МВД-нь коллегиять заседанияста
25 январьста Мордовиянь МВД-са етафтовсь Расширеннай коллегия, коса ванфтольхть республикань полициянь оргаттнень 2011 кизонь работань итогсна.
Коллегияса основной докладть рабочай шинь повесткать коряс тиезе республикань внутренняй тевонь министрсь, генерал-майорсь С.Н.Козлов. Сон пачфтезе пуромфненди, што етай кизоня полициянь структурас лезксонкса сашендсь 113 тежянь ломань. И сембонди теест максфоль эрявикс лезкс.
Тяфта жа министрсь докладсонза лоткась Мордовияса преступностть киреманц лангс—9 процентта, а ломанень шавондоматне кирсть 13 процентта. Республикаса етай кизоня ашель фкявок терракт. Инголдафтольхть экстремизмань лия тефневок.
Тяда башка, Мордовияса тапафт организованнай преступнай сембе группировкатне. А лидерснонды максфт тюремнай стама срокт, кда синь пуроптомс марс, лиси 500 киза. Сяс, С.Н.Козловонь мяленц коряс, Мордовиянь МВД-сь эсь показателензон коряс ащи васенцетнень еткса Приволжскяй федеральнай округса и Россияса.

 Пуромксса примасть участия Мордовия Республикань национальнай политикать коряс министрсь А.С.Лузгин, Мордовия Республикань Правительствать видеса гуманитарнай наукань научно-исследовательскяй институтть директороц В.А.Юрченков, РАН-ть Уральскяй отделениянц кялень, литературань и историянь институтть директороц И.Л.Жеребцов, Марий Эл Республикань Правительствать видеса В.М.Васильевонь лемса Марийскяй научно-исследовательскяй кялень, литературань и историянь институтть директороц А.С.Казимов,  РАН-ть Уральскяй отделениянц историянь, кялень и литературань Удмуртскяй институтть директороц А.Е.Загребин, Мордовия Республикань Правительствать видеса гуманитарнай наукань научно-исследовательскяй институтонь сотрудникне, лиятне.
Васенда вяре азф институтонь представительхне кемокстасть фкя-фкянь мархта сотрудничествать колга соглашения.

Арась ни пара койкс эрь кизоня етафнемс республикасонк изобразительнай и декоративно-прикладной творчествань мастерхнень творческяй работаснон «Мастер года» ошень выставкать-конкурсть. 24 январьста конкурссь панжевсь вейхксоцеда. Участникнень работасна пуроптфтольхть Мокшэрзянь народнай культурань музейса «От истоков до наших дней» выставкас, кона лемтьф мокшэрзянь народть Российскяй государствань нароттнень мархта ладязь эрямаснон 1000 кизонь топодеманц праздновандаманцты. Выставкась пуроптозень марс ошень асу, машты кядь ломаттнень, конат путнесазь эсь работаснонды сембе ваймоснон, мастерстваснон.

М.Ф.Ломайкина эряфонц лемдезе велень школати, коса вятсь математикань урокт. Шачсь Атюрьевскяй райононь Сире Кушка велеса. Тя велеса ульсь учителень лама династия: Карпиттне, Борисофне. Мария Федоровна вестевок ашезь каенда, мес кочказе учителень тевть, тянемс тонафты итть. Ушедозе учителень кинц Кяшал велень средняй школаста. Тяса музе кельгоманц—Кяшалонь од церать, физикань учительть Василий Тихоновичень. Тонафтыхнень етафтозь Од Карьга велень средняй школав. Шабада эста ламоль. Учителень коллективсь оцюволь. Василий Тихонович тяса директороль, Мария Федоровна вятсь математикань урокт.

Россиянь Государственнай Думав кочкаматне лядсть фталу, а вов колгаст корхтаматне стаки аф сетьмосихть. Моньге сидеста кизефнесамазь: кинь инкса, кле, максыть вайгяльцень? Отвечсян пара мяльса: «Единая Россия» партиять инкса. И фалу полаткшнеса: мон лувондса—кие ащи Россиять инкса, ся ащи «Единай Россиять» инкса. Тя тяни инь оцю и вии партиясь странасонк. Сон лама тиенди Россияньконь виияфтоманкса и ломаттнень эряфснон цебярьгофтоманкса. И нят аф шава валхт.
Ламотне эздонк, надиян, мяляфтсазь 90-це кизотнень. Странаньке, миньцонк Мордовияньке кеворсть и кеворсть алу. Ломаттне ляткшнесть работафтома и зарплатафтома, пенсионерхне—пенсияфтома. Аф шумбраль и общественно-политическяй обстановкась.

