СТАРОШАЙГОВСКЯЙ РАЙОНЦЬ ТЯЧИ И ВАНДЫ

Старошайговскяй районць лувондови велень хозяйствань районкс. Тяса аш завотт, фабрикат, лия промышленнай предприятият, кодамот улихть и работайхть ламонцнень эса. Но сембе сяка районць ащи касомань-вииямань ки  лангса, мезьсовок аф ляткшни лиятнень эзда. Сон аф весть лисендсь сяськикс республиканскяй пялькстоматнень эса, сатнемок васенце и омбоце васттнень сёронь, лофцонь и сиволень получамаса и государствати тяфтама продукциянь мимаса.

Тяддевок пцтай сембе хозяйстватне кизоть аделсесазь оцю прибавка мархта ётай кизоть коряс. Утопне пяшксет од урожайда, эрь шиня райононь ферматнень эзда приёмнай пункту прважсеви сядоть малава тонна лофца, маластонь пингть пяшкодевихть платтне и сиволень мимаса.

Оцю сатфксонь сатоманкса районца тевс сувафневихть работамань сембе форматне, метоттне. Кда оцю предприятиятнень эса сяда оцю мяль шарфневи од технологиятнень лангс, рамсеви тяниень пингонь техника, паксяв усксеви сатомшка минеральнай удобрения, то крестьянскяй (фермерскяй) хозяйстватнень эса аф юксневи и ингольдень пингонь тевонь вятемась. Главнайсь, тоса и тяса сембе вийхне водендафт сянкса, кода сяда лама получамс сёрода, лофцта, сивольда.

—Тя кизось няфтезе, мезьса мртци тейнек семботь эсь пингстонза тиендемац, сокафть-видефть лангс оцю мялень шарфтомась,—азонды «Новотроицкая» агрофирмань     ООО-ть директороц В.А.Спирин.—Коське, пси кизоське тейнек изь шоря получамс эрь гектарста 30-35 центнеронь сёра, анокламс сатомшка корма жувататненди. Эрь шиня «Новомилк» перерабатывающай предприятияв прважсетяма комсь кафтувонь тонна лофца. Тя предприятиясь  сувси эсь холдингозонк, сяс прибыльсь—марстонь.

Мзяра киза ни мельцек кеняртьфти эсь сатфксонзон мархта «Богдановское»              ООО-нь коллективсь. Тяса маштыхть и оцю урожаень касфнема, и шиста-шис, ковста-ковс кепси лофцонь-сиволень получамась. Коллективсь кочкавсь лама нациянь, но сембонь  ёткса ули шарьхкодема, кажнайсь эсь тевонц тиендьсы оцю ответственностень марязь, лац-ряц.

—Ётайхненди-потайхненди ширесонк васта аш,—азонды хозяйствань директорсь С.С.Якомаскин.—Дисциплинась—васенце вастса, сонь эздонза ащихть хозяйствань лия тефне, экономикать кемокстамац. Сярятькстсь, кепотьксонди, ломанць, вастозонза лиси сонь ялгац, кие ряцок покоди. Но, кда работама ашеть лисе сяпиняда копорямда меле, тяфтапненди кенкшсь пякстави, синь тушендыхть эсь кигаст.

Тевти тяфта малаткшнемась лезни тястонь коллективти получсемс козя урожайхть, кизоста-кизос пяшкотькшнемс платтнень лофцонь и сиволень мишендемаса. Ётай пингть коряс  касомась моли, лувондови аф процентса, а ламонь-крда. И тянкса лама тиенди сонць хозяйствань вятись Степан Якомаскин. Вожиятне афкукс машты, эсь тевонь содай азоронь кядьсот. Сон семботь кирдьсы контроль ала, эрь шинц ушеткшнесы механизаторхнень и фермаса покодихнень мархта ряцок, максси теест советт, азонды шнамань валхт оцю сатфксонь сатоманкса. И ломаттне тянь сявондьсазь мяльс, тевснон тиендьсазь оцю производительностень сатнезь.

Старошайговскяй районца оцю мяль шарфневи ёмла и средняй бизнесть касфтоманцты. Тяса кунара ни  тонадсть колбасань и колбаснай изделиянь ноляма, панчсевихть кшинь панемань аф оцю пекарнят, аноклайхть люкшя, полба. Тя тевса оцю путксоц предпринимательть А.И.Фроловонь. Сон рамси од оборудования, панчси цехт и ня площаттнень макссесыне арендас сятненди, кинь ули мялец нолямс ня участкатнень эса эрявикс продукция. Тязк азсаськ, индивидуальнай предпринимательть, мокшавать Ольга Пьяныхть колбаснай изделиянза шнафт нльне «Зрнянь сёксе» Всероссийскяй велень хозяйствань продукциянь выставкаса, теенза максфт медальхть.

Сире Шайгавса мекольдень пингть вятеви строительнай оцю работа. Тяса панчсевихть эрямань од кутт, культурань объектт, строявихть кит, «Городская среда» национальнай проектть коряс петевихть и кирдевихть ёмла и оцю кужетне.

Мяль вельде кемокснихть од договорхт инвесторхне, аф лядондыхть ширеса и меценаттне. Лама объект районца панчф  пара вайме ломаттнень участияснон вельде. И кода тяса нинге весть аф лятфтамс Степан Степанович Якомаскинонь лемонц. Аньцек тядде сон макссь оцю лезкс народнай писательти Илья Девинонди шачема Сире Теризморга велесонза памятниконь панжемаса и Богдановка велеса культурань кудть реконструкцияса. Тяда инголе мушендсь средстват Сире Шайгова велеса войнаса шавфнень лемс памятниконь панжемс. Тяфтама ломаттнень цебярь тевонь  тиендемаснон вельде велень цёранятне и стирнятне тонафнихть тяниень пингонь школатнень эса, якайхть культурань центратненди эрь кодама кружокс, спортивнай площадкатнень эса налхкихть футболса, волейболса, хоккейса. Тянди водендафт и районнай администрацияса покодихнень вийсна, коса оцюнякс Г.А.Мухин и кона лемдезе сембе эряфонц районти.

Н.Лобанов.

Фототне авторть.