16 январьста Республикань Кудса етась Россиянь Президентть Д.А.Медведевонь и Мордовия Республикань Оцюнять Н.И.Меркушкинонь рабочай васедемасна, конань пингста ванонтфтольхть регионца социально-экономическяй тефне.
Ушедомок васедемать, Д.А. Медведев мярьгсь, кле, оцю мяльса нинге весть сань Мордовияв. Сон китькстазе: «Няйсайне полафткснень, няйса, што эряфсь моли, вииякшни, и тя кадонды пара мяльхть».
Россиянь Президентсь макссь оценка «Технопарк—Мордовияти», кода тяниень пингонь серьезнай проектонди, конань цебярь потенциалоц.

12 январьста Саранскяйса Финно-угорскяй народонь культурань Поволжскяй центраса етась Поволжскяй центрань учредительхнень общай собраниясна. Шинь повесткати сувафтфтольхть ниле кизефкст. Васенцесь эздост лемтьфоль 2011 кизонкса работань отчетти, омбоцесь—сяда товолдонь работань планть кемокстаманцты, колмоцесь—Поволжскяй центрань исполнительнай директорть полномочиянзон поладомаснонды, нилеце кизефксть пингста ванфтольхть разнай ширетне.

Курок Торбеевскяй райононь Салазгорь велень средняй школась отмечасы 170 кизонь юбилеенц.
—Тя школась—инь сиресь районца,—азозе Мордовия Республикань Заслуженнай учительсь Г.В.Сетяев.—Тяса тонафнесть содаф писательхть, ученайхть, общественнай деятельхть, врачт, учительхть, сяс школать юбилеенцты анокламась ушедома тяникиге.
Школась етась пяк оцю и кувака ки. Тяста лиссь мокшень литературать ушедыец З.Ф.Дорофеев, тяса тонафнесь содаф хирургсь И.Т.Кисткин. Тя школась прважазень фронту В.М.Дорофеевонь, И.Л.Житаевонь, М.М.Ждакаевонь, М.П.Рогожинонь, Г.И.Коняшкинонь и ламотнень лиятнень. Сембе синь казьфтольхть боевой орденца и медальса.
Тя школаса работась содаф лама учитель. Нильгемоньда, колмогемоньда ламонь киза тя школати макссть Е.А.Ошина, Н.П.Мугаева, А.М.Сетяева, В.В.Колядина, Е.Ф.Никишова, О.Я.Потягаева и ламотне лиятне. Ужяль, но кой-кона учительхне ашет тяни шиса. Аф кунара кулось Салазгорь велеть гордостец и прянь шнафтома вастоц Т.Я.Терёшкина. Сон нильгемоньда лама киза вятсь математикань урокт и ульсь школань директоркс.
Школать 170 юбилейстонза ня ломаттнень-тонафтыхнень колга кармай башка корхтама. Тя тиеви аф аньцек оцю пуромксса, но и класснай часттнень, аф класснай мероприятиятнень пингста, историянь урокста.

17 январьста етась депутатонь Лямбирскяй райсоветть сессияц. Кандидаттнень еткста, конат азфтольхть райононь администрацияти оцюнякс конкурснай комиссиять мархта, депутаттне вайгяльснон максозь А.Ю.Симоновонь инкса.
Алексей Юрьевич шачсь 1975 кизоня Саранскяйса. Шумордазе Н.П.Огаревонь лемса Мордовскяй госуниверситетть, а сяльде и тястонь аспирантурать. Работась Мордовия Республикань финансонь министерстваса. Ульсь ведущай специалистокс, отделонь начальникокс, а 2007 кизоста сявомок—министрти заместителькс.

Инжихне эсь сельмоса няезь, што российскяй фермерхненди ули мезти тонафнемс Александр Гулинонь эзда. Васендакиге эсь лангозост мяль шарфнихть сонь трудонь результатонза. Меля семейнай молочнай фермаса средняйста эрь траксста получаф 7077 килограмма лофца. Сембоц киза кувалмоста Гулин мись 650 тонна лофца, или пцтай 2 тоннат эрь шиня. Эряви азомс сяньге, што фкя литра лофцть себестоимостец стясь аньцек 10 цалковайс. Фермаса тяни кирдеви 118 тракс. Кода азозе Александр, маластонь сай пингть синь лувкссна пачфтеви 160-ти.

Мзяроце кизось ни мельцек республикань печатень работникне профессиональнай праздникстост терневихть Республикань Куду торжественнай илас. Тядде тя приемсь етафтфоль 12 январьста Республикань Кудть Колоннай залсонза.
Журналисттнень лемс лямбе валхт азсь Мордовиянь Оцюнясь Н.И.Меркушкин. Поздравляндамок сермады ялгатнень профессиональнай праздникснон мархта, Николай Иванович лятфтась мелянь декабрьста етафтф кочкаматнень колга, мезть коряс сатоме пяк цебярь результатт и мезти оцю путкссна газетатнень и электроннай печатть.

Церазень мархта бта ялгатама. А вдь етксонк 32 киза. Рьвянять мархта ашеме ладяв шоворемдост меле эстокиге. Рьвяямдост меле рьвянясь путсь тяфтама условият, што синь ширезон аф кармайхть сашендома, и тейневок улендемс ширесост аф мярьгондеви, сяс мес сон тяни аляти и рьвя, и тядя. Мон юкстайне ширезост кить, а церазе сувси варжамон.
Тяфта етасть вете кизот. Эряма васта синь сивотькшнесть, а мон эрян эсь квартирасон. Но вов шачсь уноконязе и кармань арьсекшнема идненди эряма вастонь колга. Ипотекась ашезь ту мялезост: тяфтама аф шарьхкотьф пингть тя прянь муцяма. Эста сань мяльс кадомс теест кафта комнатаса квартиразень, а эстейне рамамс фкя комната. Удалась тянь ширде. Квартирась тяка подъездса, васенце этажса, а синнесь колмоцеса. Лездонь мебелень-мезень рамамаса.

«КОЛМА ВАРМАТ»,—
тяфтама лем ала 12 январьста етафтфоль Мордовия Республикань культурань Заслуженнай работникть, республикань Государственнай премиянь лауреатть, «Голоса России» телерадиоконкурсонь 1-це премиянь лауреатть Н.Н.Балашкинонь юбилейнай илядец. Иладонза инголе мокшалясь Николай Николаевич сашендсь «Мокшень правда» газетав и нюрьхкяняста азозень эсь мялензон творчестванц, эряфонь кинзон-янонзон, сяда товолдонь планонзон колга.
—Ведьгемонь ветие кизось—тя, кда можна тяфта мярьгомс, творческяй ширде эреклама пинге. Николай Николаевич, тейть топодсь тняра. Кодамоль сон, етаф кице?

Россияса Мирный ошсь ащи Севернай полушариять умереннай поясонц севернай ширесонза. Сон—Якутиять Мирнинскяй райононц административнай центрац, нинге лемневи Россиянь алмазнай «столицакс». 2010 кизонь даннайхнень коряс, населенияц ульсь пцтай 36 тежянь ломань. Эсь пингстонза тя ошу састь ломатть Россиять ламоц уженянзон эзда, тяконь лувксса и Мордовияста. Мекольцетнень еткса аф кржаль мокшеда. Синь тянивок эряйхть Мирнинскяй районца. Шарьхкотьф, северста шачема-касома уженязт сидеста аф саят, аф фалу удалси васьфтемс маластонь ломаттнень, ялгатнень мархта. Да и родной кяльти лажадомась максси эсь колганза содамс. Кирдемок тянь мяльса, 2009 кизонь ноябрьста Мирнинскяй районца панчфоль «Келу» мордовскяй общинась, коза тяни сувси 25 ломань. Севернай полушарияв туф земляконьке путсть инголест цель—аф юмафтомс, ванфтомс коеньконь-обуцяньконь, мокшень кяльть, этническяй юрхнень и няфтемс Якутиянь Мирнинскяй районца мокшэрзянь культурать. Тяни общинась вяти оцю работа нароттнень еткса ялгаксшинь соткснень ладямаснон коряс.

Землячканьке Екатерина Парамоновась—Народонь Ялгаксшинь Российскяй университетонь юридическяй факультетонь 4 курсонь студентка. Вов ни нилеце кизось Катя эряй Москуса, но емла родинанц мзярдовок аф юкснесы, пяк лажаткшни теенза и, аньцек эвондакшни пингоц, сашенды Мордовияв. Улема, тя лажатфсь вятезе стирть Москувонь и Московскяй областень Мордовскяй землячествав. Тяни Катя сувси од ломанень отделенияв и примси активнай участия сембе етафневи пуромкснень эса.
Катянь валонзон коряс, землячествать панжемац—цебярь ушеткссь диаспорань мокшетнень и эрзятнень эряфса. Тяфта ванфтовихть койхне-обуцятне, фалу маряви тядянь-алянь кудть лямбоц, мувихть од ялгат, конатнень еткса аф кржа землякта.

