ЛОМАНТЬ КОЛГА ЗАБОТАСЬ—ВАСЕНЦЕ ВАСТСА

«Агросоюз—Левженский» ООО-сь республикаса фкясь инь виихнень и содафнень эзда. Хозяйстваса кунара ни арась правилакс вельф пяшкотькшнемс платтнень государствати сёронь, лофцонь и сиволень мишендемаса. Кизонек-тялонек тястонь коллективсь покоди фкя девиз ала: «Сембе вийхне—хозяйствать экономиканц кемокстаманцты!». И нят аф шава валхт. Кепотьксонди, ня шитнень фермаста приёмнай пункту прважсеви пцтай кемонень тонна лофца суткати. Эрь траксста потьневи комсь кафтува литрань лофца, мезсь сяда лама ётай кизонь тяка пингть коряс.

—Кие сотозе эсь эряфонц  велень хозяйствать мархта, сянди аш мзярда налхксемс компьютерса, планшетса, ванондомс эрь кодама прянь шаракофты телевизионнай шоут,—мярьгсь «Агросоюз—Левженский» ООО-ть директороц В.И.Сетин.—Минь задачаньке, мяленьке водендафт сянди, кода сяда лац ётафтомс тялоть фермаса, эсь пингстонза андомс-симдемс тракснень, вазнятнень, получамс сатомшка лофца, сиволь. Азса стане, ломаненьке покодихть сиземань аф содазь, седикс-ваймокс. И тянь минь шарьхкодеськ фермав сувамста. Шобдавань лофцонь потяма пингсь аделсевсь, но ломаттне ашесть эряскода кудга, финцне урядазь жувататнень вастснон, лиятне явсть кормат, якасть вазнятнень мельге. Фермань бригадирсь Ольга Владимировна Глазкова аноклась ки лангонь каготт Ичалкаста лофцть инкса саф водительти. Кода фалу, прважсеви сембе продукциясь оцю качествань.

—Качествась—васенце вастса,—мярьгсь Ольга Владимировна.—Тянь эзда ащи ся, кода мархтонк кармайхть кирдема соткст лофцонь рамсихне, заготовительхне, а тяфта жа сембось тя сявондеви мяльс зарплатать пандомста. Тияк азса, эсь трудснон инкса ломаттне получайхть достойнай зарплата и эсь пингстонза. Мялезе тячи азомс спасибамань валхт дояркатнень Татьяна Александровна Беловать, Валентина Васильевна Сураевать, Любовь Михайловна Федотовать, Евгения Викторовна Пронинать лемс. Сембе синь тевснон содасазь лац, кошярямс аф сашендовихть, суткати эрь траксста потьнихть 22-23 литрань лофца. Маштозь тиендьсазь эсь тевснон скотникне Олег Ильич Дроздов, Александр Борисович Читайкин, Евгений Александрович Притчин. Синь фермаса покодихть сменаса, якайхть сядот жуватань мельге.

Кода идь лаца тяса ваныхть и вазнятнень мельге. Тя участкаса покоди эсь тевонь содай авась Вера Петровна Кузнецова. Профессияс коре сон ветеринарнай врач, сяс вазнятне аф аньцек анневихть-симневихть, но и эсь пингстонза теест путневихть прививкат, эрявикс уколхт, макссевихть эрь кодама витаминнай добавкат. Сяс фермаса ванфневихть сембе вазнятне.

«Агросоюз-Левженский» ООО-са оцю мяль шарфневи корматнень лангс. Сембе синь жувататнень инголи пачфневихть миксерса, коса тяда инголе сембе мараф корматне шорсевихть, эзост кайсеви комбикорма, микродобавкат, аф лама сал. Лиякс мярьгомс, жувататне получайхть сбалансированнай рацион. Траксненди кормат усксихть Виктор Николаевич Потапов и Николай Арсентьевич Сурков, а вов ведражень стадать мельге кемокстаф Евгений Алексеевич Курзенков. Сембе синь хозяйствать шнама ломаненза, эсь тевснон алятне тиендьсазь курокста и лац. Кда конацка эздост урмаськодсь или ашезь сав работама лия кодамовок туфталонкса, эста ялганза покодихть кафтонкса, усксихть кормат снярс, мзярс аф пяшкодихть сембе кормушкатне.

Тя материалть анокламста мархтонк ульсь хозяйствань директорть заместителец В.В.Данилов. Ефсикс нинге од цёра, топодсь киза пяле, кода сон сась хозяйствати работама. Но сембоса няеви—мялец нолдамс тяса кеме юрхт. Владислав лац содасы и кельгсы эсь тевонц.

—Шачемас коре мон Перхляй велеста,—мрьгсь мокшень цёрась.—Тонафнень и аделайне Н.П.Огаревонь лемса Мордовскяй госуниверситетонь механикань и энергетикань институтть. Мзярошка киза покодень стройкаса, вятень работат «Мордовия Арена» стадионца, а вов тяни покодян велень хозяйствань предприятияса. Мон аф каендан, мес ошть полафтыне велеть лангс, сембось тяса мялезон, цебярьхть ломаттне, фкя-фкянь лац шарьхкоттяма хозяйствань оцюнять В.И.Сетинонь мархта. Сон специалистсь оцю опыт мархта, сембе вастса лезды, коса эряви тонафты, пара вайме ломань. Тяфтапнень лангса кирди велесь. Спасиба теенза сембонь эзда,—поладозе меколи Владислав Данилов.

И видекс стане, ломаттне лядондыхть и мяль вельде покодихть тоса, коса ули фкя-фкянь шарьхкодема, ширень кирдема, коса цебярь покодись шнакшневи-ванфневи. Владимир Иванович Сетин аф ужяльдьсыне седиста моли шнамань валонзон лац работай работникнень лемс, а кда эвондакшни киньге кодамовок прябалац, тязк лезды, решандасы. Стама ни сон ломанць, паронь арьси, шарьхкоди, аф эсь прянь няи, оцю букваста мокшаля! Шумбраши тейть, Владимир Иванович, лама кизонь эряф и штоба кисот васьфневольхть эсь лацот аньцек пара вайме ломатть.

                                                                                                       Н.Лобанов.