Любовь ЛЯШИНА: «КЕЛЬГОМА ТЕВДОН ЛАМА И ЭРТИ МУШЕНДАН ПИНГЕ»

Эрь кизоня Н.П.Огарёвонь лемса Мордовскяй          госуниверситетонь филологическяй факультетcа ётафневи родной кяльть и литературать коряс Межрегиональнай олимпиада, коса няфнесазь эсь содамошиснон школаса тонафнихне. Тяддевок, 24 и 25 февральста, Саранскяи пуромкшнесть инь асу од ломаттне Мордовиянь райоттнень, а стане жа  Оренбургскяй, Самарскяй, Пензенскяй, Ульяновскяй областтнень эзда и Татарстанцта.

Кяльть и литературать коряс пялькстомада башка, Межрегиональнай олимпиадать видеса уленди нинге творческяй секция. Эсонза маштомошиснон няфтезь Сире Шайгавста, Навлейста, Булдыгаста и Крхтажста мокшень стирнятне. Синь морафтозь эсь стихснон, азксснон, очеркснон. Азондсть сянь колга, кода велесост ванфтовихть кяленьке и коеньке-обуцяньке.

Васенце вастть творческяй секцияса тядде сатозе Зубово-Полянскяй райононь Булдыга велень школань 11-це классонь тонафнись Любовь Ляшина. Эсь творческяй работанц, а стане жа «Ванфтсаськ     мокш-эрзянь культураньконь»       видеопрезентациянц конкурсанткати лездсь анокламс Булдыгань средняй школань мокшень кялень и мокшэрзянь литературань учительсь Татьяна Ефремовна Ляшина.

«Люба Ляшинась аф васенце кизось примси участия олимпиадаса. Азксонза и очерконза сяшкава токайхть седи, мянь сельмоветтне туйхть. Тяшти шачема ширеть, ломанень эряфть колга. Лац содасы родной кяленц. Тядде стирсь шумордасы школать и улель пяк пара, кда сяда тов поладолезе тонафнеманц Н.П.Огарёвонь лемса Мордовскяй госуниверситетса, кепотьксонди, «Журналистика» отделенияса. Любати вийс коре улель работамс и телевиденияса, и радиоса, и газетаса»,—мярьгсь мокшень поэтсь Марина Стешина, кона макссесь оценка творческяй секцияса пялькстыхненди.

Саранскяйса ётафтови олимпиадада инголе,  школьнай и муниципальнай этапне ётафтовсть Мордовиянь райоттнень эса. Эсост мокшень стирсь Люба Ляшина аф васенце кизось няфни цебярь результатт и ётни Межрегиональнай этапти. 9 класса тонафнемста  сяськсь творческяй секцияса и арась 2 степенень призёркс родной (мокшень) литературань секцияса. 10 класса тонафнемста родной (мокшень) кяльть и литературать коряс секциятнень эса сатозе омбоце вастть. А тядде Люба сявозе васенце вастть творческяй секцияса, омбоце  вастть родной (мокшень) литературань секцияса и колмоце вастть родной (мокшень) кялень секцияса.

Васенце произведениянц Люба сёрмадозе, мзярда тонафнесь 9 класса. Стирсь виденцясь, што сяда кельгсы сёрмадоманц мала ломанензон колга. Тяфта, кядялдонза лиссть «Стака лятфнемат» сире щятянц квалма азкссь, «Монь щавазе» азкссь, конань мархта и сяськсь творческяй секцияса. Тяда башка, «Якстерь тяштеня» журналса лисендсть «Мон мокшан» и лия стихотворениянза.

Люба кассь семьяса, коса илань, коень-обуцянь, культурань ванфтомась ащи башка вастса. Школаса мокшень кялень и мокшэрзянь литературань учительсь Татьяна Ефремовна—тядяц. Сон и аноклазе стирть олимпиадатненди.

Люба курок аделасы 11 классть, эряви кочкамс сяда товолдонь ки, арьсемс, мезть мархта сотсы марнек эряфонц. «Школать аделамда меле мялезе  тонафнемс врачекс. Арьсян поладомс врачень династияньконь: сире щятязе  военнай санинструктороль, щавазень сазороц—идень медсестраль, аказе медсестра. Семьясонк кельгсазь тя профессиять»,—азозе мокшень стирсь.

Мекольце классь фалу инь стакась. Эряви лац максомс экзаметтнень, кочкамс сяда лама балл и поступамс, коза мяльце. Но Люба мушенды ётка пинге кельгома тевонзондывок: лувонды книгат, сембода мялезонза К.Г.Абрамовонь «Пургаз» романоц, рисовандай картинат, кодай варягат, носокт, сёрмады сюреса, кочкай картинат пазласта. Но сембода пяк кельгсы кштиманц-мораманц. Стирсь азозе: «Кельгома тевдон лама и эрти мушендан пинге».

О.Белкина.