Галина Макшева: «Катк Тигрань кизось канды сембонди сатфкст и цебярь полафткст!»

Вов и тусь историяв 2021 кизось. Инголенк панжевсь историянь тага фкя лопаня, минь аськолдаме 2022 кизоти. Кода фалу, тя пингть путнетяма инголенк од задачат, арьсекшнетяма од тефт, тияк варжакснетяма и фталу, тиенттяма итокт ётафти. Кодамкс ульсь ётай кизось Мордовия Республикань Заслуженнай артисткати, Г.И.Сураевонь-Королёвонь лемса «Келу» ансамбльса морсити Галина Николаевна Макшевати и мезе сон ученды Тигрань кизоть эзда? Тянь колга мокшавась азондсь корреспондентоньконь мархта корхнемста.
—Галина Николаевна, Од киза мархта тонь! Кеме шумбраши, паваз и творческяй сатфкст тейть!
—Сюкпря!
—Кодама мяльса-арьсемаса васьфтить Тигрань кизоть? —Кода фалу, пара настроенияса и аньцек цебярьс надиязь. Койсон, мезть кирдьсак мяльсот, ся и лисенди эряфса. Надиян, Тигрань кизось ули сяда тёждя, сяда удалаф, канды сембонди тейнек сатфкст и цебярь полафткст.
—Аф сцена лангса сатодязь куранттнень шавомасна?
—Илать васьфтине кудса инь мала ломаннень—иднень, уноконень мархта. Но улендсь и стане, што Од кизоть сашендовсь васьфнемс покодема вастсовок. Тяфтама ни минь артистонь тевоньке, васенце вастса тейнек тиемс праздник лиятненди. Весть, мяляфтса, Од кизоста веньберьф кштиме-мораме ошень фкя кафеса. Азороц мокшаляль, мялецоль, штоба заведениязонза пуромфнень инголе выступандаль национальнай коллектив. И вов минь кеняртьфнеськ кафень инжихнень мокшень и эрзянь мороса. Куду повоме шобдава шири.
—Кода семьяце ваны сянь лангс, мзярда кирневат покодема вастса или тушендат гастрольс?
—Синь тонадсть ни тянди. Стирезень и цёразень касфтыне ськамон. Шабакс, улендсь, сявондине мархтон, аф шуроста кадондыне ськамостка. Шабане, рузкс мярьгомс, самостоятельнайхть, синць и пидельхть-панельхть эстеест, и кудботмоса порядка кирдельхть. Тячивок стряпшамань тевса сафтсазь. А цёразе мянь профессияндивок эстеенза кочказе—покоди ресторанца поваркс.
—Галина Николаевна, кодамкс мяляфтовсь Од кизонь илась идькс пингстот?
—Шабакс сембе праздникне учендовсть седиень оцю таколдома мархта, а Од кизось —сядонга пяк. Аноклама теенза ушеткшнеме ламода тяда инголе, тонафнеме стихотвореният, морот, сценкат. Лувондоськ шитнень, мзярда школаса стяфтоволь кузня и минь кярьмоттяма мазоптомонза. Тя ульсь кодама-бди ёфксонь пинге. Тядязе сташендсь тейне карнавальнай костюпт, улендень и Нумолнякс, и Офтонякс, и Врьгазкс, и нльне Цыганавакс. А конашкава учендоме Од кизонь ламбама казнетнень эса. Эста аф кода тяни, стак шиста конфетат-месть ашесть повонда шабатненди, сяс кулёкне ульсть тейнек оцю кеняртьксокс. Оцюфт, тифтольхть кагодста и конфетатне эсост ёфси лия таньф мархтольхть. Сон тянемс кяльбрясон.
—А тяни кудса кузня наряжакшнят?
—Конешна, кузняфтома илась аф ила.
—Мезьса  мяляфтовсь 2021 кизось  «Келу» ансамбльти?
—Кизось аф тёждяль, но работамда ашеме лотксе. Путнеме од программат, од номерхт. Ичкози гастрольс ашеме яка, сянкса аф кржа концерт максфоль республикань райоттнень эса. Улеме иласа и шабрань регионца—Самарскяй областьса. Лама инжида васьфнема аэропортса. Кеняртьфти, мес ширезонк сашендыда уленди коль сяда и сяда лама. Мялень салай программа аноклафоль Од кизонь илати. Колма кяльса—мокшекс, эрзякс и рузкс мораськ «Вирьса шачсь кузня» Од кизонь инь содаф и кельгови моронять. Тя ульсь кода театрализованнай номер, сценать лангс лисендсть и Якшам Атясь, и вирень звернятне.
