МОКШЭРЗЯНЬ НАРОДТЬ КАЙГИ ЛЕМ ЦЁРАЦ

14 ноябрьста В.М.Сурковонди—мокшень содаф журналистти, прозаикти и редакторти—топодель 100 киза. Сон газетаньконь ровесникоц. Василий Михайлович шачсь 1921 кизоня Рузаевскяй райононь Сузгярьге мокшень велеса. Великай Отечественнай войнань участник. Сяльде заняфоль мирнай трудса. Работась комсомольскяй, партийнай и советскяй оргаттнень эса.  Но сембода лама киза эсь эряфстонза макссь национальнай печатти—«Мокшень правда» газетати и «Мокша» журналти. Аньцек газетасонк главнай редакторкс, лиякс мярьгомс, редакционнай коллективти пяк цебярь вятикс, тевс-кис водендайкс ульсь 15 киза. В.М.Сурковонь пингста лама пара полафткс эвондась «Мокшень правдаса»: одкстомсь шамаликоц, козякофтовсь содержанияц, сяда маласькофтовсь лувити. Газетась тиевсь национальнай журналистонь и писателень анокламаса цебярь школакс, сурковскяй школакс.

Родинать и республикать инголе оцю заслугатнень инкса В.М.Сурков казьфоль «Знак Почёта», Отечественнай войнань I и II степенень ордеттнень мархта, аф кржа медальса. Теенза максфоль «Мордовия Республикань  культурань Заслуженнай работник» почётнай лем.

Василий Михайлович кулось 2000 кизоня. Но сонь лемоц стаки эряй, эряй сембе цебярь тевонзон эса, конада тись пяк лама.

«Эрямс кепотьф прят»

«Мокшень правдань» ингольдень ответственнай секретарть, Мордовиянь Заслуженнай писательть Г.И.Пинясовонь лятфнеманза

асилий Михайлович Сурков «Мокшень правда» газетав главнай редакторкс сась 1961 кизоня.

Хуш тяса аф кржаль талантливай ломаньда, ётксост писательхне М.Кяшкин, П.Левчаев, С.Самошкин, лиятне, сякокс редакциять кой-кона ужестонза яфодсь «куштамань» шиненя. И сон, аф целак азораватнень лаца Очижинь карша, ушедсь ялганзон мархта куштафкятнень урядамост. Кочксесь-пуропнесь редакцияв од, эрьгав, ёню ломатть. Етксост ульсть М.Имяреков, А.Ежов, Ю.Кузнецов, П.Вельматов, Н.Учватов, В.Шеянов, М.Ковнин, лиятне. Мархтост редакцияв бта тундань ару варманя кандсть. Лаказевсть тефне.

Василий Михайлович тонафтозень оттнень работама аф пелезь, фталу апак варжакснек. Корхнесь, кле, сёлкф темат аш. И мзярда вярде кивок ушеткшнесь люпштама оржа темань кепсихнень лангс, редакторсь васенцекс кепсесь араламост.

Василий Михайлович пяк оцю мяль шарфнесь национальнай культурати, народоньконь лама векста кочкаф-пуроптф ваймонь козяшинзон кочкамаснонды-содамаснонды и маштозь, мялень салазь азондомаснонды. Ётафневсть оржа диспутт, конатненди шоворькшнесь коль сяда лама лувида, шиста шис касондсь рабселькорхнень лувкссна, редакцияса сидестонь инжикс арасть содаф учёнайхне, культурань и искусствань деятельхне. Тяфта эрекста газетась арсесь народонь мялень азыкс, ваймонь эждема и ароптома вастокс.

В.М.Сурковонь нинге фкя пара ширец—кемоста ащесь национальнай козяшить ванфтоманц инкса. 1962 кизоня шовордафтольхть марс ламоц райоттне, а 1963 кизонь тунда тифоль нинге фкя аськолкс, кона вятсь национальнай газетатнень машфтомаснонды. Автономнай республикатнень эса арьсефоль тиемс, кода эста корхнесть, ведущайкс рузонь кяльса ноляви газетатнень, а эздост материалхнень ётафнемс национальнайхненди. Лемдезь тянь тяфта: тиемс дубляжкс. А мокшекс мярьгомс, шарфтомс сятненди цильфокс.

