Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

СОДАФ УЧЁНАЙ И ЦЕБЯРЬ ЖУРНАЛИСТ

Мекольдень пингть Мордовия Республикань Писателень Союзсь аф азовомшка ашуясь. Тусть лия эряфс тяфтама содаф писательхне, кода В.М.Лобанов, Н.Л.Васильев, Н.И.Ишуткин, А.М.Доронин, оцю учёнайсь, литературнай критиксь В.М.Макушкин. Аф кунара пичефти куля пачкодсь и филологическяй наукань кандидатть, Мордовия Республикань культурань Заслуженнай работникть, Россиянь Писателень союзонь членть П.А.Ключагинонь куломанц колга. Нинге ёфси аф кунара, тяддень 18 июньцта, Пётр Андреевич васьфтезе эсь 85 кизонь юбилеенц. Тянь колга азондсть республиканскяй сембе периодическяй изданиятне, телевидениясь и радиось. Ётафтсть кодама повсь илат велень и республиканскяй библиотекатне. Ашесть ляда ширеса и школатне. П.А.Ключагин аф аньцек содаф учёнаель, но и цебярь журналистоль. А тейне сон ульсь преподавателькс, научнай руководителькс и ялгакс.

 

Тя ару вайме, панжада седи ломанть кармань содамонза ётай веконь кафксогемонце кизотнень кучкаста, мзярда сань тонафнема Н.П.Огарёвонь лемса Мордовскяй госуниверситетонь филологическяй факультетонь журналистикань отделенияв. Эста Пётр Андреевич покодсь журналистикань кафедраса, ульсь доцентокс. Эстокиге няевсь, што тя ломанць аф аньцек цебярь учёнай, но и козя опыт мархта журналист, писатель. Сон содазень эряфть сембе ширензон, стаканзон-сталмонзон, лафча-сяряди вастонзон. П.А.Ключагин аф кабинетнай учёнай. Сон ётазень Мордовияньконь сембе уженянзон, оцю и ёмла веленянзон. 1960 кизоня, аделамок Мордовскяй госуниверситетть, покодсь «Эрзянь правда» газетаса эсь корреспондентокс. Тоса тонафнесь Ленинградскяй высшай партийнай школаса, аф лама пинге трудендась «Хлебороб Приишимья», «Лениногорская правда» казахстанскяй газетатнень эса. Тянь квалма учёнайсь сидеста лятфнесь, азонкшнесь эсь лекциянзон эса.

 

Ётай веконь кафксогемонце кизотнень журналистикань кафедрась аф оцюволь. Сонь вятезе содаф учёнайсь В.Е.Соколова. Эстонь кизотнень тяса трудендасть П.Ф.Потапов, С.Н.Десяев, Н.Б.Ипполитова, лиятне. Оцю авторитетоцоль ётксост и П.А.Ключагинонь. Сонь кельгозь студенттне. Лекциянза фалу ётнесть мялень салайста. Лятфнесь пяк лама интереснай примерда эсь эряфстонза, газетаса покодемстонза. Сёрматкшнесь и рузкс, и эрзякс, и мокшекс. Вузса покодемстонза тяштьфонза лисендсть «Эрзянь правда», «Мокшень правда», «Советская Мордовия» газетатнень, «Сятко», «Мокша» журналхнень эса, марстонь и башка книгаса. Сёрмадсь фельетотт, юморескат, коса сюцекшнезень прянь няи баярнятнень, «тёждяста» эряйхнень, салайхнень-колайхнень, кальдявста тевонь вятихнень. Минь, студенттне, пяк дивандакшнеме Пётр Андреевичень лангс ванозь. Алясь аляшкаль, кафта метрат серецоль. Фалу серьёзнаель, шуроста тиендсь пееди шама. А кодама оржаль, интереснаель юмороц.

 

Пётр Андреевичень перанц алда лиссть азксонь, новеллань, стихонь, лятфнемань пусмот. Эрзякс синь кайгихть тяфта: «Од пингес кить-янт», «Пирявкс», «Цёканька», «Ожо цецят», «Апак прядо моро», «Аниськат». Рузонь кяльса лиссть «Сельское утро», «Клеймо» книганза. Синь кочказь-аноклазь нолдамс А.А.Громыхин, В.А.Федосеев. Цебярьста содафт научнай трудонза, кепотьксонди, «Мордовскяй периодическяй печатсь и литературась 1917-1941 кизотнень» и лиятне. А мзяра работадонза, публикациядонза литературань кизефкснень коряс. Сембонь лемсна афи лятфтавихть. Монь койсон, П.А.Ключагинонь творчествац тонафнеф аф кальдявста. Произведениянзонды оцю питне макссть и лувиенза, и литературнай критикне. Крхка, мялень салай работат творчестванц и эряфонц колга сёрмадсть М.И.Ломшин, Н.В.Зиновьев, В.И.Дёмин, С.Г.Девяткин, В.И.Антонова, Р.Б.Щанкина и ламотне лиятне. Лятфтаса, што монга тяшнень Пётр Андреевичень колга. 1990 кизоня Мордовскяй книжнай издательстваса лиссь «Пирявкс» юмористическяй азксонь книгац. Тя книгати тяшнень «Геройхне сафт велеста» лем ала рецензия. Сон печатлафоль «Мокшень правдать» 1991 кизонь 23 февралень номерсонза. Рецензиясь тусь Пётр Андреевичень мяльс. Приметазь и содаф учёнайхне В.И.Дёмин, Н.В.Зиновьев, конат лятфнезь эсь работаснон эса.

 

Дипломнай работазень лемоцоль «П.И.Левчаев и колмогемонце кизонь периодическяй печатсь». Научнай руководителькс тейне ульсь П.А.Ключагин. Тя аф юкстави и пяк интереснай пинголь монь эряфсон. Дипломнай работань тяштемста тевс нолдань лама интереснай материалда. Муйне Левчаевонь сёрманзон, конатнень кучсезень ялганцты, школань тонафнемань книгань авторти, Мордовскяй АССР-нь Заслуженнай учительти, Великай Отечественнай войнань ветеранти М.В.Кондрашкинонди, ульсть лия интереснай материалхт. дипломнай работастон пакшт                  макссень «Мокшень правдав», «Мокша» журналу. А араламстонза пяк дивандафтыне комиссиянь члеттнень Г.И.Горбуновонь, В.М.Макушкинонь, Е.И.Четверговонь, В.Е.Соколовать и лиятнень. Синь аф аньцек шназь, но и мярьгондсть максомс работазень «Мокша» журналу, а тейне арьсемс аспирантурать колга. Лама шнамань, седиень токай валда азсть и научнай руководителезень, П.А.Ключагинонь лемс.

 

Вузть аделамда меле П.А.Ключагинонь мархта кирдеме кеме соткст. Мон теенза сидеста гайфнень, васьфнеме кодама повсь республиканскяй илатнень, пуромкснень эса, сувсень вузу журналистикань кафедрав. Лама кизода меле Писателень союзу суваманкса тейне эрявсть колма рекомендацият. Кафттнень сёрмадозь Мордовиянь Народнай писательсь А.П.Тяпаев, Мордовиянь Заслуженнай поэтсь Г.С.Гребенцов. Колмоцеть инкса гайфтень П.А.Ключагинонди. Пётр Андреевичень кядьса ульсть колмоцьке книгане. Нинге весть лувозень синь. Ломанць сон ответственнаель. Кодама содафокс, кодама ялгакс теенза афолеть уле, тяфтак сон мезевок афоль сёрмада. Семботь колгат содасы, морафтсы, максы афкуксонь питне. И аньцек эста, кда лувсы тянь эрявиксокс, тяшти рекомендация. Тяфта эста и лиссь. Гайфтсь эстонь Писателень союзть вятиец, Мордовия Республикань Народнай писательсь А.М.Доронин и шутендазь азозе:

 

—Илья, тячи ширезон Пизел сувсесь.

 

—Кие? Кие? Александр Макарович?

 

—Ключагин ина, кда псевдонимонц аф содасак.

 

—Мес аф содаса, содаса пяк лац.

 

—А мезе ина кизефнят? Кандсь колгат кандидатскяй диссертация. Газетав, журналу печатлалезь кизефксонь апак   макссек. А вов Писателень союзу сувамс рекомендациянди аф кондясти. Сави тиемс одукс, ламода кирьфтамс, ламоц мяльхне-арьсематне, питнень макссематне, шнаматне савихть ёрдамс. Писателень союзсь—тя аф вуз, аф учёнаень совет, вешфксне ёфси лият. Сяс сёрматфонц эзда кочкасаськ инь важнайть, эрявиксть. А сембе сёрматфонц максса эстейть. Пади, кондясти пингонь ётазь. Макссак печатламс. Шарьхкодеть?

 

—Шарьхкодень.

 

Тячи-ванды молян Саранскяи, Александр Макарович то отпускса, то сяряди. Лафча шумбрашинц сюнеда ёфси кадозе Писателень союзть. Тяфта и лядсь  учителезень, научнай руководителезень, содаф учёнайть, писательть колган сёрматфоц кядезонза. Тяни пяк каендан, мес лиссь тяфта, сяс мес и А.М.Доронин, и П.А.Ключагин ашет мархтонк. А мзяра синь тисть и нинге тиельхть мокшэрзянь литературати. Синь лацост писательда лядонды пяк кржа. Ужяль, конешна, но мезевок аф тият. Эряфть аф лоткафтсак, аф стяфтсайть-кеподьсайть сятнень, конат кеподезь литератураньконь, культураньконь оцю вастс, ульсть тейнек учителькс, пшкядема вастокс.

 

Илья ВЕШКИН,

 

Россиянь Писателень

 

союзонь член.

 


28.10.2021 №42
 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин