Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

АФКУКСОНЬ НАРОДНАЙ ПОЭТ

И.М.Девинонь 100 кизонь топодеманцты
Тяддень 20 июльста топодель 100 киза СССР-нь Писателень союзонь членти, Мордовскяй АССР-нь Народнай поэтти, Мордовия Республикань Государственнай премиянь лауреатти, Великай Отечественнай войнань ветеранти И.М.Девинонди. 2022 кизоть аф пелезь улель кода лемдемс Девинскяйкс. Лемозонза эрявольхть ба ётафтомс литературнай илат, выставкат, тонафнихнень ёткса сочинениянь, работань лия конкурст. Ётафтомат васьфтемат и ся писательхнень мархта, конат васетькшнесть Илья Максимовичень мархта, работасть Писателень союзса, редакциятнень эса.
И.М.Девинонь аф шарфтови кяльце лемдемс юкстаф поэтокс. Эрь кизоня ётафневихть Девинскяй лувомат. «Нардише» романоц арась шра лангонь изданиякс мокшэрзянь литературань кельгихненди. Сире Теризморгаса, шачема велесонза, путф памятник. Тя сембось кеняртьфти, кеподи мяль. Но пичефти лиясь. Аш од работат, исследованият Илья Максимовичень творчестванц колга. Газетатнень, журналхнень эса аш лятфнемат Народнай поэтть колга. А вдь мзяра ялгадонзоль Саранскяйса, Сире Шайгавса, Сире Теризморгаса. Мес аф нолдамс 100 кизонь юбилеенцты И.М.Девинонь колга лятфнемань книга.
Васенцеда И.М.Девинонь васьфтине ётай веконь кафксогемонце кизотнень ушетксста «Мокшень правдань» велень корреспондентонь пуромксса. Эста сон вятезе Мордовскяй АССР-нь Писателень союзть. Пуромксонь трибунаста азыне эсь мяльнень-арьсеманень тядянь-алянь кяльса лисенди газетать колга. Эстонь кизотнень «Мокшень правдань» редакторкс ульсь содаф писательсь Н.И.Учватов, заместителькс—П.П.Кулешов. Кулхцондомазь, эняльдеманень кулезь. Пуромкста меле маладсь Илья Максимович.
—Шумбрат, тёзка? Аф содасамак? Мон И.М.Девин, вятьса Писателень союзть.
—Няйхте васенцеда. А стихнень школаса тонафнесаськ. Лама колгант азонкшнесь учителезе, войнань ветеранць, школанди тонафнема книгань авторсь М.В.Кондрашкин. Кода содаса, тон цебярь ялгалеть монь землякозти, содаф поэтти А.С.Малькинонди,—отвечань мон.
—Няйсак кода. Васенцеда васьфтеме. А мзяра фкя-фкянь колга содатама. Монга ванан тонь сёрматфнень мельге. Лувондсайне тяштьфнень «Мокшень правдаста». Ульсть стихне «Якстерь тяштеняса». С.В.Кинякин шнай эсот. Стихне тусть мялезон. Сёрматт, тёзка, сёрматт. Тя тевсь аф тёждя, конешна. А косот тяни тёждя тефне?
Тя корхтамась кеподезе мялезень. Сань Атери, азондыне учителезти М.В.Кондрашкинонди.
—Илья Максимович—цебярь ялгазе,—мярьгсь Михаил Васильевич.—Ламоксть ульсь Атерьса, Кяшалса. Сашендсь А.С.Малькинонь калмонянц лангс. Ломанць сон пяк простой, панжада седи. Кда кодамовок кизефксне, эняльдемаце, сувак ширезонза аф пелезь, аф виздезь. Сон киндивок аф атказакшни, сембонди максси лезкс.
Тоса кармань тонафнема вузса. Эста Писателень союзсь, «Мокша» журналсь ульсть Советскяй ульцянь 55№ кудса. Тяса фалу ламоль писательда. И.М.Девинда башка ульсть С.В.Кинякин, А.П.Тяпаев, В.М.Лобанов, М.И.Малькина. Сидеста сувсесть М.Г.Имяреков, И.Н.Кудашкин, М.С.Моисеев, А.Ф.Ежов. Сембоса примеркс, корхтамань ушедыкс ульсь Илья Максимович. Сонь оцю авторитетоцоль писательхнень ёткса. Конашкава содазе эряфть, литературать, конашкава аруволь, мазыель и козяль мокшень кялец. Аньцек кулхцондолеть и кулхцондолеть эсонза. Сон корхнесь аф аньцек писательхнень ёткса, но и лама оцю трибунаста. Сон кочксевсь Мордовскяй АССР-нь Верховнай Совету депутатокс, КПСС-нь XXVI съезду делегатокс. Тосовок Илья Максимовичень оцю авторитетоцоль. А мзяра лезнесь простой ломаттненди.
Мзярда васьфнине Илья Максимовичень Советскяй площадьста, мзярдовок ашезь ётне вакска.
—Ожу, тёзка, тят эряскода, прважамак аф ламня.
Мезень колга корхнеме? Конешна, литературать, мокшень кяльть арушинц, лисьф од книгатнень колга. Ульсь нинге фкя марстонь теманьке—А.С.Малькин. Тя темась Народнай поэтть пичефтезе сембодонга пяк. Кодама илат Александр Степановичень лемс ётафневихть, ваныхть ли калмонянц мельге, кода эряй-ащи Вася брадоц. Виденц азомс, И.М.Девин ульсь ушедыкс и Малькинскяй лувоматненди, конат 2021 кизоня ётафтовсть 28-цеда. А 1993 кизоня А.С.Малькинонди топодсь 70 киза. Тяда инголе гайфтсь Илья Максимович.
—Тёзка, Сашанди топоди 70. Пяк мяленьке молемс Кяшалу, ваномс и нинге весть сюконямс калмонянцты. Примасамасть?
—Конешна, приматядязь. Тисаськ семботь, мезсь ащи эздонк. Но тонць шарьхкодьсак, Илья Максимович, улихть районца оцюнят. Теест нинге гайфтеда.
И гайфнесь Илья Максимович райононь эстонь оцюняти А.Ф.Шумкинонди. 1993 кизоня Кяшалса ётафтовсь А.С.Малькинонь лемс оцю ила, коза сашендсть С.В.Кинякин, И.Н.Кудашкин, лиятне. Синь и путсть ушеткс Малькинскяй лувоматненди. И.М.Девинонь лятфнеманза поэт ялганц колга пяк мялень салайхтельхть, лядсть тянемс мялямозон. Лац содазе поэтть брадонц, Василий Степановичень. Эста сон шисоль, стакаста сярядсь, васта лангсоль. Илья Максимович васта эстеенза ашезь мушенда.
—Кода тяфта,—мярьгсь писатель ялганзонды.—Мянь Саранскяйста саме Сашань калмонцты сюконяма, а ётаме шачема-касома кудонц вакска, ашеме сува брадонц варжама.
Велень лавкаста И.Девин сявсь гостинецт и суваме поэтть шачема кудозонза, корхнеме Василий Степановичень мархта. Мзяроль лятфнемада, сельмоведьта. Саранскяи срхкамста Народнай поэтсь азозе:
—Кода кев седистон валхтонь. Сашась тейне ульсь кундань брадкс. Васявок тейне кода радня ломань. Кати няйса оду, кати аф. Улень кода эсь кудсон.
И виде, мзярда шисоль А.С.Малькин, сидеста Кяшалу усксезень писатель ялганзон. Синь ётксост ульсть И.М.Девин, П.К.Торопкин, И.П.Кишняков, А.А.Соболевский, А.П.Тяпаев, лиятне. Сидеста лядондсть и удома. Синь примсезень школань эстонь директорсь, Мордовскяй             АССР-нь и РСФСР-нь Заслуженнай учительсь В.С.Богданов, ламотне лиятне. Тянь колга сидеста лятфнесь Илья Максимович. Лятфнесь прянь шнафтозь, гордостень марязь. Сашендсь Атерень району, кода земляконзон шири. И аф весть лятфнезе, што Сире Теризморгась лиссь Атерть эзда. И нят аф шава валхт. Тянь колга корхтайхть легендатне.
И.М.Девин кизода сяда сире Малькинонь коряс. Аф тёждя эряфонь кит-ятт савсть ётамс ня кафта поэттненди. Кафцьке нинге войнада инголе ушедсть сёрмадома стихт. Илья Максимовичень васенце сиде моронянза велень эряфть колга лиссть «Колхозонь эряф» журналса нинге 1939 кизоня. Эста теенза ульсь кемзисемге киза. Тяшнесь сидеста. Кой-кона произведениянза, журналда башка, лисендсть «Мокшень правда» и «Комсомолонь вайгяль» газетатнень эса. А меле ушедсь Великай Отечественнай войнась. 1941 кизоста сявомок сон ульсь фронтса. Тюрсь фашисттнень каршес Калининскяй, омбоце Украинскяй, омбоце Белорусскяй фронттнень составса. Якстерь армиять мархта ётазень Западнай Белоруссиять, Польшать, Восточнай Пруссиять. Казьф лама боевой орденца и медальса.
Фронтса улемстонзовок ашезе кадонда тяштемань тевть. Сёрмадсь стихт, кучсезень синь редакциятнень эзга, Сире Теризморгаса эряй раднянзонды. А 1945 кизоня Мордовскяй книжнай издательствась нолдазе васенце стихонь пусмонянц «Шобдавань заря» лем ала. Эсонза сембоц 26 лопаняль. А конашкава оцюволь и питниель казнесь. Тя книганясь макссь сай пингонь Народнай поэтти вийхть и оцю надияма тяштемань тевса.
—А войнань кизотнень кирнеде соткс А.С.Малькинонь мархта?—аф весть кизефнине Илья Максимовичень.
—Кода ина. Кодама стака афоль уле, мушендоме пинге фкя-фкянди сёрмань тяштемс. Кучсесь Саша тейне и од стихт. Синь эсост оцю кельгомаль Родинаньконди, мокшэрзянь краеньконди. Эста минь мяльсонк фкяль—тапамс      фашисттнень, панемс странастонк и сяськикс мрдамс куду, кярьмодемс тевс.
—Малькин каясь лангозон сельме,—лятфнесь Илья Максимович.—Васедемстонк, а тя ульсь войнаста самдонк меле, казине ялгазти книганязень. Сашань васенце книганяц «Стихт» лем ала лиссь 1948 кизоня. Сон кафксть сяда оцюволь моннеть коряс. 1952 кизоня ялгазе нолдазе «Ялгань вал» стихонь омбоце пусмонц. А монь «Стихт» книганязе лиссь аньцек вейхкса кизода меле, 1954 кизоня. Ялгаксшись тя ялгаксши, а эсь ётксонк пялькстоманя ульсь.
Тя ульсь ётай веконь вейхксогемонце кизотнень ушетксста. И.М.Девин кирдсь кеме соткст «Якстерь тяштеня» журналть мархта, ванондозень-петнезень шабатнень кучф стихснон, азксснон. Сувань Илья Максимовичень шири. Сон кенярдсь.
—Озак, озак, тёзка. Азонтк, мезе одня Атерьса, Кяшалса, «Мокшень правдаса».
Ашеме кенере лац-ряц корхтамска, сувась Ф.М.Костяйкин. Шачемас коре сон Кяшалоннель, эрясь Рузаевкаса. Тяшнесь стихт.  Ётксост кфчядсь спорямань кизефкс: Ну а кода тяфтома?
И.М.Девин кулхцондозе инжиенц, азозе корхтаманц колга эсь мяленц-арьсеманц. Прважамстонза люпштазе кяденцка. Мон ванонь Илья Максимовичень лангс кургонь келептезь. Тя тейне арась цебярь урококс, кепотьксокс. Конашкава сон ульсь ёню, смузю, ару вайме ломанькс. Конашкава маштсь прянь вятема, кодама оцюволь культурац.
А конашкава Народнай поэтсь «юморноель». Азондсь стане, мярьгат, пачат пицесь. Киндивок Сире Теризморгаса афоль сафтов лацонза. Да и аф аньцек Сире Теризморгаса. Лама интереснай историяда лисендсь и эсь мархтонза. Кудонц перьфке ламоль частонь петема мастерскойда. Аф содаса мезьсоль туфталсь, но частонь петихнень «Кячказса» каяфтозень кедьснон. Материалсь лиссь оржа и пяк интереснай. Эстонь кизотнень критическяй материалхнень лангс сашендовсь отвечсемс. Видет или аф сёрматфса факттне. Аф видет, муворусь авторсь. А кда видет, примамат мерат, максома редакцияв ответ. Кие-бди частонь петихнень оцюняснонды пачфтезе, што шабрань кудса эряй мокшень содаф писатель. Кода азонкшнезе сонць Илья Максимович, састь пялонза эняльдема мархта. Корхтамась ушедсь тяфта:
—Слышали, дедуль, вы по-мордовски хорошо шарите.
—Шарю и неплохо. А что надо-то?
—Какой-то негодяй про нас в «Мокшень правду» написал. Поможете перевести?
—Конечно, помогу.
Илья Максимович ётафтозе рузкс эсь сёрматфонц.
—Ашесть вешенде автор частонь петихне?—кизефтине Илья Максимовичень.
—Аш, ашесть вешенде. Согласиндасть тяштьфозень мархта. Примасть мерат, макссть ответ редакцияв.
Тя ульсь кунара ни. А тяни моли 24-це кизось, кода аш мархтонк кельгома ялганьке, мокшэрзянь литературань классиксь И.М.Девин. Сон нолдась пяк кувака юрхт мокшэрзянь литературав. Нолдась книгат и мокшень, и рузонь кяльса. А мзяра произведенияц лиссь марстонь сборникнень эса, «Мокша» журналса, «Мокшень правдаса». Лама работада лемдсь кялень, литературань, культурань кизефксненди. Лувсайть сёрматфонзон лемснон и сембось арай эсь вастозонза. «Кода эрятада, меля нолдаф книгат?», «Критикась няфни кит литературати», «Эряви ли поэтти «рифмарь?», «Папказе, мамказе, мон и Чехов Антон», «Рахайхне и рахафтыхне» и стак тов. Илья Максимович фалу ащесь кялень арушить инкса, тюрсь сятнень каршес, конат мокшень кяльть шорсезь рузоннеть мархта, сувафнесть од, лувити аф шарьхкодеви валхт. Народнай поэтсь аф весть макссесь кой-кона авторхненди кизефкс: «А мезенди тя эряви? Кяленьке тяфтавок мазыдонга мазы». Мархтонза спорсесть, аф сембе согласиндакшнесть.
Эстонь кизотнень лисендсь лама книгада мокшень кяльса. Сембе ли отвечасть пингть вешфксонзонды, мусть ли ки лувити? Тянь квалма шназь и пичедезь сёрмады эсь работанзон эса И.М.Девин. Сонь койсонза, кой-кона произведениятнень лангса нинге работамаль и работамаль. Тя критикась пяк лездсь сёрмадыхненди. Сембе замечаниятне сявондевсть мяльс, нолявсть тевс. Од книгань, произведениянь сёрмадомста Илья Максимовичень замечаниянза васенце вастсотольхть. Од и нльне сире писательхне шарьхкотькшнезь, што сон кальдяв аф арьси, лезды теест касомс, сёрмадомс интереснай и сяда крхка произведеният.
Кода ни азыне, мекольдень пингть И.М.Девинонь колга кржа работада лисенди периодическяй изданиятнень эса. Но мзярда сонць шисоль, васенце кизотнень куломдонза меле кие аньцек ашезе ванонда Народнай поэтоньконь творчестванц: содаф учёнайхть, писательхть, журналистт, учительхть. Сембе синь макссть оцю питне сёрматфонзонды. А «Нардише» романоц сувась мокшэрзянь литератураса классикать ёткс. Сембе учёнайхнень, тяштихнень лемсна аф лятфтавихть. Аньцек лятфтасаськ А.В.Алёшкинонь, Н.И.Черапкинонь, Е.И.Черновонь, В.В.Горбуновонь, С.А.Самошкинонь лемснон и эстокиге шарьхкодьсаськ, кодама серень поэтоль И.М.Девин. Сембе ня ученайхне аф тифтень работа сёрмадсть колганза. Макссть пяк оцю питне. А тейнек, тяниень эряйхненди, эрявихть поладомс синь ушеткссна, тевсна. Илья Максимович—классик. И тянь мархта азф сембось.
Илья ВЕШКИН,
Россиянь Писателень
 союзонь член.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022