Сергей Иванович и Татьяна Тимофеевна ЧУМБАЕФНЕ: «ФАЛУ УЛЬХТЯМА ЭСЬ НАРОДОНЬ ИДЬКС»

2010 кизонь Населениянь Всероссийскяй переписть даннаензон коряс, Российскяй Федерацияса сембоц ульсь 744,2 тёжянь мордва. Мордва-мокшекс пряснон эста сёрматфтозь 4,8 тёжянь, мордва-эрзякс—57,0 тёжянь ломанць. Тя переписсь няфтезе, што инь лама мордвада эряй Самарскяй областьса. 2010 кизоня содафоль, што тоса 65,4 тёжянь мокшэрзя. Аф кржа эздонк Пензенскяй, Ульяновскяй, Оренбургскяй областтнень эса, Татарстанца и Башкортостанца, а стане жа Москуса и Московскяй областьса, лия региоттнень и областтнень эса. Кой-кит кирдихть кеме соткст историческяй родинаснон—Мордовиять мархта, а ламотне и ёфси тяса шачсть-кассть, но эряфонь тя или тона туфталонкса тусть эряма шири. Аф ваномок тянь лангс, аф юкснихть мокшэрзянь масторть колга, маряйхть гордость национальностьснон, родной кяльснон инкса и оцю мяльса примайхть участия Населениянь Всероссийскяй тяддень переписть эса, кона ушедсь 15 октябрьста и моли пцтай ков—14 ноябрть самс. Эсонза ули кода примамс участия, отвечамок ширезонт сай сёрмадыть кизефксонзон лангс, нолдамок тевс «Госуслуги» порталть или срхкамок и молемок сёрматфтомань участкав, кона работай Многофункциональнай центрать видеса.

Населениянь Всероссийскяй тяддень переписть ушедоманц оцю мяльса учезь и Моску ошса эряй мокшетне—Ковылкинскяй районца шачф-касф мирттне-рьвятне, эсь кялень, коень-обуцянь афкуксонь патриоттне, «Мокшень правда» газетать пара ялганза Татьяна Тимофеевна и Сергей Иванович Чумбаефне.

«Аф ваномок сянь лангс, што кунара эрятама Мордовиять эзда ширеса, мзярдовок аф юкснесаськ мокшень родной кяльть, мирдезень, Сергей Ивановичень, мархта фалу корхнетяма мокшекс. Тяда башка, ширезонк аф шуроста сашендыхть инжихть. Верондада: ёткстост кой-кона руз ломаттне эздонк тонадозь мокшень кяльть или шарьхкодихть кой-мезе мокшекс»,—мярьгсь Татьяна Тимофеевна.

Сонць мокшавась шачсь-кассь Сире Борку велеса, а мирдец тяка райононь Родькинаста. Семботи минценнети кельгомась Татьяна Тимофеевнанди ётась нинге шачемстонза тядянь лофцть мархта. Сире Боркуса Капаефнень мокшень лама идень семьясна содафоль национальнайти, мокшэрзянь моротненди, трудти кельгоманц мархта. Аньцек ужяль, што «пизось» рана лядсь кудазорфтома. Тимофей Кузьмич Капаев эряфста тусь пяк рана, кадомок рьванц Мария Филипповнань кота идь мархта удавакс. Мокшавати эста ашель 45 кизовок.

Татьяна Капаевась семьяса стирьхнень эзда инь оцюсель, сяс ульсь аф аньцек лездыкс тядянцты и бабанцты, но и кепотьксокс ёмлатненди. Мокшень стирсь кельгозе моронь мораманц, башка васта седисонза фалу занцесть и тянивок занцихть мокшэрзянь моротне. Москуву эряма ётамдонза меле Татьяна Тимофеевна колмогемоньда лама киза работась «Метрострой» организацияса. Аш ни кода лажаткшнесь Мордовияти, ёмла родинати, семботи мокшеннети. И тага тяфтама пингста лезнесть мороньке.

Лама кизода инголе Москуса эряй аканза-сазоронза пуроптсть «Эх, мордовочка» ансамбль, коса синь, тяконь лувксса и Татьяна Тимофеевна, морсихть тянемс. Мокшаватне тиендьсазь тянь мархта сяда содафокс мокшэрзяннеть, культураньконь, гордостень марязь щашендсазь сценать лангс лисемда инголе мокшень щапнень-каряпнень. Ванондолеть лангозост фалу!

Сембе минценнети озадонь седихть мзярдовок ашезь аще Т.Т.Чумбаевать мирдец Сергей Иванович. Мокшалясь тевонь содай строитель, прораб строительнай фкя фирмаса. Тиендьсы тевонц маштозь, афкуксонь профессионалкс. Но ломанць вельф и вельф скромнай (кода и ламоц мокшетне).

Ся, што Населениянь Всероссийскяй тяддень переписсь арась Чумбаефненди праздникокс, нят аф шава валхт. Мирдсь и рьвясь инголенди снимандасть мялень салай и мазы видеоролик, кона лемтьф Населениянь Всероссийскяй тяддень переписти. Эсонза мокшень ломаттне (Татьяна Тимофеевна щаф мокшавань щамса) пачфтсть эсь колгаст. Мокшень кяльса лочазь-лочасть эсь колгаст, а стане жа азондсть Ковылкинскяй райононь Сире Борку и Родькина велетнень—шачема-касома вастснон квалма.

Патриоттне гордостень марязь шарфтсть мяль, што Населениянь Всероссийскяй переписьса 16 кизефксть лангс отвечамста азсазь, што синь—мордовка-мокша и мордвин-мокша.

Т.АЛЬШИНА.