19 январьста Приволжскяй Федеральнай округса рабочай поездканц пингста судебнай приставонь Федеральнай службать директороц—Российскяй Федерациянь главнай судебнай приставсь Артур Олегович Парфенчиков ульсь Мордовияса.
Тяса улемстонза сон етафтсь оперативнай совещания Мордовия Республикать эзга судебнай приставонь Федеральнай службань Управлениять руководстванц мархта и знакомондазе коллективть од оцюняснон Сергей Валентинович Перовонь мархта, кона путф тя вастти Российскяй Федерациянь юстициянь министрть приказонц коряс. Тияк азсаськ, што сон етафтф тяза Нижегородскяй областть эзга УФССП-нь руководителень заместителень вастста. А тяда инголе С.В.Перов работась Мордовия Республикать эзга судебнай приставонь Федеральнай службань Управлениять аппаратса.

Таблеткада башка эряви пчксемс природнай средстватнень мархтовок. Мешсь—тя эсь лацонь природнай фармацевт. Сембе продуктатне, конатнень сон нолясыне, эрявикснихть медицинаса и ладяйхть организмати.
Сузокстомада
Анокламс ряпсонь сокса медень 30 процентонь раствор. Сузокстомать пингста шити нилексть-ветексть путняфнемс эрь шалхковаряти 5-6 путерьксонь. Сядонга ладяй тя  средствась шабатненди.
Желудкань и двенадцатиперстнай сюлонь язвать пингста
10 граммат мелкайгофтф прополисть лангс каямс 70 процентонь спирт. 30 минута шорямс и кадомс ащема колма суткас. Меле тага шорямс, путомс 2 частс кельме вастс и педямс кагод пачка.
Примсемс шити колмоксть 1-1,5 частта ярхцамда инголе 15-20 путерьксонь ведь или лофца мархта. Пчкафтомань пингсь 18-20 ши. 1-2 недяляда меле етафтомс пчкафтомать оду.
Аф удомада
Столовай куцю медть солафтомс стакан комнатнай температурань ведьса. Симондемс мадомда инголе.
Пейзивольхнень кемокстаманкса
Порендемс восковой крышканят медень сотатнень эзда.

Ётай недялять, 19-22 январьста, Мордовия Республикать столицасонза—Саранскяйса етась дошкольнай образовательнай учреждениянь педагокненди «Построение функциональной языковой среды в семье и в дошкольных учреждениях: подходы и методы». «Языковое гнездо» темать коряс Межрегиональнай информационно-методическяй семинар.
Семинарть Мордовияса пуроптозь-етафтозь Мордовия Республикань Образованиянь, Национальнай политикать коряс министерстватне, Финно-угорскяй народонь культурань Поволжскяй центрась, «Финляндия—Россия» обществась.
Национальнай кялень тонафнемась—тя важнай кизефкс, кона кепсеви ламоц форупнень и собраниятнень эса. Тячи оцю мяль шарфневи «Языковое гнездо» методикать лангс. Коряванза работай дошкольнай учрежденияса или идень садонь группаса педагокне вятьсазь образовательнай процессть национальнай кяльса: нинге емласта шабатне тонафтовихть народснон кяленцты, культуранцты.

Саратовскяй областьса, кода и Россиять ламоц лия уженянзон эса, эряй аф кржа мокшэрзя. Ламотне эздост шачсть-кассть Мордовияса, но тя или тона туфталонкса тусть лия региону. Аф ваномок тянь лангс, седисост и ваймосост палы шачема ширети кельгомась. Ашезь юкста земляконьке национальнай культураньконь, коеньконь-обуцяньконь, мороньконь, сиде мороняньконь. Тяфта, кеветиешка кизода инголе, Саратовскяй областень Энгельскяй районца пуроптфоль мокшэрзянь моронь «Умарина» ансамбльсь, конань содасазь Россиянь ламоц ошнень эзга, а стане жа и омба масторса—Голландияса.

КАФТА ПОСОЛОНЬ ШИРЕСА ИНЖИКС

Прязонга ашезь сашенда, ялгат, што тейне, мокшень аляти, мезеньге аф знаменитостти, удалай повомс фкя ковста кафксть кафта посолонь пяли. А вдь удалась, и апак учентт.
Лиссь тя вов кода. 1966 кизоня топодсь 1000 киза Польскяй государствать тиеманцты. Тянди лемтьфоль конкурс. Сонь арьсиенза—Москуса Польшать посольствац, Варшаваса СССР-ть посольствац, советско-польскяй и польско-советскяй дружбань обществатне, «Журналист» журналсь и нинге мзярошка организациятне. Конкурсть условиянзон коряс, Польшати лемтьф инь цебярь публикациянь авторсь казеви кафта недяляс Польшав молемань путевкаса. Илядыкс участникне казевихть польскяй сувенирса. Лувине тянь квалма сообщениять и арьсезевонь: а мес ба аф варжамс вийнень? Содаса поляконь кяльть (корхтан, луван, сермадан, варчсине нльне вийнень тя кяльса стихонь сермадомаса), лувондонь тя странать лама писателензон книгаснон, инь ламонц—оригиналса. Лиятнень коряс сяда лац содаса сонь культуранц, обуцянзон и историянц. Печатлафтольхть Польшань темас кафта азксоне. Кда аф путевка, то сувенир пови…
Етафтыне поляконь кяльс кафта азксонень: «Михасень толняц» и «Кода ашуфнень грабазь». Васенцесь—фкя подпольщиконь квалма, омбоцесь—работафтома аф улемать. И кучине синь марса аф оцю автобиографиязень мархта жюрити.

