Сергей ЛАЗАРЕВ: «КЕНЯРДЯН, МЕС ЭРЯФОНЬ КИЗЕ ПАЧФТЕМАНЬ МОРДОВИЯВ»

2021 кизонь сентябрсь. Минь, «Мокшень правда» и «Эрзянь правда» газетатнень коллективсна, саме Саранскяйса Республикань Куду пяк оцю и кеняртьфти туфталонкса—тяса ётафтовсь газетатнень 100 кизоснонды лемтьф торжественнай пуромкс, конань пингста славнай тя юбилееньконь мархта поздравляндасамазь Мордовия Республикань Оцюнясь А.А.Здунов. И вов казнетнень получамдост меле аф оцю концерт няфтсь «Умарина» моронь и кштимань Государственнай ансамбльсь. Ванонь морай и кштий артисттнень лангс и тя ёткть бта кфчядсь мезе-бди мялямсон: морайхнень эзда фкясь афоли Татарстанонь мокшень цёрась Сергей Лазарев, конань мархта арань содафокс 2018 кизоня Краснослободскяй районца ётафтф «Эряк, родной кяль!» этнолагерьса. Эста сон морась морот, тяконь лувксса и мокшень кяльса, Саранскяйста саф инжихнень инголе. И тиезе тянь аш ни кода седи ваксста. Лядсь мялямозон мокшень цёранясь, а тяни, несколька кизода меле, няине сонь «Умарина» Государственнай ансамбльть участниконзон ёткста! Кода тяза пачфтезе эряфонь киц? Тянь колга азондсь сонць Сергей Лазарев.

Шачемас коре мокшень цёрась  Татарстан Республикань Тетюши ошста. Виде, меле семьяц ётась эряма Ульяновскяи. Тоса Сергей ушедсь тонафнема школаса, башка мяль шарфнесь музыкати. Оцю мяльса примсесь участия школаса ётафневи пуромкснень эса, сембода пяк сятнень, конат сотфтольхть шачема ширеть культуранц, народть историянц мархта.

Тядяц, Алёна Викторовна, няезе, што цёрац кельгсы музыкать, кирдезе ширенц, лезнесь теенза и 2013 кизоня Сергей Лазарев поступась тонафнема Саранскяень Идень музыкальнай школав-интернату. Тянемс мокшень цёрась азонды спасибамань валхт баянонь классть коряс преподавателенцты Александр Николаевич Гурьяновонди. Сергей ушедсь шарьхкодемонза музыкать сяда крхкаста, марямонза седиса-ваймоса.

Ламоц конкурснень эса участиянь примсеманкса и эсост сяськикс и призёркс лисендеманкса, 2015 кизоня мокшень цёраняти васенцеда максфоль путёвка «Эряк, родной кяль!» этнолагери.

«Тя лагерьса улендень эрь кизоня, сотцень лама мезе одня. Тоса сяда лац тонадыне мокшень кяльть.  Ширезонк сашенкшнесь лама инжи, эрь васедемась ётнесь мялень салайста. Мархтонк ётафнесть мастер-класст, декоративно-прикладной творчествать коряс занятият. Тя сембось кемокснезень этнолагерень участникнень ёткса ялгаксшинь соткснень. Эрь сменать песта ужяль улендсь явомс фкя-фкянь мархта»,—лятфни Сергей Лазарев.

Мороти кельгомась пачфтезе цёрать Мордовияв—Саранскяи. «Вов кулхцонтт тяфтама мора»,—сидеста корхнесь теенза тядяц Алёна Викторовна. «Кульсак, уноконяй, конашкава мазыста     морайхть              артисттне телевизорса»,—сидеста мярьгондсь щавац Надежда Филипповна. И Сергей шарьхкотькшнезе, што аньцек кулхцондомс мороть—кржа, сонь эряви крхкаста тонафнемс.

Саранскяйса музыкальнай школать-интернатть шумордамдонза меле поступась Л.П.Кирюковонь лемса Музыкальнай училищав духовой инструментонь отделенияв. Но, тонафнемок аф ламос, Сергей ётась Н.П.Огарёвонь лемса Мордовскяй государственнай университетонь Национальнай культурань институтть «Сольное и хоровое народное пение» специальностезонза (средняй профессиональнай образованиясь).

Тяни сон тонафни нилеце (мекольце) курсса. Тяддень июньцта выпускникнень учсазь экзаметтне, оцю концертсь, конань эса синь няфтьсазь эсь маштомошиснон.

«Верондада, эряфса пяшкотькшневи ся, мезень колга пяк и пяк арьсетяда»,—азозе С.В.Лазарев, мзярда кизефтине сонь «Умаринаса» работанц колга.

Инголи сон сашендсь ансамбльть концертонзонды кода ваны, пяк кельгозень выступлениянзон, таколдомать эзда трнаты кядьса снимандакшнезень синь телефонозонза и арьсесь, што повомс работама тя коллективти—инь оцю павазсь.

Но, кода корхнихть, кивок эздонк аф содасы, мезе учсамазь ванды. Сергей Владимирович ётазень прослушиваниять, собеседованиять и сонь сявозь работама «Умаринав». С.В.Лазаревонди васенда ульсь пелькс. Сон, простой цёрась, кармай морсема содаф тя коллективса! Кали пяшкодевсть идькс пингонь мяленза-арьсеманза?! Пяшкодевсть! Сон—хоронь артист!

«Мзярда ёмлалень, ашень арьсекшне, што, касомок,  саян Мордовияв, карман тяса тонафнема, мокшэрзянь моронь морсема, а тяни шарьхкодьса—эряви аф аньцек арьсемс мезень-бди колга, но и виень аф ужяльдезь молемс тянди»,—мярьгсь мокшень цёрась.

С.В.Лазарев тонафни Национальнай культурань институтса, работай «Умаринаса», а нинге сон—Зыкова велень Культурань кудса «Веснянка» народнай вокалонь студиянь руководитель. Иттнень мархта тонафнесазь народнай моротнень,    народнай            инструменттнень. Ёфси аф кунара, мартста, ётафтовсь конкурс, конань эса «Веснянка» студиясь сатозе васенце вастть. Сергей Владимирович ульсь  аккомпаниаторкс, а шабатне нолязь тевс куцюфнень, бубенть, трещёткатнень.

Мокшень цёрась маряй кенярдема, мес эряфонь киц пачфтезе Мордовияв. Сон ёрай мрдамс тяза армияда меле, поладомс работанц «Умаринаса», лядомс эряма Мордовияв и, конешна, мумс удалаф мокшаваня!

Т.Альшина.