Кельме пинкнень кудонь нармоттнень рационцна сяда ашу. Тянь сюнеда аф сатнихть кой-кодама витамиттне, мезсь арси туфталкс разнай урматненди. Кода улемс тя случайста?
Васендакиге тевс нолямат стама корматне, коса белокта, жирда и углеводта башка, сатомшка витаминда. Нят бобовай, злаковай тишень, палаксонь, лия сор тишень почфсь. Нармоттне можнат аннемс тишень паморькста. Шорсесть синь лия корматнень еткс.
Витаминнай и диетическяй ярхцамбяльсь—пурьхкясь, кона козя А провитаминца. Виде, ванфтомста витамиттне ламода кирихть. Сяс свежай пурьхкясь аннема нармоттненди таргамдонза меле васенце 2-3 кофнень. Повфнесть сонь шуфтонь эсконяс 40-60 сантиметрань серес. Сарасненди эрявксты макссемс 30-50 грамма, яксяркненди—100-150 грамма, куркатненди—150-200 грамма.
В, Е группань витаминца козя капстась. Капстапрять повфтасть 20-30 сантиметрань серес или керсефста шовордасть  шоряфксть еткс.
Пяк ладяйхть пичень и кузонь салмоксне. Синь эсост улихть каротин, В1, С витамитт, антигельминтнай веществат, фитонцитт. Кузонь, пичень салмоксне мелкайгофтомат и эстокиге андомат нармоттненди. А лиякс юмай эздост каротинць.

Декабрть песта М.Е.Евсевьевонь лемса Мордовскяй государственнай педагогическяй институтонь коррекционнай педагогикань и специальнай методикань кафедрась Саранск ошень Социальнай политикать коряс департаментть мархта етафтсь шумбрашиса ограниченнай возможность мархта шабатненди «Сембе цебярть—иттненди!» лем ала милосердиянь акция.
Васенда психологиянь и дефектологиянь факультетонь студенттне Саранск ошень VIII видонь специальнай (коррекционнай) общеобразовательнай школаса и 91№ компенсирующай видонь идень садса анокласть мялень салай представления. Иттненди инжикс сашендсть Мороз Атясь и Снегурочкась, кельгома ефксонь геройхне—Буратинась, Ловонь Королевась, Лешайсь, Яга-Бабась. Синь мархтост кандсть казнет—ручкат, тетратть, альбопт и налхкшт, конатнень кочказь факультетонь студенттне.

—Сявомок мяльс «Физическяй лицатнень имуществаснон лангс налогть колга» федеральнай законть 4 статьясонза 2 пунктть, кона лиссь 1991 кизонь 9 декабрьста, номероц 2003-1, строениять, помещениять и сооружениять инкса пенсионерхнень кядьста, конат получайхть пенсия Российскяй Федерациянь законодательствать коряс, налог аф сявондеви. Кда налоговай инспекциясь кучси квитанцият налогонь пандомс, эряви молемс налоговай инспекцияв, или почта вельде заказной сермаса уведомления мархта кучемс заявления, штоба афольхть пантфне налокт. Тяда башка,  пачфтесть сяньге, штоба мрдафтолезь инголи паннеф налогонь суммать, кда тяфтама пандомат ульсть мянь колма кизонкса.
Заявленияти эрявихть путомс пенсионнай удостоверениять копиянц, вешфкснень копияснон, конатнень кучсезь и пантф налогонь квитанциятнень копияснон.

Кльхчянясь (Богоявлениясь)—христианскяй фкя инь главнай праздниксь, кона праздновандави 19 январьста од стильс коре.
Кльхчянясь лувондовсь Святкатнень шумордамаснон коряс пингокс, мзярда мирсь-масторсь аруяфтови зиянонь канды духнень эзда. Кльхчянянь пяле весь лувондовсь пингонь полафтомакс, природаса тиендевихть чудат: «панжеви», кле, менельсь, и сянь, кие няезе сонь, пяшкодевихть сембе мяленза, сетьмихть варматне, видет улендихть оттне.
Святкатнень шумордамаснон азораватне «няфнезь» тяфта: лихнезь кудстост роштувань шужярть и пулфть, конат кирдевсть ужеса кафта недялят, ерязь кархчнень. Обрядовай кшить, кона ащесь шкай ужеса Роштуваста сявомок, аннезь кудонь жувататненди, нармоттненди. Кльхчяняда меле аватне латцезь кодвасттнень и ушеткшнесть котфонь кодама, сюрень кштирдема.

Мордовиянь государственнай Камернай хорть директороц, Россиянь и Мордовиянь культурань Заслуженнай работниксь, «Патриот России» медалень кавалерсь В.Н.Башкиров
—Вячеслав Никифорович, мезьса кеняртьфтьсы зрительть Камернай хорсь тядде, мзярда странаньконь лама нациянь народоц кармай праздновандама 1000 кизонь илать?
—Тя кизефксть лангс ответонь максомста, тейне пара нинге весть лятфтамс мелянь инь няевикс событиятнень и мероприятиятнень, конатнень етафтомста Камернай хорсь няфтезень ломаттненди Мордовиянь национальнай классическяй искусствать сембе мазышинзон. Ламос аф юкставихть духовнай и светскяй моронь и музыкань концерттне, конатнень минь етафтоськ Москувонь и сембе Русень Святейшай Патриархть Кириллонь Мордовияв саманц пингста. Тяфта жа аф юкставихть концерттне, конатнень Камернай хорсь казезень зрительти «Россия—спортивная держава» форумса и Хоровой музыкань Международнай фестивальса. И, монь койсон, ня кафта оцюдонга оцю мероприятиятне, конат етафтовсть республикасонк, нинге сяда пяк кеподезь Мордовиять авторитетонц и Россияса, и омба масторса. А тянь мархта—сонь национальнай классическяй искусстванцка питненц.

Мекольдень кизотнень аф азовомшка полафтсь цебярь шири Саранск ошсь. Етат сонь ульцянзон, проспектонзон и парконзон эзга и седице пяшкоди кенярдемада, гордостьта эсь столицаньконь, эсь республиканьконь инкса. Оцю оценка теенза макссихть и ширезонк сашенды инжихне. Кле, Саранскяйсь арась пяк мазы, европейскяй ошекс.
И нят аф шава валхт. Мекольдень кизотнень Саранскяйсь котоксть лисендсь «Россиянь инь благоустроеннай ошсь» конкурсса сяськихнень еткс.

16 январьста Мордовия Республикасонк ульсь Российскяй Федерациянь Президентсь Д.А.Медведев. Видеста Саранскяень аэропортста Дмитрий Анатольевич тусь Мордовиянь Технопаркть фкя инь главнай площадказонза—Информационно-вычислительнай комплексу. Д.А.Медведевонь мяльс сон тусь, ульсь тоса частшкада ламос.
Мордовиянь Оцюнясь Н.И.Меркушкин лац-ряц азондсь странань Президентти Технопаркть программанц тевс сувафнеманц и сонь сяда тов виияфнеманц колга. Технопарксь марс шовордасыне-пуроптсыне регионца уликс инновационнай инфраструктурать и инновационнай тевса ведущай предприятиятнень. И, тяда башка, тии дополнительнай стимулхт емла и средняй бизнесть виияфтоманкса.

Республикань Кудса РФ-нь Президентсь Дмитрий Медведев етафтсь кафта ширдень васедема Мордовиянь Оцюнять Николай Меркушкинонь мархта. Президентсь и региононь Оцюнясь ванондозь, кода регионца ащи тевсь социально-экономическяй ширеть мархта.
Саранскяйса Дмитрий Медведев етафтозе Госсоветть Президиумонц тяддень васенце заседаниянц. Сон лемтьф РФ-са потребительхнень праваснон араламаса государственнай гарантиятнень кемокстамаснонды. Президентть валонзон коряс, мекольдень 20 кизотнень пуроптфоль, тяфта мярьгомс, правань од отрасля, или, лиякс азозь, правань институт, кона ваны потребительскяй отношениянь разнай мяльхнень мельге. Пуроптфоль и потребительть праванзон араламаса национальнай система, кона ваны федеральнай оргаттнень, исполнительнай властень региональнай оргаттнень, муниципалитеттнень и общественнай объединениятнень уполномоченнайснон тевснон мельге.