Ули тезка-ялгазе, кона етксонк содафоль кода лима-сюна валонь кельги ломань. «Минь, рузонь ломаттне, тяфтома аф машттама эряма, кальдяв валхне версонк,—мярьгсь Лёха.—Синь лездыхть машфтомс кяжть, сетьмомс».
Ялгазе азондсь аф фкя пример тянь коряс. Сявомс хуш омба масторонь валхнень, конат рузкс кайгихть «сотомакс».
—Вов кулхцонтт: «Усрат ахуй атъебифи биляди!»—пеедезь корхтась Лёха.—Арьсят, нят лима-сюна валхт? Аф, мон корхтан турецкяй кяльса. Кда етафтомс синь рузкс, ули вов мезе: «Брадозень семьяц—инь цебярсь странаса». А кда Танзанияса или Кенияса азсак колма букваста содаф валть, то африканецне арьсихть, бта тон мярьготь «этот». Туркатнень тя валсь етафневи кода «характер», а китаецнень и вьетнамецнень тя ефси пяк содаф лем. Кулхцонтт сяда тов,—кепотьф мяльса стаки азондсь тезказе.—Кой-кона странатнень эса, кепотьксонди, Швецияса, «туалетные» и «половые» валхне ефси аф лувовихть запретнайкс. А фкя инь «оцю» лима-сюна валсна, кда етафтомс сонь рузонь кяльс, ули вов кода: «Пошел ты в лес!» Сон канневи сюдоматненди, вдь нинге кунара вири, тролльхненди и гоблиттненди кулома панцелезь преступникнень и лия кальдяв ломаттнень. А содасак, кода чукчатне сялондыхть? Сембодонга пяк ломанть обжамс можна «Ты неумеха» валса. Няйсак, кода ащи тевсь.

Стада котфста кяскавня, каяда эзонза шурьхкя кетть, лангозост каясть чеснокть. Кирдесть кяскавнять холодильникса или лия кельме вастса.

КОДА НОЛДАМС ТЕВС НАРМОНЕНЬ НАЗЁМТЬ?
Нармонень наземсь—пяк концентрировандаф удобрения, сяс лама эздонза аф кайсема. Нармонень наземсь ладяй сембе касыксненди, конат тя удобрениять теждяста примасазь.
Пяк цебярьхть шонгар подкормкатне: кда тевс нолясасть свежай наземть, то сон шоряма 1:10, а кда коськть—1:20 пропорцияса. Лиякс азомс, 200 литрань тяльги боцькяс каяма кафта ведаркат свежай или фкя ведарка коське назем. Боцькять пякстамс панксса или пленка пакшса. Тяфта аф юмай азотсь и аф ули кальдяв шине. 5-7 шида меле подкормкась ули анок.
Квадратнай метрати сувафтома 2 литрат раствор. Касыксть перьф модась, растворса валомдонза меле, почедома коське модаса (сантиметрань сереса) и валома ару ведьса.
Подкормкада меле касыксть можна копанямс или мульчировандамс модать лятьф тишеса. Тяфта аф ули кальдяв шине, участкаса аф эвондайхть каруфт.

Спортонь кельгихне кепотьф мяльса ванцть австрийскяй Инсбургса васенце юношескяй Олимпийскяй налхкоматнень мельге. Пара азомс, што Россиянь сборнай командаса ульсь и Мордовиянь спортсменкась Анастасия Седова, кона соревнованиятнень эса эсь прянц няфтезе сяда лац аш ков. 17 январьста 5 вайгяльбес классическяй стильса соксса ласькомаса Настя инголдазень сембонь и финишти сась васенцекс. Тянкса сон получась золотань медаль.

