КАТК ФАЛУ КАЙГИХТЬ «КЕЛУТЬ» МОРОНЗА!

19 апрельста топодель сяда киза мокшэрзянь содаф композиторти, музыковедти, фольклористти Георгий Иванович Сураевонди-Королёвонди.

Старошайговскяй райононь Кулдым мокшень велень асу цёрась кассь тядянц моронзон кулхцонкшнезь и меле, получамок профессиональнай образования, лама киза лемдсь мокшэрзянь фольклорть кочкаманцты-тонафнеманцты. Пуроптф содамошитнень мяльса кирдезь, Георгий Иванович сонць   тяшнесь музыка    театральнай постановкатненди, вокальнай и инструментальнай произведеният, сочиненият хоронди и симфоническяй оркестранди. Но инь оцюсь, инь содафсь сонь тевонзон-работанзон ёткста—тя «Келу» фольклорнай ансамбльсь, конань Сураев-Королёв пуроптозе 1963 кизоня. Мархтонза сон ётазе марнек Советскяй Союзть. «Мордовиять музыкальнай визитнай карточкац»—тяфта вов ни лама киза лемневи «Келу» ансамбльсь. И тя аф стак. Коллективсь кода инголи, стане и тяни ванфнесы национальнай музыкальнай культурать, мокшэрзянь лама вайгяльса морамать.

Ансамбльть пуроптыенц, Г.И.Сураевонь-Королёвонь юбилеенц карша коллективсь аноклась «Поющая душа народа» лем ала концертнай программа, кона няфтьфоль 7 апрельста Культурань  республиканскяй  Дворецть сценанц лангса.

Концертть пингста кайгсть народнай моротнень обработкасна, конатнень тиезень Георгий Иванович—«Сур велесь», «Вирь чиресэ», «Келу», «Во поле туман», «Кавта цёрат тикше ледить» и сонь авторскяй произведениянза «Баллада о Михаиле Девятаеве»,  «Над сурой-рекой», «Чуди лейнесь Инелей»; «Сельская улица» и «Роман Аксясь» вокально-хореографическяй сюитатне.

Кодама мазыхть и крхка смузь мархтот сире пингонь мокшень и эрзянь моротне! Тянь тага весть савсь шарьхкодемс «Келуть» концертонц пингста. Эрь морось бта мрдафни атянь-бабань эряфти, лятфнесыне кунардонь койхнень-обуцятнень. Ансамбльть эсь лацонь ширец—лама вайгяльса морамась. Музыкаса шарьхкодихненди содаф, кодама аф тёждя морамс тя или тона произведениять фкя пингста лама вайгяльса. Но «Келунь» артисткатне сафнесазь. Тя мезтьке коллективсь няфтсь оцю маштомоши кода морамаса, стане и сцена лангса прянь вятемаса.

«Келусь»—тя афкуксонь панчфкя марнек Россиянь культураса. Ансамбльсь эсь творчестванц мархта аф аньцек содафни мокшень и эрзянь моротнень мархта, сон лезни марямс шачема-касома кяльть таньфканц»,—мярьгсь РФ-нь Федерациянь Советонь сенаторсь Пётр Тултаев, кона сашендсь «Келуть» концертонц ванома.

Пётр Николаевич китькстазе, што мокшэрзянь культурать, кяльхнень ванфтомаснонды ансамбльть путксоц пяк оцю. Арьсесь коллективти творческяй од сатфкст, а артисттненди—шумбраши и паваз. Ансамбльса эрь морсись получась Пётр Николаевичень кядьста панчфонь пусма.

Концертса стане жа ульсь Мордовскяй (мокшень и эрзянь) народть Межрегиональнай общественнай организациянц председателец Юрий Мишанин. Юрий Александрович азсь спасибамань валхт коллективти мялень салай, седиень эжди, козя творчестваснон инкса. Мярьгсь, кле, «Келусь» достойнайста мольфтьсы «алянц»—Георгий Иванович Сураевонь-Королёвонь мархта ушетф тевть, кородозь ванфнесыне аф аньцек мокшэрзянь моротнень, но и сембе минценнеть. Азозе и сянь, што работас коре теенза сидеста сашендови улендемс лия региоттнень эса, сяс лац содасы—«Келуть» кельгсазь аф аньцек Мордовияса, сон учендови инжи странань эрь кодама уженяса.

Мордовскяй (мокшень и эрзянь) народть Межрегиональнай общественнай организациянц  эзда «Келу» фольклорнай ансамбльсь казьф Благодарностьса.

О.ЕВДОКИМОВА.