Военнай и трудовой подвигонь Мемориальнай музейть директороц Н.А.КРУЧИНКИН: «МИНЬ КАСФТТАМА РОССИЯНЬ ПАТРИОТТ!»

—Николай Андреевич, кода тяниень пингть латцевихть-мольфтевихть тефне военнай и трудовой подвигонь Мемориальнай музейса?

—Васенцекс, Мемориальнай музеень сотрудникне тячи сядонга виияфтозь научнай работать. И сон вятеви научнай тяфтама койхнень коряс, конат сатомшка кунара ни ладявсть музейса.

Лиякс мярьгомс, кда сотрудниксь сёрмады Сталинградскяй или Курскяй битвать колга, сон няфнесы эсонза Мордовиянь уроженецнень путксснон сяськомати тя оцюдонга оцю сраженияса. Сяс мес ня битватнень и лия сражениятнень колга, конатнень вельде народоньке сатозе Великай Победать, лама сёрматф научнай оцю трудта, аралафт научнай кандидатскяй и докторскяй диссертацият. А вов земляконьконь подвигснон колга, конатнень синь тиезь ня сражениятнень эса, миндедонк башка, улема, сяда цебярьста киндивок аф сёрмадови.

Кирдемок мяльса тя научнай вешфксть, тядде музеень сотрудникне тисть-ётафтсть эряфс научнай кафта цебярь проектт. Нят—«Мордовиянь уроженецне—Александр Невскяень орденонь и медалень кавалерхне» и «Мордовиянь уроженецне, конат ульсть представленнайхть Советскяй Союзонь Героень лемти».

Тяфта жа вятеви Александр Суворовонь и Михаил Кутузовонь орденонь кавалерхнень—Мордовиянь уроженецнень, вешендемаснон коряс оцю работа.

Тяда башка, сотрудниконьке аделазь работать документальнай книгать лангса, коса азондови земляконьконь подвигснон колга, конатнень синь тиезь Великай Отечественнай войнать пингста, воявамок Рославльскяй 326 стрелковай дивизиять составса. Кода содаф, тя дивизиясь пуроптфоль-кочкафоль Мордовияса. И, конешна, книгаса тяфта жа азондови синь боевой казнеснон колга.

—Кода «Поиск» республикань патриотическяй объединениянь руководитель, Николай Андреевич, мезе азат тяниень пингонь од ломаттнень патриотокс касфтомаснон колга?

—Койсон, афкуксонь патриотокс од ломаттне касфтовихть аньцек эста, мзярда синь, цебярьста содамок эсь странаснон историянц, маряйхть инксонза гордость.

Сявсаськ, кепотьксонди, республикань патриотическяй поисковай движениять, конань эса тячи 82 поисковай отряд. Тоза сувси 1200 од ломань, конатнень минь лемнесаськ боецокс. Тяниень пингс ня боецне ульсть 232 поисковай экспедицияса странань ся региоттнень эса, коса Великай Отечественнай войнать пингста мольсть-вятевсть оцюдонга оцю тюремат. Синь мусть тоса Якстерь Армиянь 5000 лама солдат и офицер, конат тяда меле калмафтольхть воинскяй почесть мархта.

Тяфта жа синь вельдест мувсь ня васттнень эса солдатонь 468 медальон, конатнень эзда 143-сь удалась лувомс. И, тяда башка, архивнай документтнень  тевс нолязь од ломаттне мусть 7000 лама солдат, конат тяниень пингс лувондовсть куляфтома юмафокс.

Сяс ули кода азомс ня од ломаттнень колга тяфта: синь касыхть Россиянь афкуксонь патриотокс. И тяфтамкс синь кармайхть фалу и эсь идьснонга касфтсазь афкуксонь патриотокс!

Тяфта жа, койсон, патриотокс улемань толнясь юрнай юноармеецнень, Победань волонтёрхнень, кадетскяй класса тонафнихнень и сембе лия од ломаттнень седиса, конат лездыхть войнань и трудонь ветераттненди.

Тяка пингть, тейнек вийс коре Мордовия Республикаса нинге сяда пяк виияфтомс патриотическяй работать школатнень и колледшнень эса тонафнихнень мархта. Кепотьксонди, одукс ладямс вечнай толть ваксса 1№  постть, конань ваксса тяда инголе кизоньберьф ащекшнесть тёжятть од ломань. Тяфта жа пара улель республикань од школатненди макссемс Советскяй Союзонь и Россиянь Геройхнень, Мордовиянь уроженецнень, лемснон.

Лиякс мярьгомс, патриотическяй работать вятеманц коряс сась пинге арьсемс-тиемс республикань комплекснай программа. Сонь вешфксонзон коряс сембе организациятненди, конат работайхть од ломанень касфтомань сфераса, улель кода марса и марстонь вийса вятемс Мордовияса патриотическяй работать.

—Кода няйсаськ, Николай Андреевич, коронавируснай пандемиясь тага келемкшни. Очнай работать Мемориальнай музейти аф сави тянкса меки кирьфтамс?

—Минь тянди аноктама. Экскурсиятне, документонь и лия выставкатне, кода и ётай кизоня, кармайхть ётафневома онлайн-форматса. Тяфтама жа форматса кармай вятевома работась ломаттнень мархта, конат ширденк анайхть лезкс тя или тона фронтовиконь вешендемста.

Но тячи Мемориальнай музейсь эрь шиня очнай форматса ётафни школань и колледжень тонафнихненди, вузонь студенттненди, республикань, Саранск ошень эряйхненди и минь инжиеньконди колмонь-нилень экскурсия.

Конешна, санитарно-эпидемиологическяй сембе вешфксне экскурсиятнень и лия мероприятияньконь ётафтомста ванфневихть, кода эряви. Надиятама: оцю ограниченият пандемиять инкса аф кармайхть ладяфт. И минь сембе арьсеф мероприятияньконь кизоть аделавомс ётафтсаськ очнай форматса.

—Удалаза арьсефонте.

—Сюкпря!

В.иосифов.