Кода содаф, тя кизоть кучкаста мокшэрзянь народсь васьфтьсы и етафтсы 1000 кизонь илать. И тя илать мархтонк кармай праздновандамонза сембе Россиясь. Сонць тя фактсь эсонк кеняртьфти и максси народоньконди эрьгя эрямс модать лангса кепотьф мяльхть.
И, улема, кажнайсь эздонк эсь лацонза арьси 1000 кизонь илать духовнай значениянц и сонь путксонц колга минь родинаньконь, Россиять, сяда товолдонь виияманцты и касоманцты. Сяс монга эсь эздон еран азомс мяльнень 1000 кизонь илать значениянц колга Россиянь лама нациянь народть эряфса. Тяка пингть серьгядьсайне «Мокшень правдать» лувиензон азомс эсь мяльснон-арьсемаснон 1000 кизонь илать квалма, штоба тянь вельде нинге весть няфтемс, што минь народоньке аф ащи ширеса тя пингонь историческяй тефнень эзда. А, меколанкт, виень апак ужяльтть тяфта жа эрьгавста, кода и 1000 кизода тяда инголе, строяй и виияфты Россиянь лия нароттнень мархта государстваньконь эса.

Шачсь-кассь Н.С.Крутов Ельниковскяй райононь Новоямскяй Слобода велеса, колхозниконь семьяса, коса трудсь фалу ульсь васенце вастса. Николай Крутов нинге кемгафтува кизоняса кармась покодема колхозса—сембоса лездома алянцты пасекаса. Лятфтасаськ, што аляц, Сергей Федорович, ульсь содаф пчеловодокс, аф весть трудса сатфксонзон инкса казьфоль СССР-нь ВДНХ-нь медальса.
Средняй школать аделамда меле велень церать мялецоль сяда тов тонафнемс, касфнемс содамошинзон. 1977 кизоня отличия мархта шумордазе Н.П.Огаревонь лемса Мордовскяй госуниверситетть.
1977-1986-це кизотнень работась комсомолса, 1986 кизоста сявомок 1995 кизоти молемс—КПСС-нь Мордовскяй обкомонь инструкторкс, васенце секретарти помощникокс, МАССР-нь Верховнай Советть Президиумса отделонь заведующайкс, Мордовия Республикань Государственнай Собраниянь Аппаратонь руководителькс.

мярьгсь колма компаниянь—«Рыбкино» ООО-нь, «Агро-Бранчеевка» ООО-нь, «Агропромсервис» ООО-нь генеральнай директорсь Е.А.Пескарёв, конань мархта васетькшнесь и корхнесь минь корреспондентоньке.
Улемок Ковылкинскяй районца и савоза куляксамс Е.А.Пескаревонь колга, эстокиге азсазь, кие сон и мезьса заняф. И тя, аф ваномок сянь лангс, што шачемас коре сон аф Ковылкинань, а Чамзинка аймаконь. Но сон, нинге ефси од руководительсь, арась тяса эсь ломанькс, лац содафокс. И тянь сатозе сай пингть колга арьсезь работанц вельде.

ЛЯМБЕ ВАСЕДЕМА
Ня шитнень Мордовия Республикань профсоюзонь федерациять Председателец А.И.Солдатов васьфнесь профсоюзнай движениянь ветераттнень мархта. Васедемать пингста корхтамась мольфтевсь республикаса и марнек странаса общественно-политическяй событиятнень колга. Анатолий Иванович азондозень РФ-нь Президентонди кандидатть В.В.Путинонь ширенц кирдеманц коряс аф кунара тиф Региональнай Народнай штабть целензон и задачанзон. Ветераттне эсь ширдест надияфтсть примамс активнай участия Народнай штабть кочкамада ингольдень тевсонза. 

 

ДОВЕРИЯСЬ ТАГА МАКСФ А.Н.СУРИНОНДИ
Ня шитнень етась депутатонь Большеберезниковскяй муниципальнай районнай Советть сессияц. Кандидаттнень еткста, конат азфтольхть райононь администрацияти оцюнякс конкурснай комиссиять мархта, депутаттне тага максозь вайгяльснон Александр Николаевич Суринонь инкса.

мярьгсь Юрий Сергеевич Громов, «ИнСар» ограниченнай ответственностень обществать директороц:
—Шачень аф Мордовияса, а Саратов ошса. Тоса мон васьфтине Оксаназень, конань тядянза-алянза мокшэрзянь краеннет. Пингонь етазь полафтоськ эряма вастоньконь. Тяфта омбоце емла родинакс арась тейнек Сиал.-Пятина велесь, коса и кярьмодеме предпринимателень тевти. Тяни предпринимателян. А предпринимательствати мекольдень пингть, кода содасаськ,   макссеви оцю васта. Лятфтасаськ Россиянь Правительствать Председателенц Владимир Владимирович Путинонь программнай выступлениянц, коса шарьхкодевиста няфтьфт эряфоньконь сембе ширенза и ся, мезти вятьсамазь озадонь седихть ащемась, сей-тов нотфнемась. «Виияфтови экономикась—а тя, васендакиге, ломаттне, синь работасна, синь доходсна, синь возможностьсна»,—мярьгсь сон. А тянь сатомаса, тейне-арам, оцю васта занци предпринимательствась.