КИНДИ СЮКОНЯКШНЕСТЬ МОКШЕТНЕ

Мокшень содаф учёнайсь, историческяй наукань кандидатсь, Н.П.Огарёвонь лемса Мордовскяй госуниверситетонь профессорсь И.М.Петербургский сембе эряфонц, ули кода мярьгомс, лемдезе археологияти. Эсь трудовой кинц ушетксста Иван Митрофанович примась участия Теньгушевскяй райононь Шокшинскяй могильникса, Нижегородскяй областень Волчихинскяй, Абрамовскяй могильникнень эса раскопкань ётафтомста археологическяй экспедициятнень работаса, Мордовияса и Нижегородскяй областьса ётафневи археологическяй раскопкатнень эса.
Сяльде И.М.Петербургскяень руководстванц ала мольфтевсть оцю археологическяй работат Мордовияса, Рязанскяй, Нижегородскяй областтнень эса. Этнографне тонафнезь мокшэрзятнень эряфснон-ащефснон Самарскяй, Оренбургскяй областтнень эса, Алтайскяй крайса. Синь материалснон коряс нолдафт «Мордва: историко-этнографический очерк», «Социалистический быт мордовского села», «Мордва Заволжья» книгатне.
И.М.Петербургский примсесь активнай участия научнай оцю форупнень—финно-угроведонь историкнень Международнай конкурссост, ламоц международнай, всероссийскяй и региональнай конференциятнень эса.
Мекольдень кизотнень учёнайсь лама сёрмадсь. Пцтай эрь кизоня нолясь монография.
Тячи минь макссаськ Иван Митрофанович Петербургскяень статьянц, коса корхтамась мольфтеви сянь колга, кодамотольхть мяльсна кунардонь мокшэрзятнень.

Мордовиянь археолокне тонафнесть кунардонь пингонь лама памятник, конатнень эзда содаф материалхнень коряс ули кода корхтамс сянь колга, кодамотольхть мяльсна кунардонь мокшэрзятнень. Инь козят и интереснайхть тянь пяльде калмотнень эзда муф материалхне. Кулофть мархта путф инвентарть ванондомста-тонафнемста няеви, што VII-XI векнень мокшэрзятне ульсть язычникокс. Синь шкайкс тиендезь природань вийхнень: ведть, толть, модать, растениятнень и животнайхнень. Алянек-аванек стане жа озондсть радняснонды.
Сянь колга, што мокшэрзятнень религиясна ульсь языческяйкс, ули кода лувомс работатнень эзда, конат тяштьфтольхть XIII векста. Тяфта, Вильгельм де Рубрук сёрмадсь, што Танандть (Донть) эзда север ширеса оцюдонга оцю вирьхть, коса эряйхть ломатть, именна: моксельхть (мокшет), конатнень аш кодамовок законцна, афкуксонь язычникт. Сяда меле английскяй путешественниксь Джен Кипсон стане жа тяштсь, што мордватнень ульсь языческяй верасна.
Хозяйственнай деятельностть сяда тов вииямац (кепотьксонди, модать соксеманц ушедомац), а стане жа классовай отношениятнень эвондамасна кармасть няевома и языческяй культтнень эса. Главнай шкайкс арасть Мода-авась, Масторавась, Ведь-авась, Пургине-пазсь, Ёндол-пазсь. Озонкшнесть мокшэрзятне и сяда ёмла шкайхнень.
Пяк няевихть мордватнень семейно-родовой культсна, лиякс азомс, озондсть кулоф радняснонды и синь инксост. Синь арьсесть, што кулофненди вийс коре тиемс цебярь или, меколанкт, кальдяв шиса лятф радняснонды. Вов мес тиендевсть лемозост поминкат. Можна мярьгомс, што ня поминкатне ётафневсть сяс, мес шисотне старандасть угадямс кулофненди, аф кяжияфтомс синь. Но тяка пингть, няка поминкатнень эзда няевсь кулофнень колга седи ваксстонь забота. Пелемать сюнеда жа калмосезь сяда ичкозине велеть эзда. Сяда сидеста калмотнень шувондозь ведь малас. Калмамань и поминкань тиендемань обряттнень содамста сотцеви сявок, кода мокшэрзятне арьсекшнесть тонашиса эрямать колга. А арьсекшнесть синь тяфта: кулофне живолготкшнихть и тиендьсазь ся тевть, конань тиендезь куломдост инголе. А сяс, старандамок лездомс кулофти сяда лацкас эрямс тонашиса, калмамстост ваксозост путнесть ярхцамбяль мархта сяканят, производственнай инвентарь. Воиттнень ваксс путнесть оружия и алашань снаряженият.
Нинге фкя шире ульсь мордватнень религияса. Синь тиендсть животнаень и нармонень фигураня лаца каннемкат. Сяда няеви алашань и ведьге уенди нармонень культсь. Сатомшка  азомс, што тя культть мархта сотфт алашань жертвоприношениятне, мезьда меле теенза тиендевсь оцю почёт. Вов кода тя обуцять колга тяштсь Джозафа Барбаро, кона ульсь минь крайсонк ХV векста. Кизонь фкя пингоня моксотне (мокшетне) лихнихть паксяв алаша и сотнесазь сонь нилецьке пильгонзон и прянц пяльс. Тяда меле сонь шавсазь стреласа. Алашать сиволенц сивондьсазь, а кеденц марсесазь шужярьса. Тяфта тиендихть чучела, конанди меколи озонкшнихть и казендихть соболень, горностаень, куницань, белкань, врьгазонь кетть.
Лама предметта, конат азондыхть алашань культть колга археологическяй материалсовок. Тяфта, коньковай привескаста целай крганят муфт Журавкинскяй омбоце могильникста. Литой алашаня муф Старобадиковскяй омбоце могильникста.
Мушендовсть привескат бобрань астрагалста, мезсь азонды, што тя территорияса ульсь бобрань культ. Эряви азомс, што бобрась занцесь башка васта мокшетнень хозяйстваса, сяс аф стак калмотнень эзда сидеста мушентфтольхть тя звернять пакарьста и кедьста тиф амулетт.
Инь лама материалда, конат сотфт ведьге уенди нармоттнень культснон мархта. Муфоль яксяргонь, локстинь лаца тиф лама фигураня, конат аноклафтольхть бронзаста и пакарьста.
Кунардонь мордватнень шкайхненди верондамаса оцю васта занцесь менельти и менелень светилатненди озондомась. Башка васта занцесь  шинь культсь, кона тиендевсь эсь лацонь символическяй знакокс.  VII-XI веконь мордовскяй калмотнень эзда муфоль тяфтама символонь лама вариант. Но сяда сидеста синь мархтост мазопневсть авань щапне.
Кода арьсихть ламоц исследовательхне, крёзсь—тя толть символоц. А толть, языческяй религиять коряс, ульсь ароптомань виец, сон бта аралакшнезень ломаттнень зиянда и урмада. Аф стак калмотнень эса тянемс мушендовихть толонь вастт. Сидеста мушендовихть крёз лаца подвескат, конат ёфси аф корхтайхть христианствать мархта сотксонь колга. Сон канневсь ожерельяса, накостникса. Крёзть изображенияц васьфневсь аф аньцек украшенияса, но и кядьге лангса.