Ольга КУГАППИ: «КАТК БИБЛИЯНЬ ЛУВОМАСЬ АРАЙ ЦЕБЯРЬ КОЙКС ТИНЬ ЭРЯФСОНТ!»

Библиясь—масторлангса лама кяльс инь ётафневи книгатнень эзда фкясь. Финно-угрань кяльхненди ётафтоманц лангса покоди Финляндиянь Хельсинки ошса Библиянь ётафтомань институтсь.

Мокшекс Библиять ётафнемонза ушедсть 19 векть омбоце пялестонза. Ся пингоня лиссть Матфеень эзда Евангелиясь (1879 к.), Лукань эзда Евангелиясь (1891 к.) и Иоаннонь эзда Евангелиясь (1901 к.). Тяда меле мокшень кяльсь ламода полафтовсь, сяс эрявсь ушедомс Библиять одукс ётафтомац тяниень мокшень кяльса. 1990 кизотнень васенцекс тя тевти кярьмодсь Валентина Ивановна Мишанина. Сон ётафтозень Идень Библиять, Лукань эзда Евангелиять, Апостолонь тефнень и Павелонь кой-кона сёрманзон. Сондедонза башка тя тевса оцю путкссна О.Е.Поляковонь, А.Н.Келинать, А.П.Феоктистовонь и лиятнень. Тяфта, марстонь вийса 2016 кизоня лиссь мокшень кяльса Од Соткссь, коза аф кржа вий путсь и мокшень стирсь Ольга Кугаппи.

Тячиень шити ётафтф марнек Од Соткссь и Ташта Сотксть кой-кона книганза. 2020 кизоня мокшень кяльса лиссть Ташта Сотксть кафта книганза: Моисеень васенце книгац «Ушедомась» («Бытие») и Моисеень омбоце книгац «Лисемась» («Исход»). 2021 кизоня лиссть «Соломононь валмуворксонза» («Премудрости Соломона») книгась. Тяниень пингть ётафтыхть Псалматнень эса.

Шкаень валть ётафтоманц лангса работай аф фкя ломань. Но тевть ламошканц вятьсы мокшень стирсь Ольга Кугаппи. Сон шачемас коре Ковылкинскяй районцта. Тонафнесь Н.П.Огарёвонь лемса МГУ-нь филологическяй факультетса, аделазе мокшень кялень отделениять. Аф фкя киза ни эряй Ленинградскяй областьса. Шкаень валть мархта эряфоц сотовсь нинге университетса тонафнемста. Дипломнай работанц лемоцоль «Абстрактные существительные в Евангелии от Иоанна на мокшанском языке». Мзярда тонафнесь филологическяй факультетса, теенза пшкядсть лездомс Библиять тестировандамаса. Тестированиясь—тя мзярда ётафтф тексттнень          макссазь лувомс ломаттненди и ванцазь, кода теест шарьхкодеви. Улема, ся пингста и шарфтсть мяль Ольгать лангс, шарьхкодезь, што стирсь аф кальдявста содасы мокшень кяльть.

Тестировандамать вельде монга содафтонь Ольга Кугаппить мархта. Сон гайфтсь тейне и кизефтемань, ули-аш мялезе примамс участия текстть ваномаса.

Тячи сон отвечай кизефксоньконь лангс.

—Ольга, Библиять ётафтомац—тя аф тёждя тев. Кодамотольхть мяльхне-арьсематне, мзярда тейть пшкядсть лездомс сонь ётафтомасонза?

—Мзярда лездонь текстть тестировандамаса, прясон ашель мяль, што пингонь ётазь карман работама тя тевса. Конешна, Библиять эсь родной кялезт ётафтомац—стака и ответственнай тев.

—Кодама пяльксова явови ётафтомань тевсь?

—Васенцесь, штоба ушедомс текстть ётафтома, эряви пяк лац сонь шарьхкодемс. Сяльде аноклави текстть черновой вариантоц. Сонь ванцазь ётафтомань группань лия участникне, васенцекс, богословскяй редакторсь, кона лезды ётафтомс текстса стака или аф шарьхкодевикс васттнень. Сяльде текстть ванцы 2-3 ломань, конат лац содасазь мокшень кяльть. Синь вельдест содави, шарьхкодеви-аф ётафтфсь лувихненди. Тяда меле текстть ванцазь лингвисттне и лия специалисттне, конат работайхть Библиять мархта. И сяльде тага весть текстсь максови мокшень кяльса корхтайхненди. Аньцек ётамок сембе ня пялькснень, Библиянь текстсь ётай филологическяй нинге фкя редакция и аноклави печатти. Тя тевсь аф тёждя и курокста аф тиеви, но пяк мялень салай.

