Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Спорт

Илья ЛЯХМАНОВ: «СПОРТФТОМА АФ ШАРЬХКОДЬСА ЭРЯФОЗЕНЬ»

23 февральста сявомок 28 февральти молемс Пермскяй крайса ётафтовсь Тялонь Всероссийскяй VII Универсиадась. Турнирса примасть участия командат Россиянь 23 регионцта. Команднай зачётса М.Е.Евсевьевонь лемса МГПУ-нь биатлонисттне сявозь омбоце вастть. Командати сувсесть кота ломатть: Софья Акимова, Диана Гуркина, Анна Кунаева, Кирилл Ануфриев, Ярослав Конкин, Илья Ляхманов.

 

Ня шитнень корреспондентоньке васетькшнесь тя командань фкя участникть, Россиянь спортонь мастерть, Всероссийскяй лама соревнованиянь победительть, призерть, биатлонистть Илья Ляхмановонь мархта. Илья азондозе, кода ётась пялькстомась и кода эряфоц сотовсь спортть мархта.

 

«Индивидуальнай гонкать ётайне пяк лац. Сон ульсь инь цебярсь спортивнай марнек карьерасон,—азозе Илья.—Можналь путомс нинге сяда лама вий, эста васенце вастське сатоволь, но тренерозе соревнованияда инголе мярьгсь ванфтомс вийхнень мекольце кафта оцю этапненди».

 

Тя тяфта. Ашесть кенере спортсменоньке самс Пермскяй крайста, колма шида меле срхкасть соревнованияс Тюменскяй области. Тоса, Уват велеса, 6-13 мартста ётафтовсь Россиянь первенствань нинге фкя этапсь, конань итогонзон коряс кочкафтольхть спортсметт Россиянь сборнайти. Мордовияста тя пялькстомаса пряснон няфтезь кафта спортсметтне—Илья Ляхманов и Евгений Полухин, конат тонафнихть М.Е.Евсевьевонь лемса МГПУ-са.

 

Тяда меле, 14-20 мартста, Ханты-Мансийскяйса ётафтовихть оцю пялькстомат, конатнень мархта аделави сезонць.

 

«Сембода стака кармай Ханты-Мансийскяйса. Тоса пецек-пецек улихть кафта гонкат»,—азозе Илья.

 

Сембоц тя сезонца цёрась пялькстсь 25 гонкаса.

 

«Алязе путомань сокс лангс, мзярда тейне ульсь колма кизонят. Минь эрь ёткшиня и недляшиня якаме Зелёнай рощав. Тянемс лятфнеса, кода алязе соксса тушендсь инголи, а мон лядондонь эздонза, эняльтькшнень учемс монь, а тяни вов сон ваны лангозон и кеняртькшни монь сатфксоненди»,—мярьгсь Илья Ляхманов.

 

Васендакиге Алексей Александрович ёразе максомс цёранц футболс, но тренерхне мярьгсть, што Ильянди эряви сотомс эряфонц спортонь лия вид мархта. А кудса фалу ульсть сокст, сяс ламос арьсекшнемс ашезь сав.

 

Пара валса Мордовиянь спортсменць лятфнесы васенце тренеронц Татьяна Анатольевна Клюевать, конань воспитанниконза тянемс няфнихть цебярь результатт. Татьяна Анатольевна пяк пичеди учениконц инкса, ванондсыне юниоронь сембе старттнень, конатнень эса сон примси участия.

 

Илья Ляхманов профессиональнай биатлонть мархта сотозе эряфонц нинге 2011 кизоня, мзярда васенцеда сась Лыжно-биатлоннай центрав. И колма кизода меле няфтсь ни цебярь результатт. Сезонть мекольце пялькссонза кафксть сяськсь сембе спортсметтнень ёткса общай зачётса. Ильянь эстокиге сявозь Мордовиянь сборнайти. Кизоста кизос полафнесть тренеронза, марнек эздост ульсь вете. Полафтсь и сборнайсь. 2018 кизоня Илья ётась Россиянь сборнайти. И фкя пингть выступандакшнесь кафта сборнайхнень инкса: Мордовияннеть и Россияннеть. Тя ульсь стака, эрявсь фкя сборхнень эзда, конат мольсть кафта кофт, эстокиге тушендомс омбоцетненди. Ушедсть прябалат шумбрашинц мархта. Илья и тренероц шарьхкодезь, што мезендивок цебяренди тя аф вяти. Эрявсь кочкамс фкять. Тяфта Илья сась меки Мордовиянь сборнайти, коса тянемс сатни призовой вастт, мезенкса сон казьф медальса, а эздост ведьгемоньда лама, и кубкаса. А ёфси аф кунара Ярославскяй областень Рыбинск ошса биатлонть коряс Всероссийскяй пялькстомаса Илья сатозе колмоце вастть, а Саранскяйса Россиянь первенстваса—омбоце вастть.

 

И.Ляхманов аделазе Саранск ошень 19№ гимназиять. Пара мяльса лятфнесы родной кялень учителенц М.Н.Мироновать, кона вятсь мокшень кялень урокт 6 классти молемс. Марина Николаевна фалу корхнесь мархтонза мокшекс, аноклакшнезе олимпиадас. Ильянь валонзон коряс, теенза ульсь аф тёждя школаса мекольце кизотнень, мзярда эрявсь анокламс экзаметтненди, якамс тренировкас, пялькстомас. Кота шит недяляти, тренировкада меле, Илья тонафнесь предметонь репетиторхнень мархта.

 

Школать аделамдонза меле цёрась поступась М.Е.Евсевьевонь лемса МГПИ-в физическяй культурань факультету (тяни сон МГПУ). «Тяса ламода сяда тёждя, сяс мес пцтай сембе преподавательхне ингольдень спортсметт, шарьхкоттядязь. Кой-коста сборхнень инкса тялонь сессиятьке сашендовсь макссемс сяда  меле. Якан тренировкас кота шит недяляти 2-2,5 частонь. Тя кда стакши. А кда сборхт, эста и сяда лама пинге ётафтат. Улендсь, кемонь шитнень эзда фкявок ши ашеме ваймосе»,—азонды Илья. Ётка пингтонза цёрать аф лама, но сон ётафнесы тя пингть аф стак ащезь, старандай якамс кинос, лувондомс книгат, васетькшнемс ялганзон мархта, лездомс кудъёткса тядянцты-алянцты, кизонда тиендемс тефт переняса.

 

Койсонза, эряви лацкас ваймафтомс прять спортть эзда, эста ули сяда тёждя ару мяль-арьсема мархта меки кярьмодемс тренировкас и сатнемс васенце васттнень.

 

Илья сидеста уленди щаванц ширеса Кадошкинскяй райононь Пою велеса, коса шачсь-кассь сонь тядяц Елена Ивановна. Идькс пингста кизонь кофнень цёранясь ётафнезень тоса, сяс пяк лямбот лятфнеманза тя вастть колга. «Щавазе сяда сидеста гайфни тядязти, кизефнесы, кодапт результатоне, кода маряса прязень. Пяк лажаткшнян  теенза»,—оцю кельгома мархта корхтай Илья.

 

Сембе од ломаттнень Илья тернесыне сяда лама пинге макссемс эсь пряцень лангса работамати. Эряви ащемс каршек семботи, мезсь лафчепнесы шумбрашить: курендамать, сяпиняда симомать. Фалу улема дисциплинированнайкс, эрьгавкс. «Аф шарьхкодьсайне ялганень, од цёратнень, конатненди аф шавови эсксь, аф тиеви  мезевок кудъётконь тевса. А спортть мархта и ронгсь, и прясь работайхть ёфси лиякс. Спортфтома аф шарьхкодьса эряфозень...»,—мярьгсь Мордовиянь биатлонистсь Илья Ляхманов.

 

О.БЕЛКИНА.

 


17.03.2022 №10
 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин