Спортонь оцю праздник ульсь мокшэрзянь масторсонк 24-28 декабрьста. Омбоце кизось мельцек Мордовияса етафтовсь конькаса фигурнайста курькснемать коряс Россиянь чемпионатсь. Ширезонк сашендсть странань инь вии фигуристтне Москуста, Санкт-Петербургста, Екатеринбургста, Уфаста, Самараста, Пермьста. Сембоц эйть лангс лисендсь 96 спортсмен. 2012 кизонь чемпионатсь арась эсь лацоннекс олимпийскяй чемпионтть Евгений Плющенконь оцю спортти мрдаманц мархта. Получаф травмать сюнеда сембе мирса содаф фигуристсь ашезь лисенде соревнованиятненди 2010 кизоста сявомок. «Ваймамада» меле Плющенко васенцеда лиссь эйть лангс Саранскяень аренаса!

Спортонь тя праздникс стане жа сашендсть Россиянь Заслуженнай тренерхне Т.А.Тарасова, Т.Н.Москвина, А.Н.Мишин, фигурнайста курькснемать коряс олимпийскяй чемпиоттне. Чемпионатса работась аф кржа судья, журналист аф аньцек Россияста, но и омба масторста.

24 декабрьста ушедсть тренировочнай выступлениятне, фигуристтне анокласть пялькстомати. А журналисттне тя пингть пуромкшнесть Ледовай дворецть пресс-центразонза, коса васьфнесть ширезонк саф инжихнень мархта. Тясотольхть Россиянь конькаса фигурнайста курькснемать коряс Федерациять Президентоц А.Г.Горшков, Федерациять генеральнай директороц В.Н.Писеев, чемпионатонь кой-кона участникне и синь тренерсна.

 

Тя ульсь ламос и ламонь колга корхнема, конань пингста ванфтольхть эряфонь эрявикс кизефкст республикать тяниень и вандыень шинц ви­ияфтомасонза. Инь главнай кизефксокс ульсть социальнайхне.

Оцю мяль шарфтфоль республикать здравоохраненияса модернизацияти. В.В.Путинонь мялецоль содамс Саранскяйса тядде панчф тяниень пингонь Перинатальнай центрать, кона арси ни межрегиональнайкс, работанц результатонзон. Мордовиянь Оцюнясь Правительствать Председателенцты пачфтсь сянь колга, што тядде ни Перинатальнай центраса шачсь 1121 идь, центрась примась Мордовиять эзда ширеса эряй 597 шачфты ава.

Корхнемать пингста В.В.Путин башка мяль шарфтсь Республиканскяй клиническяй од больницять лангс. Тя пяк цебярь межрегиональнай медицинскяй центрась кармай улема фкя инь оцюсь Поволжьяса. Сон строяви мокшэрзянь народть Российскяй государствань нароттнень мархта марса эрямаснон 1000 кизонь топодемань праздновандамать анокламань рамкаса. Курок ушеды этапонь этап больницять эксплуатацияс сувафтомац. Россиянь Правительствать Председателец, кона 1000 кизоти анокламать коряс Оргкомитетти оцюня, ерась содамс, кода Россиянь Финансонь и Здравоохранениянь министерстватне обеспечендасазь объектть эсь пингстонза финансировандаманц, сонь мялецоль содамс, кода молихть тефне клиникать тяниень пингонь медицинскяй технологияса обеспечендаманц и уникальнай оборудованиять мархта работамс кадрань анокламать мархта.

 

Ня кочкаматне сембонди тейнек ащихть эсь лацонь экзаменкс. Ламотне тяни лац шарьхкодьсазь, што сянь эзда, кодамкс кармайхть улема властень ня оргаттне, ламода ащи сай пингоньке, эряфоньке. Сяс тейнек пяк важна аф нолдамс эльбятькс кочкаматнень эса, перямс кить популист­тненди и демагокненди, эсь валснонды аф азорхненди, сятненди, конат аф лездыхть инголи молемати, а шоряйхть тянди. Тейнек эряви кочкамс еню, образованнай, порядочнай ломатть, кинь ули оцю мялец и кинди вийс коре путомс вклад одкстопневи Россиять, миньцонк кельгома Мордовияньконь материальнай, духовнай и нравственнай козяшиснонды.

И аф эрявихть кулхцондомс сятнень, кит тернихть аф молемс кочкама, кле, сембось инголькиге содаф ни. Тяфта корхтайхть ся ломаттне, кит аф верондайхть народоньконди и аф арьси теенза пара. Павазонди, тяфтама ломаньда аф лама.

Кда сяда активнайста макссаськ вайгяленьконь, тов сяда оцю ули авторитетоц странаса республиканьконь, сяда оцю ули теенза доверия.

Кельгома ялгат! Кадость аф ламос тевонтень и пяшкодесть эсь гражданскяй долгонтень. Вдь тинь мялентень и тинь позициянтень эзда ащи пяк ламось. Сембе—кочкама!