—Церькавсь макссь бславама Библиять ётафтоманкса?

—Васендакиге Россиянь народонь кяльхненди Библиянь ётафтомань тевть эсь пингстонза бславазе Москувонь и сембе русень Патриархсь Алексий II. Тяфта жа бславама макссь Мордовскяй Митрополитсь Варсонофий. Мзярда анокламе Од Сотксть эса, ётафтыень группаньке васетькшнесь Краснослободскяй и Темниковскяй Епископть Климентонь мархта, кона ванозе  тевоньконь и  стане жа макссь бславама. Мокшень кяльса Од Соткссь получазе Рузонь Православнай Церькавть Издательскяй Советонц грифонц.

—Мес Библиять финно-угрань кяльхненди ётафтоманц вятьсы Финляндиясь?

—Васенцекс, койсон, Финляндияста специалисттненди ламода сяда тёждя шарьхкодемс финно-угрань кяльхнень структураснон. Шарьхкотьф,  грамматиканьке пяк малат, сяс мес нят радня кяльхть. Москуса тяфта жа ули Библиянь ётафтомань институт, кона работай аф славянскяй кяльхнень мархта. Москувонь и Финляндиянь Библиянь ётафтомань институттне кирдихть кеме соткст фкя-фкянь ёткса. Синь фкя вешфкссна—штоба сембе нароттнень улель Шкаень Валсна.

—Финно-угрань кяльхненди Библиянь ётафтомань институтсь Хельсинки ошса. Улема, тейть сидеста сашендови  корхнемс фиттнень мархта. Содасак финнонь кяльть?

—Ламоть шарьхкодьса. Финнонь кяльть тонафнине университетса. Санкт-Петербург ошса якань финнонь кялень курсс.

—Мезсь,  койсот, сембода стака тя тевса?

—Библиянь ётафтомань тевса сембода стакат культурнай аф фкя лацонь шитне. Кепотьксонди, Книгаса улихть тяфтама термитт, конат тяниень пингть ёфси ашет. Сашендови арьсекшнемс од валхт. Тя стакашитненди старандатама  макссемс ссылкат. Религиознай текстонь ётафтомась—тя ёфси аф тёждя.

—Ольга, мезть лангса работат тяни?

—Ётай кизоть лиссь печатьста «Соломононь валмуворксонза»—Ташта Сотксста нинге фкя книгась. Соломонць—тя Израилень оцязор, пяк смузю ломань. Книгась ащи нюрьхкяня крхка тонафтомаста, конат, васендакиге, лемтьфт од ломаттненди. Синь тонафтыхть ужяльдемс ашуфнень, кельгомс вракнень, азондомс видешить  и стак тов. А тяни минь ётафтыень команданьконь мархта работатама Псалтырть лангса. Ташта Сотксти сувси 39 книга, сяс тевда нинге лама.

—Мордовияса ули кода мумс Библия мокшень кяльса?

—Од Соткссь и ташта Сотксонь книгатне кунара ни  пачфтьфт Мордовияв. Мзярошка экземпляр ули Рузонь Православнай Церькавса. Тяда башка, синь улихть Саранскяйса «Вельмема» лютеранскяй приходса, А.С.Пушкинонь лемса Национальнай библиотекаса и Научно-исследовательскяй институтса.  Меля  пачфтень экземплярхт Мордовиянь райоттненди. Сяс мокшень кяльса Шкаень валть мумс аф стака. Тяда башка, Библиять версияц ули  электроннай вариантса. Теенть эряви мумс Google play-ста  «Новый Завет на мордовском-мокша языке» приложениять. Тоса ули кода лувомс, тиендемс заметкат и нльне кулхцондомс аудиокнига лаца. Тяфта же «ВКонтакте» соцсетьса вятян «Библияста лувомат эрь шинди|Библиясь мокшекс» группа, коза путнян Евангелияста оф оцю сёрматфт.

—Сюкпря, Ольга! Монга примань аф оцю участия Библиять ётафтомасонза, лувондыне сонь. Азса, тяфта, мокшень кяльса Шкаень Валсь лувови тёждяста, сембось шарьхкодеви. А кда кой-кона валхне и стакат, теест максови сноска. Койсон, эряви ётафтомс Библиять сембе народонь кяльхненди, и лувомс масторлангса инь главнай книгать родной кяльса.

О.Белкина.