КЯШАЛСА ЁТАФТОВСТЬ 29-це МАЛЬКИНСКЯЙ ЛУВОМАТНЕ

Арась цебярь койкс эрь кизоня Атюрьевскяй райононь Кяшал велеса ётафнемс Малькинскяй лувомат, конат лемневихть мокшень содаф поэтти, Великай Отечественнай войнань ветеранти, СССР-нь Писателень союзонь членти А.С.Малькинонди. Тяддень 26 майста лувоматне ётафтовсть 29-цеда. Илас пуромкшнесь райононь лама содаф ломань, учительхть, ученикт.

29-це Малькинскяй лувоматне ушедсть Кяшалонь калмалангса, коса калмаф поэтсь и  коза эрь кизоня панчфонь путома, сюконяма сашендыхть содаф поэтть велеряенза, творчестванц кельгиенза. Тяддевок велень и райононь администрациятне путсть Александр Степановичень калмонц лангс каштаз, панчфт. Ульсь аф оцю митинг, конань панжезе Кяшал велень поселениянь оцюнясь П.Н.Лёвин.

—А.С.Малькинонь лац содазь минь родителеньке, атяньке-бабаньке,—мярьгсь  Пётр Николаевич.—Эсь пингстонза сон сидеста сашендсь Кяшалу, усксезень писатель ялганзон, васьфнесь школань коллективть, велеряензон мархта. Александр Степановичень лемонц мархта кайги и веленьконь лемоц. Марятама земляконьконь инкса оцю гордость. Сон ульсь и ляды тейнек прянь шнафтома вастокс.

Меле вал максфоль «Мокшень правдать» эсь корреспондентонцты И.П.Вешкинонди. Сон ульсь сембе Малькинскяй лувоматнень эса. Лятфтазе, што сай кизоть содаф земляконьконди топоди 100 киза. И ули колмогемонь киза, кода ушедсть ётафневома Малькинскяй лувоматне. Пингсь ётай афи фатят кода. Сяс содаф поэтть юбилеенцты аноклама ушедома тяникиге. Седиста моли лямбе валхт эсь содаф землякснон колга азсть педагогическяй трудонь ветеранць Н.Н.Трунькина, Кяшал велень поселениянь ингольдень оцюнясь В.Ф.Четыркин.

Тяда меле Малькинскяй лувоматне поладовсть Кяшал велень средняй общеобразовательнай школаса. Тонафнемань учреждениять инголе ащи поэтть бюстоц, конань тиезе содаф скульпторсь Н.Филатов. Школать стенаса ули лятфнемань плита. Сонь тиезе Москувонь скульпторсь Пётр Офта (Добаев). Тяза путфтольхть панчфт. Школань тонафнихне кшиса-салса васьфтезь инжихнень. Ученикне Людмила Автайкина, Виктория Дьякова, Олеся Егорова, Кристина Кузьмина, Анастасия Волгапкина, Юлия Тестова лувозь А.С.Малькинонь и Атюрьевскяй районца шачф-касф лия поэттнень стихснон. А работась мархтост мокшень кялень и мокшэрзянь литературань тонафтысна Н.Г.Панькина. Кайгсь Малькинскяй лувоматнень гимнасна, «Кяшал веленяй» морось, конань сёрмадозь мокшень содаф композиторсь Нина Кошелева и Илья Вешкин. Школань директорсь Т.В.Матькова азондозе илас сафненди, кодама мяль шарфневи А.С.Малькинонь творчестванцты тонафнемаса. Школаса ули музей, кона каннесы поэтть лемонц. Тя музейть эзга экскурсия ётафтсь историянь учительсь П.М.Шабайкин. Теенза лездсь школань ингольдень директорсь, педагогическяй трудонь ветеранць С.П.Девятаев.

Илань участникне васьфнесть школань ученикнень и учительхнень мархта. Малькинскяй лувоматнень вятисна И.П.Вешкин азозе, што 29 кизоста кодама аньцек содаф ломань ашезь сашенда Кяшалу. Ётксост поэтт, писательхть, учёнайхть, композиторхт, артистт, скульпторхт. Тя корхтамать поладозе Атюрьевскяй райононь оцюнять заместителец Н.С.Шаронов. Сон азозе:

—Малькинскяй лувоматнень эса мон васенцеда. Няеви, што тяса цебярьста ванфневи содаф поэтть творческяй наследияц. Тиф пяк лама. Но аф кржа нинге сави тиемс. Вдь сай кизоть А.С.Малькинонь 100 кизонь юбилеец. Илась эряви васьфтемс достойнайста.

В.Ф.Четыркин, кепотьксонди, шарфтсь мяль сянди, што пара улель полафтомс Малькинонь калмонц лангста памятникть. Сон путфоль нинге ётай веконь сизьгемонце кизотнень песта.

Цебярь презентация тись-няфтсь Атюрьевскяй райононь идень библиотекань заведующайсь Л.К.Вешкина. Сон азондозе и экранца няфтезе, кодама путкс путнихть библиотекаса покодихне А.С.Малькинонь литературнай наследиянц ванфтомаса.

Содаф землякснон колга лятфнесть педагогическяй трудонь ветераттне С.П.Девятаев, Н.Н.Трунькина, велень поселениянь ингольдень и тяниень оцюнятне В.Ф.Четыркин, П.Н.Лёвин. Велень клубонь заведующайсь М.Н.Алямкина моразе А.С.Малькинонь «Акша сёрал» моронц. С.П.Девятаев лятфтазе, што Малькинонь куломдонза меле Кяшалу сидеста сашендсть содаф писательхть. Синь тушендозень поэтть цебярь ялгац И.М.Девин. Сон и лувондови Малькинскяй лувоматненди ушедыкс. А Н.Н.Трунькинать аляц, Н.П.Чепайкин, войнань ветеранць, цебярь ялгаль поэтти. Александр Степанович сидеста сашендсь ширезост, куватьс корхнекшнесть войнать, бойса шавф ялгаснон, велеряйснон колга.

Сяльде Малькинскяй лувоматне поладовсть Кяшал велень библиотекаса. М.Н.Алямкина, В.В.Поршина моразь А.С.Малькинонь моронзон. Райононь оцюнять заместителец Н.С.Шаронов ванозе и ся кудть, коса эрясть мекольдень кизотнень поэтть тядяц, брадоц Василий Степанович, тяза лотксель сонць поэтсь. 29-це Малькинскяй лувоматне ётасть мялень салайста. И тянкса шнамань валхт азомат районнай администрациять колга, Кяшал велень поселениянь оцюняти П.Н.Лёвинонди, школань директорти Т.В.Матьковати.

И.Петров.