—Иласта ладяф казендемс фкя-фкянди казнет. Тон, Галина Николаевна, мезть сяда кельгсак, каземацень или казнень получамацень?
—Тейне сяда кельгови казендемась. Лад арси седиезон, мзярда каннян ломанти кенярдема. Тя пингть бта пацяне шачендыхть, мялезе эрямс, кельгомс, тиендемс оцю тефт.
—Галина Николаевна, эрь лятфтасаськ лувиеньконди, костоннят тон шачемас-касомас коре, кит тядятне-алятне?
—Ёмла родиназе Старошайговскяй райононь Красная Уржа посёлкась. Касонь колхозниконь семьяса. Алязе, Николай Яковлевич, эряфоньберьф трудендась колхозса, ульсь фермань заведующайкс. Тядязе, Валентина Ивановна, работцесь дояркакс. Родительне шачфтсть-касфтсть сисем итть, мон ёткстост сембода оцюсь. Эзрайть эзда, шарьхкотьф, вешфксське сяда оцюволь: мон и кудонь, и перень тевса васенце лездыселень, и ёмла сазоронь-дуганонь ванниелень. Уржаса аделайне начальнай школать, а меле тонафнень Краснай посёлкаса. 9-10   класснень шумордайне Вертелимса. Велесь эздонк ащесь кемонь вайгяльбень вастса. Цебярь погодаста ялгань келеса пачкотькшнеме велосипедса, а мзярда ушеткшнельхть сёксень пизепне-рдасне, а меле—тялонь фальхне, эряме интернатса.
—Тяни улендят шачема велесот?
—Пяк ужяль, но Уржась срадсь-каладсь нинге лама кизода инголе. Тядязе и алязе 1985 кизоста сявомок эряйхть Саранскяйса. Лацост стане жа тушендсть кие коза и лия велеряйхне. Инголи веленьке пяк оцюволь, тяса ульсь оцю хозяйства. А кодама мазы вастса ащесь сон, перьфпяле туста вирьхть, кели паксят. Тя мазышись тячемс шоворькшни онозон. Сяс, улема, и касонь вирень кельги ломанькс.
Тячи пачкодемс Уржав пяк стака. Ки ёфси аш. Но седиезе сембе сяка уски эсон тя аймаку. Мон сидеста улендян Старошайговскяй райононь Сарга велеса, коса шачсть-кассть ялгане, якан ширезост инжикс.
—Тячи тон содаф артисткат. Кинь лаца туть тяфтама вайгялюкс?
—Родсонк-плямасонк аф кржаль морайда. Морсесть щавазе, бабазе, мазы вайгялец алязень. Эздост, улема, и ётась тейне морамань асушись. Школаса фалу морсекшнень ётафневи пуромкснень, илатнень эса.
—Пара улель содамс кода повоть «Келу» ансамбльти?
—Эста мон аньцек-аньцек шумордайне школать. Ся пингть мокшэрзянь содаф композиторсь Г.И.Сураев-Королёв сась мяльс пуроптомс профессиональнай коллектив, коса морсикс мялецоль няемс велень простой ломаттнень. Георгий Иванович якась велетнень эзга, кочксесь морсихть. Кулхцонтфолень монга, вайгялезе тусь мялезонза и примафолень коллективу. Тя ульсь тейне аф азовомшка оцю кенярдемакс. «Келуть» творчестванц колга содань тяда инголе ни. Артисттне улендсть велесонк, морамаснон сидеста кулендине радиоса. Повомс ёткозост ульсь оцюдонга оцю и тяка пингть аф верондафты павазкс. «Деряй, сафтови тейне синь лацост?»—арьсень. Но тевозе лиссь. Нильгемонь кафтува киза ни морсян «Келуса».
—Артистонь тевсь, шарьхкотьф, аф тёждя, выступлениятне, гастрольхне сявондихть лама пингта. А мзярда эвондакшни ётка пингце, мезьса занцесак сонь?
—Кода ни азыне тяда инголе, пяк кельгса вирть, афи лисенделень тоста. Нльне урмане-сярятьфоне сетьмосихть шуфтонятнень ёткова якамста. Пара мяльса кочксян панкт, имошт. Меле эздост тиендян лама мезе танцтиня, каванякшнесайне семьязень, ялганень.
—Спасиба, Галина Николаевна, седикс-ваймокс корхнеманкса! Тага весть Од киза мархта тонь! Катк пяшкодеви сембось, мезе арьсеть!
—Спасиба!
О.ЕВДОКИМОВА.