ЩАМОНЬ СТАМАСА САФТСЫ МОКШАВАСЬ М.В.МАРШАКОВА

Ламоц лувиеньконди кельговсь ни «Мокшаваня» рубрикась. Эсонза азонттама ся мокшаватнень колга, конат салсихть мяль аф аньцек мазышиснон, но и удалаф тевснон мархта. Синь кельгсазь эсь шачема вастснон и родной кяльть. Сафтсазь сембоса, сембе ширде няфнесазь пряснон аньцек стане, што анокат синь шнамс и шнамс. Тячи азонттама нинге фкя удалаф мокшавать Мария Васильевна Маршаковать колга.

Сидеста уленди стане, што ков сяда ичкозе Мордовиять эзда эряй ломанць, тов сяда кемот сотксонза мокшень масторть мархта. Тянь ули кода азомс и Мариять колга. Сон эряй Москуса, но сидеста уленди тядянц и алянц шачема-касома уженясост—Зубово-Полянскяй районца. Тоза эрь кизоня сашендсь щаванц и бабанц ширес. Теенза тя уженясь—лия эряф, ваймонь козякофты лихтибря лаца. Сембось тяса салси мяль и шарьхкотьф мес. Москувонь шабатне вестевок ашезь няенде, кода пидемс пянакудса ярхцамбяль, кода якамс и ваномс жувататнень мельге, кода озафнемс и сяльде урядамс перет. Маша эрь кизоня учсь, мзярда тядянза-алянза сявсазь Велеземи, коса ули кода ярхцамс масторлангса инь танцти  пиже марьда.

«Щятязе морась гармошкаса и балалайкаса. Мялезон лядсь ся, кода сембе радняне корхтасть мокшекс, и аньцек мон рузкс. Аф содаса, мзярда ушедонь шарьхкодемонза родной кяльть, но бта содаса сонь эряфоньберьф»,—мярьгсь стирсь. Маша лувсы прянц мокшень ломанькс, лац содасы мокшень кяльть и тяряфни тонафнемс сонь нинге сяда крхкаста книга и валкс вельде. Эряфоц сяшкава кемоста сотовсь Мордовиять мархта, нльне рьвакс лиссь шабра велень цёранди.

Мария Васильевна—сембе ширде асу ломань. Тяфтапнень колга корхнихть, што синь сафтсазь сембоса. 11 киза тонафнесь кштиматненди, кельгсы морсеманц, тяшти стихт, рисовандай, фотографировандай. Тяниень пингть башка мяль шарфни английскяй кяльти.

«Кяльть тонафнемста лама шарьхкодят народть колга. Мзярда путсайть кяльхнень карань-каршек, шарьхкодьсак, мезьса малат и мезьса явихть нароттнень культурасна»,—азозе М.В.Маршакова.

Мокшавать ули тевоц, кона максси теенза пацят и эрь шиня вятьсы инголи, касфтсы профессиональнай ширде. Сонь профессияц—модельер-конструктор.

«Тя тевсь тусь мялезон нинге ёмласта улемстон. Лятфтаса, кода щаказе сташендсь тейне панархт. Тя сяшкава салсезе мялезень! Арьсень, тонадан, эста стаса эстейне семботь, мезть вешсы ваймозе, инь мазы панарть тиса эсь кядьсон и лавкава якамс аф эряви».

Мария Васильевна ушедсь стакшнема нинге школаса тонафнемста, а сяльде и кочказе тя тевть эстеенза профессиякс. Тяни работай модельеркс-конструкторкс оцю фабрикаса. компьютерса тиенди выкройкат, стай формат, конат ванфтсазь ломаттнень работама вастса зиянда и токавомада, лиякс мярьгомс, спецщапт. Фабрикаса сташендыхть формат сварщикненди, пожарнайхненди, электромонтёрхненди, вирень керыхненди. Тяфтама щапне аф ноляйхть электричества, аф начкихть и стак тов.

Но тянь лангс М.В.Маршаковать стамань маштомошинза аф шуморявихть. Мокшавась фалу вешенди мезевок одня. Тяряфни эсь кядьсонза нолдамс сянь, мезе ашезь сташенда тяда инголе. Ваймама шиста или мзярда мушенды ётка пинге, сташенды пальтат, джинсат, кофтат, пижамат, купальникт. Но сембода пяк кельгсы бальнай мазы платьянь стаманц. интернетса страницац пяшксе мазы панарда, конатнень сон сташендозень эстеенза, ялганзон, мала ломанензон выпускнойс, шачема шис или нинге кодамовок илас. Да мезе тоса илас.... Сон стась эстеенза рьвакс тумань щамбяль.

«Фалу ламос ащекшнян котфонь лавкаса, ванондса эрь тюсть. Кда срхкан мезевок стамс, аф удан веньберьф. Арьсеса, кодама кармай панарть пункстамац, кода стаса подкладкать, кода мазоптьсайне ожатнень. Стамать пингста семботь колга эряфса юкстаса. Афи маряса, сизень или аш»,—корхтай од дизайнерсь.

Мария Васильевна Маршаковать улихть ни сонцень коллекциянза, конатнень няфнезень Москуса подиумса. Тонафни сонць и тонафнесыне лиятнень, Моднай бизнесонь школаса вяти онлайн-курст кода наставник.

М.В.Маршаковать мокшень панароц и жилеткац лядсь щаванц эзда. Ужяль, сембе мазоптомбялензон щавац явондозень, арьсесь, козовок аф эрявкстыхть. Сяс, штоба аф ламода козякофтомс костюмть, Мария тядянц и щаканц мархта кочкасть каркс, руця, ожнат. Мокшавать мяльсонза арьсемс и стамс мокшень панар эстеенза. Ёрай тиемс сонь тяниень пингоннекс, народнай мотив мархта, моднайкс, конань щакшнелезь од ломаттне лисема вастс.

«Тейне максыхть вийхть творчествась и асу ломаттне. Касы мялезе, мзярда кулхцондан морот, лувондан стихт, ванондан мазы картинат. Асу ломаттне кельгсазь эряфть. А сембось, мезсь тиф тевонь кельги ломанень кядьса, эвондафни кенярдема лия ломаттнень эса»,—мярьгсь Мария Васильевна.

О.Белкина.