Мзярда пачкодсь тя кулясь мокшэрзянь мастору, Василий Михайловичень шамацка полафтсь. Сон ломанць аф пяк корхтафкшуволь, а тяни бта кяленцка нилезе. Палы сельмованфонц лангозонк ашезе кепсе, улема, пельсь плхтасамазь, ванць алу, кабинеттненди, кода тиендсь сяда инголе, пцтай изь сувсе. Эзк-эзк якась обкому, Министронь Совету, а кабинетстонза звонцесь автономнай республикань национальнай газетань редакторхненди, вешендсь ширень кирдихть, но мумс тяфтамот ся пингть стакаль.

Машинисткатнень цють пильге лангста ашезень прафта—печатласть и печатласть сёрманзон эса—партиянь ЦК-в, СССР-нь Министронь Совету, лия вяре кабинеттненди.          Сёрматне ульсть бомба лацот, конатнень песост крьвястьфоль бикфордонь шнурсь. Салаване синь лувондоськ машиннай бюроса.

Нюрьхкяняста азомс, мяльсь эсост тяфтамоль: примаф решениясь лац-ряц апак арьсек, сон моли Россиянь нароттнень и народносттнень культураснон, духовнай козяшиснон срафтомаснонды-калафтомаснонды, эсь лацонь шамаликснон полафтоманцты.

Василий Михайловичень сёрманзон колга кулясь курокста пачкодсь обкому. Тоса теенза аф виздезь-ризназь азозь, кле, тяфтама тевонкса—молят партиять курсонц каршес—путсак партийнай билетцень. В.М.Сурков, кода меле кулеськ, каршезост азозе тяфта: «Партийнай билетть тейне максозь Родинать араламанц инкса Сталинградонь окопса. Кда анасазь меки, максса аньцек тоса».

Кулясь пачкодсь редакцияв. Арьсеме: казяма редактороньконь качафтсазь. Кода арьсят лиякс, кда шаманцка тейнек аф няфнесы.

Содаф, мзярда катось уды, шеерхне ушедыхть колендема. Миньге тяфта ушедоме тиендема. Юкстаськ шинек-венек работамать. Тяфта мольсь майть пес. Весть курьерсь ётазень редакциянь сембе кабинеттнень, фкяняньбес тердемазь редакторть кабинетс. Молеме нолдаф прят, бта приговороньконь кулхцондома. Фкя-фкянь мельге суваме. Василий Михайловичень осалготф шамац ульсь хуш цють ожерготфокс, но няевсь ломанькс, кона стака тевда меле лац ваймясь. Мзярда озсеме, сон командиронь казяма вайгяльса ушедсь:

—Партиянь Центральнай Комитетсь ладязе: национальнай  газетатне кармайхть лисендема стане жа, кода лисендсть инголи. Приказфтома «отпусконте» и «ваймама» шинте аделавсть. Газетась кармай лисендема сяка келесонза, но лия вайме мархта.

И редакторсь стане пувордазень гайкатнень, нльне юкснеськ варжакснемс частоньконь лангс. Эздонк пар кабинетова кепсесь, а кодак тушендоме командировкас, ласькондемста кочкяряньконь алда лийсть цяткт. Тяфтамоль сон, Сурков, маштсь скоростень латцема.

Аф сёпса, ульсть обжафт, анзяйхть, но нолатне, кялень шовайхне редакцияса В.М.Сурковонь пингста ламос исть кирнев. Синь вастозост сашендсть ломатть, конат газетаса мзярошка строчканкса аноктольхть аськолямс апак удок колма шит и вет.

Ялга ёткова аф весть корхнеме Сурковонь казяма гальцянзон колга. И, мекпяли, саме фкя мяльс: В.М.Сурков и лацонза ломаттне (эста Россиянь национальнай газетава аф ламоль) аралазь народоньконь пяк оцю и питни козяшиснон—эсь кяльсонк печатнай валть.