцинировандафт коронавируснай инфекциять эзда. Аф эряви пелемс нолямс синь куду. Но, кда кинь аш мялец нолямс киньге эсь пялонза, ответт переписчикти можна максомс кенкшть фтала.

 

Тяда башка, любой ломанти ули кода сёрматфтомс эсь и эсь семьянц национальностенц переписной участкаса или «Госуслуги» порталса.

 

Мордовия Республикань культурань, национальнай политикань и архивнай тевонь министрть васенце заместителец А.И.Карьгин:

 

—Населениянь Всероссийскяй переписень кизефкснень мархта заняфт и ётафнесазь эряфс синь вешфксснон республикань Культурань, национальнай политикань и архивнай тевонь министерствань учреждениятне. И, шарьхкотьф: целеньке минь фкя—переписть итогонзон коряс аф кирьфтамс мокшэрзянь народть лувксонц кода Мордовия Республикаса, стане и Российскяй Федерациянь лия субъекттнень эса, коса компактнайста эряйхть мокшэрзят.

 

Мон надиян: сембе мероприятиятне, конатнень ётафтомаснон колга корхтась Ю.А.Мишанин, а тяфта жа мокшэрзянь активть работац, кандыхть эрявикс результатт!

 

В.НЕСТЕРОВ.

 


28.10.2021 №42
 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин