«Синь—велеть ваймоц»

«Велень эряфсь тяни скушна, тяса аш коза лисемс, аш коса ётафтомс ётка пингцень»,—тяфтама корхнемат аф шуроста сашендови кулендемс велеряйхнень эзда. А вов Ковылкинскяй райононь Мамолаева велень ломаттнень тяфтама прябаласна аш. Эрь кодама илатне-мероприятиятне тяса тонатф тев. Клубть кенкшенза Мамолаеваса пцтай аф сёлгондовихть. Тяса най кайгихть морот, кулевихть кштишендомат, весяла рахсемат. А заботендайхть тянь семботь колга мирттне-рьвятне Гагиттне.
Борис Михайлович и Светлана Васильевна велеряйхнень мяльснон кеподеманкса аф ужялькшнесазь аф пингснон, аф вийснон. Лад седиезост, мзярда тевсна канни ломаттненди кенярдема. Стака лувомска, мзяра аф фкя лацонь ила аноклакшнихть синь. Од кизоста—Бал-маскарад, Отечествань аралаень шиня—маршировкат-месть, Масланцяста—народнай гуляният. Аф юксневихть и Роштувась, Авань шись, Тройцясь… Эрь праздникти полатне аноклакшнихть стама козя программа, улема, оцю ошень сценаристтне сельме каяльхть лангозост. Маштозь кочкафт кштиматне-мораматне, сценкатне, весяла налхксематне и конкурсне. Сценарийхнень Светлана Васильевна аноклакшнесыне сонць. Шары-веляфты Интернетса, кой-мезть кочксесы газетатнень и журналхнень эзда. Тяни вов малаткшни Од кизось, и мирттне-рьвятне тага юмафтозь покойснон. Синнесазь пряснон—мезьса кеняртьфтемс ломаттнень, кода каземс теест афкуксонь праздник, илань цебярь настроения?  Кода содаф, ули пара кой—Од кизоня наряжакшнемс маскараднай щамса-карямса, и тянь Гагиттне кирдьсазь мяльса васендакиге. Светлана Васильевна сонць стафни велеряйхненди тяфтама щапт. Кинь, ванат, Келазькс наряжасы, кинь  Офтокс или Ловонь стирнякс. Нарятт аноклакшни и сценкатненди, а лезни теенза тя тевса машты кядь мокшавась Е.И.Малькина. Сценкасна мирттнень-рьвятнень—тя целай театрализованнай представления, а сценать лангс лисихне—афкуксонь актёрхт. Борис Михайлович, кда эряви, стирькс наряжай, а Светлана Васильевна фкя пингста арси сире бабакс. Велеряйхнень рахафнесазь пеконь шовамс.
Гагиттне арьсекшнихть и ётафнихть пяк лама конкурс кода оцюфнень, стане и ёмлатнень ёткса. А эсост сяськихне мзярдовок аф лядондыхть казнефтома. Тя аф аньцек мезень-мезень ламбамня или налхкшкя, но и эрь кодама тевса эрявикс паршихть. Кода азозь полатне, илань-мезень  ётафтомаса лезкс максси Мамолаевань велень поселениянь оцюнясь Н.И.Прошкина, но и эсь ярмакснон Гагиттне аф ужялькшнесазь, рамсесазь семботь, мезе эряви, аньцек ломаттненди улель пара.
Мирттне-рьвятне шачсть и кассть тязк—Мамолаеваса. Школада меле Светлана Васильевна аф ламос тушендсь Моску шири, но велесь ашезь тушенда мяльстонза фкя шиска, сяс курокста мрдась меки. Покодсь  велень хозяйстваса, школаса, тяни работай библиотекаса. Борис Михайлович стане жа занцесь пря лама тевса: ульсь комбайнёркс, плотникокс, а тячи сон велень клубть вятиец. Творческяй цятконясь крфай полатнень эса кунара ни. Школаса покодемста Светлана Васильевна ётафнесь  шабатненди и пялькстомат, и КВН-т. А вов оцюфнень пуроптомс вастсна ашель. Ульсь велеса клуб, но сон таштоль ни. Колма кизода инголе Мамолаеваса строяфоль социальнай центра. Оцю, валда зданияв ётасть велень почтась, медпунктсь, администрациясь, библиотекась, оцю васта максовсь клубти. Эста ни полатнень тевсна тусь. Тяни тяса аф аньцек морот кайгихть, но и полафнихть фкя-фкянь мялень салай выставкатне. То мокшекс щаф-каряф някатне сельме кеняртьфтихть, то сёксень козя урожайсь няфтеви. Пуроптсть мирттне-рьвятне и сембе пингонь выставка. Национальнай тя уженяса кочкафт сире пингонь паршихть, мокшень щапт-месть—сембось, мезть эса ванфневи историяньке.
Эряви азомс, синцьке велеряйхне лезнихть Гагиттненди илань-мезень анокламаса-ётафтомаса. Полатне азондыхть сюконямань валхт Т.Н.Агаповати, С.В.Абройкинати, М.И.Абройкинати, Т.А.Матяшовати, мирттненди-рьвятненди Сурайкиттненди,О.в.Чегодайкинати, В.А.Тюрькинати,  мес мзярдовок аф атказакшнихть эняльдемаснон эзда, и анокламс лездыхть, и кштима-морама лисихть. А мзяра шнамань вал эсь лемозост кулендихть синць Гагиттне, афи лувови. «Синь—веленьконь ваймоц»,—корхтайхть велеряйхне.
Ванат Светлана Васильевнань и Борис Михайловичень лангс и дивандакшнят—кода аньцек кенерькшнесазь семботь. Синь лац вятьсазь тевснон покодема вастса, кепсесазь ломаттнень мяльснон, да нинге вятихть оцю хозяйства. Аф хозяйства, а целай ферма куд пирьфсост. Аньцек тракстост Гагиттнень колма! Тяда башка улихть вазнясна, саразсна, яксяргсна, мацисна, нинге аф кунара учатка кирнесть. Кудазоравась Светлана Васильевна—машты кядь мокшава, пяк кельгсы пидеманц-стряпшаманц. Сонь пидефоц-паньфоц аф аньцек танцти, но и салай мяль лангс ванозь. Сембе ярхцамбяленза мазоптьфт стане, кодамот няят аньцек ресторанцта. Борис Михайлович сафтсы алянь эрь кодама тевса, узерсь кядьсонза, кода корхнихть, аф керы-лазы, а налхкозь налхки. Ламотне пшкятькшнихть теенза лезксонкса.
Мирттне-рьвятне Гагиттне шачфтсть-касфтсть кафта шабат—стирь и цёра. Кафцьке аньцек «ветес» шумордазь школать, а стирьсна университеттьке аделазе якстерь дипломса.
Вов тяфтама ломатть эряйхть мокшень велетнень эса. Синць аф нолясазь кядьснон и лиятнендивок аф макссихть тиемс тянь. Эздост ули кода тонафнемс и сявондемс пример.
О.ЕВДОКИМОВА.