Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Люди и дела

СЕМБОНДИ САТНИ КЕЛЬГОМАЦ И СЕДИЕНЬ ЛЯМБОЦ

Аф кунара журналистонь киньке-яноньке пачфнемазь республиканьконь фкя инь ичкоздень уженязонза—Зубово-Полянскяй району. Удалась улемс тя аймаконь ламоц велетнень эса. И содасасть, мезсь васендакиге пови сельминголи? Кодама пара вайме мокшень ломатть эряйхть тяса! Коза афолеме сува, сембе вастова васьфнемазь кунардонь содаф ялгакс. Тяконь ули кода азомс и Каргал велень школань коллективть колга. Школась аф оцю, сембоц тяса покодихть вейхкса учительхть и эрсь пяк маштозь тиендьсы эсь тевонц. Английскяй кяльть, кепотьксонди, вятьсы мокшавась Елена Ильинична Чекмарёва. Сонь колганза и азонттама тячи.

 

Шачемас-касомас коре Елена Ильинична тяка райононь Кужа велеста. Но эряфонц оцюшка пяльксоц ётась Каргалса. Тястонь школав работама мокшавась сась 1885 кизоня М.Е.Евсевьевонь лемса МГПИ-ть шумордамда меле. Ся пингста и вяти тяса английскяй кялень урокт—36 кизода ламос ни. Каргалса Елена Ильинична музе эсь павазонц. Мирденц, Александр Кузьмичень, мархта шачфтсть-касфтсть кафта шабат, конат казсть ни теест кафта унокт.

 

«Шачсь-удалась сембе ширде»—тяфта примаф корхнемс Е.И.Чекмарёвать лаца ломаттнень колга. Улема, аф муви стама тев, кона теенза афоль сафтов. Васендакиге сон цебярь педагог. Тяфтама учитель мархта шабатненди мзярдовок аф сави скучендакшнемс. Елена Ильинична най ащи вешендемань киса, эрь урокозонза старандай сувафтомс мезе-мезе одня, мялень салай, штоба шабатне усковольхть тонафтови предметти и кепотьф мяльса сашендольхть занятиятненди. Е.И.Чекмарёвать уроконза—эсь лацоннет. Тяса тевс нолявихть и налхксематне, и творчествась. Кепотьксонди, Елена Ильиничнань и сонь учениконзон нльне ули эсь кядьса тиф «газетасна». Тяза сувафневихть шабатнень английскяй кяльса сочинениясна, лия творческяй работасна. Башка мяль Е.И.Чекмарёвась шарфни аф урочнай тевти, учениконзон ёткса ялгаксшить, фкя-фкянь мархта ладямать кемокснемаснонды. Сидеста улендихть марса походса, тялонда курькснихть соксса и стак тов.

 

Ашезе обжа Шкабавазсь героиняньконь творческяй асушинь ширдевок. Елена Ильинична афкукс зрнянь кядь мастерица, кодама аньцек мазыши аф тии! Лама киза ни мокшавась маштозь работай бисерть мархта. Ёмла ожнаняста тиф-кодаф шуфтонянза, мярьгат, ёфси афкуксоннет. Чекмарёвать класс сувамста бта повондат ёфксонь уженяс: вальмятнень лангса шинь сюролдатнень ала пиндолдыхть эрь кодама тюсонь панчфонь пусмотне, шкафонь полкатне латцефт сёрматф картинаса, эсь кядьса тиф налхкшса, поделкаса. Сембе синь тифт Е.И.Чекмарёвать и сонь лездыензон-учениконзон кядьса. Елена Ильинична пара мяльса тонафнесыне шабатнень сянди, мезе машты сонць. 9 класса сон вяти «БисерОК», а 6 класса—«Бисероплетение» кружокт. Тяса стирнятне-цёранятне сёрматкшнихть картинат, котцихть панчфт, кятьксть (браслет), мелавнят и лама мезе лия. Валда илати, Очижити, кепотьксонди, сембе марса тисть бисерста пяк мазы алнят, а сонць Елена Ильинична праздникти сёрмадсь бисерса мазыдонга мазы нардама.

 

Ёмла ожнаняста кодама героиняньке ушедсь кемоньшка кизода инголе. Весть велень церькавсост улемста священниксь, отец Валентин венептезе Елена Ильиничнанди Пресвятой Богородицать фигурканц, конань лангста нарядсь тифоль бисерста, но кой-кона васттнень эса пингть эзда ожнанят ашельхть. Лиякс азомс, нарядсь эрявсь петемс. Елена Ильинична хуш эста нинге ашезь машта тя тевса,  сембе сяка ашезь атказа. Оцю ответственностень марязь кярьмодсь максф работати. Кода православнай ломань шарьхкотькшнезе, батюшкать благословениянц коламс аш кода. И сембось сонь лиссь! Тя, улема, сяс, мес стамань-сёрмадомань асусь ульсь ни эсонза, сон аньцек эрявсь панжемс. А, шять, сон, тя асушись, ётась теенза тядянц, Евдокия Васильевнань, эзда? Елена Ильинична мяляфтсы, кода тядяц сёрматкшнесь стакшинь и илань мокшень панархт. А тяни синь машты кядень династияснон полаткшнесы Елена Ильиничнань стирецка Мария. Сон пара мяльса котци кячкаскаса и вндерняса.

 

Е.И.Чекмарёвать работанзон ёткса улихть бисерса сёрматф шкаень ликонят. Синь теенза башка питнихть. Сидеста эсь учениконзон мархта героиняньке примси участия всероссийскяй, республиканскяй и районнай конкурснень эса. Питни казнекс ащи мастерицати Благодарственнай сёрмась, кона максфоль теенза 2017 кизоня «Минь святоеньке» епархиальнай историко-патриотическяй конкурсонь призеронь анокламанкса. Конкурссь, кона лемтьфоль Федор Ушаковонь лятфнеманцты, Елена Ильинична эсь ученицанц Алена Касаткинать мархта бисерса сёрмадозь святой воинть шкаень ликонянц и занязь омбоце вастть. Е.И.Чекмарёвать казнень арзянясонза стане жа 2020 кизоня «Созвездие мастеров» декоративно-прикладной творчествань конкурсса сяськиень Дипломсь, «Од кизонь серпантин» од кизонь налхкшень районнай конкурсса активнайста участиянь примаманкса грамотась, «Моя малая Родина: природа, культура, этнос» исследовательскяй работань Республиканскяй научно-практическяй конференцияс эрь кизоня тонафнихнень анокламанкса Благодарносттне и лама лия казне.

 

Бисерса сёрмадомась тя аф сембось, мезьса сафтсы машты кядь мокшавась. Сон нинге пяк лац кодай. И нят аф аньцек носокт-месть. Сон машты и кофтань, и нльне платьянь кодама. А кодама сон цебярь кудазоравась! Куд потмоц най ару, шра лангоц пяшксе эсь кядьса пидеф-паньф танцти ярхцамбяльда, а куд пирьфоц кизонда вайси лама тюсонь панчфнень потмос.

 

Каргалса Елена Ильинична кельгома ломань. Теенза усковихть аф аньцек шабатне, но и оцюфне. И тя аф стак. Вдь мокшавать «мазыхть» аф аньцек тевонза, сонь мазы ваймоцка. Сельмованфонц коряс ни шарьхкотькшневи лиятненди панжадокс, паронь арьсикс улемац. Сон сембонди мушенды эрявикс валхт, машты ширень кирдема и мзярдовок аф атказакшни лезксса. Сембонди сатни сонь кельгомац и седиень лямбоц.

 

О.Евдокимова.

 


09.06.2022 №22
 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин