НАЦИОНАЛЬНАЙ ТЕАТРАСЬ ТЕРДИ ВАЛДТИ!

3 июньцта Саранскяйса «Эрьзя. Валдос ливтиця» («Эрьзя. Валдти лиись») спектакльса сёлгозе театральнай 88-це сезононц Мордовскяй государственнай национальнай драматическяй театрась.

Спектакльда инголе зрительхне кулхцондозь концертть, конань аноклазе «Зрнянь струнат» гитаристонь квартетсь, и ванозь документальнай кинофильмать, конаса азондовсь Степан Дмитриевич Эрьзянь эряфонь и творческяй кинц колга.

Театральнай илать рамкаса тяфта жа азфоль театральнай 88-це сезононь инь цебярь артистть лемоц, конань кочказь театрань сайтса вайгялень максомать вельде зрительхне. Тя—Мордовия Республикань Заслуженнай артистсь Дмитрий Мишечкин.

Сяльде Мордовскяй государственнай национальнай драматическяй театрать директороц С.И.Дорогайкина казезень Благодарностьса республикань журналисттнень, конат театральнай сезонть кувалмоста сёрмадсть театрать работанц колга.

«Эрьзя. Валдти лиись» пьесать сёрмадозе мокшэрзянь содаф прозаиксь и драматургсь, Мордовия Республикань Народнай писательсь Валентина Ивановна Мишанина. Эрзянь кяльс сонь ётафтозе прозаиксь М.Левщанова.

Путозе спектакльть странань содаф режиссёрсь, Российскяй Федерациянь и Калмыкия Республикань искусствань Заслуженнай деятельсь Борис Манджиев.

Декорациятнень  спектакльти арьсезень художниксь-сценографсь Анна Репина, музыкать кочказе-латцезе Калмыкия Республикань искусствань Заслуженнай деятельсь, композиторсь Аркадий Манджиев, пластикать коряс артисттнень мархта работась Башкортостан Республикань Заслуженнай артистсь Рамиза Мухаметшина.

«Эрьзя. Валдти лиись» спектакльть премьерац Национальнай театрать сценанц ланга ётафтовсь 2021 кизонь 14 октябрьста.

Спектакльса, кона моли 1 част 40 минута, налхки Национальнай театрань 15 артист. И теест, койсон, няевиста и удалафста пачфтевсь зрительхненди мокшэрзянь гениальнай скульпторть эряфонь и творческяй киц, кона ульсь аф тёждя и аф такор.

Кода содаф, Степан Дмитриевич Эрьзя (Нефёдов) шачсь Симбирскяй губерниянь Ардатовскяй уездонь (тяни Мордовия Республикань Ардатовскяй райононь) Баево велеса 1876 кизонь 27 октябрьста.

Одкс пингста сон рисовандась шкайнят. 1907 кизоня аделазе живописень, ваяниянь и зодчествань Москувонь училищать. 1907-1914 кизотнень эрясь и работась Италияса, Францияса. Скульптуранза няфневсть международнай оцю выставкатнень эса, конат ётафневсть Миланца, Римса, Венецияса и Парижса. Критикне и искусствоветтне эста макссть оцюдонга оцю оценка «Последняя ночь осужденного перед казнью», «Христос распятый» и «Христос кричащий» скульптуранзонды.

1926 кизоня Советскяй Правительствась С.Д.Эрьзянь скульптуранзон мархта кучезе командировкас Парижу, коса ётафтовсь международнай оцю выставка. Тоста тусь Аргентинав, коза сонь тердезе тя странань эстонь президентсь Марсело Торкуато де Альвеар. Эрясь и работась скульпторсь Буэнос-Айрес ошса 1927 кизоста сявомок и 1950 кизоти молемс. Мзярда художниксь мрдась куду, Советскяй Союзу, мархтонза усксь 250 лама скульптура, конатнень сон казезень родинати.

Кулось С.Д.Эрьзя 1959 кизонь 27 ноябрьста. Калмаф мокшэрзянь гениальнай скульпторсь Саранскяйса. Но, кода няфтезе пингсь, С.Д.Эрьзянь искусствац аф содай перяфкст, сяс мес сон мала и питни марнек человечествати!

Сембе тя эряфть и искусствать Национальнай театрать сценанц лангса удалась няфтемс—валдста, шарьхкодевиста и мяляфтовиста!—марстонь вийса пьесать авторонцты Валентина Мишанинати, режиссёрти Борис Манджиевонди, композиторти Аркадий Манджиевонди и артисттненди, конат, творческяй виень апак ужяльтть, налхкозь эсь рольснон.

Нят—Павел Михайлов, кона оцю асуши мархта налхкозе главнай рольть, Елена Гудожникова, кона маштозь пачфтезе зрительхненди Мартать, С.Д.Эрьзянь кельгома аванц образонц, Нина Абросимова, кона Неддать роленц вельде няфтезе простой аргентинкать кельгоманц С.Д.Эрьзянь искусстванцты, и Национальнай театрань сембе лия артисттне, конат заняфт тя цебярьдонга цебярь спектакльса!

В.НЕСТЕРОВ.