Поиск по сайту: 
 

Архив
 ноябрь 
 2020 
пн вт ср чт пт сб вс
      1
2345678
9101112131415
16171819202122
23242526272829
30      

 
 

 

Наши мокшанские сыновья и дочери

Ковылкинаста учительсь Г.В.Алямкина сатозе Россиянь Президентть грантонц

Октябрть ушетксста Саранскяйса Республикань Кудса Мордовия Республикань Оцюнясь В.Д.Волков васьфнесь Мордовиянь инь цебярь учительхнень мархта и казезень ёткстост инь достойнайхнень.
Оцю казне тя шиня максфоль Ковылкинань 3№ средняй общеобразовательнай школань рузонь кялень и литературань учительти Г.В.Алямкинати. Галина Викторовна сатозе Россиянь Президентть грантонц и 200 тёжянь цалковаень  тии премиять.
Мордовия Республикань Заслуженнай учительть Галина Викторовна Алямкинать лемоц лац содаф аф аньцек Ковылкинскяй районца, но и марнек республикаса. Да и целайнек Алямкиттнень семьяснон колга ули кода азондомс ламос. Семьянь азорсь, Анатолий Иванович Алямкин, тяниень пингть Ковылкинскяй краеведческяй музейть заведующаец. Инголи ульсь Гумны велень школань директоркс, Идень творчествань кудонь директоркс, руководителель образованиянь районнай отделса. Анатолий Иванович тяшти стихт и азкст мокшень кяльса, вяти общественнай эряф, сувси Мордовскяй (мокшень и эрзянь) народть Межрегиональнай общественнай организациянц Исполкомс. А.И.Алямкин—Российскяй Федерациянь Народнай просвещениянь отличник, Российскяй Федерациянь образованиянь сферань Почётнай работник, казьф Российскяй Федерациянь Образованиянь и наукань министерствать отличиянь Зрнянь знаконц мархта.
Кельгома рьвац, Галина Викторовна, шачемас коре Ковылкинскяй райононь Новые Дубровки велеста, тонафнесь Вечкенинскяй школаса и фалу примсесь участия общественнай эряфса: морафнесь стихт, мазыста морась, сатнесь сатфкст и лисендсь сяськикс конкурснень, олимпиадатнень эса. Школать шумордазе зрнянь медальса и поступась тонафнема Н.П.Огарёвонь лемса Мордовскяй государственнай университетть филологическяй факультетозонза. Вузса тонафнемстовок Галина васенцесель культурно-массовай сембе пуромкснень, стройотряттнень эса, студенческяй советонь членоль. Самай тяса, филологическяй факультетса, Галина Викторовна васьфтезе сай пингонь мирденц—Анатолий Ивановичень. И вов ни колмогемоньда лама киза Алямкиттне марсот.
Университетть шумордамдонза меле синь кафцьке распределенияс коре кучфтольхть работама Ковылкинскяй райононь Васильевскяй школав. Галина Викторовна—рузонь кялень и литературань учителькс. 1988 кизоня Алямкиттне ётафтфтольхть Гумны велень школав, коса Г.В.Алямкина поладозе рузонь кялень и литературань учителень тевонц.
2009 кизоста сявомок Алямкиттне эряйхть и работайхть Ковылкинаса.
«Семьяньконь ули кода лемдемс педагогическяй династиякс. Ламонцне раднянень ёткста лемдезь эряфснон учителень тевти. Монга учителень тевть кочкайне аф стак. Тядязе, мокшавась Прасковья Александровна Родькина, пцтай 40 киза работась рузонь кялень и литературань, мокшень кялень и мокшэрзянь литературань учителькс Ковылкинскяй райононь Вечкенинскяй средняй школаса. Учителель алязевок, Виктор Дмитриевич Родькин, меле сон Мордовское Вечкенино велеса колхозонь парторголь. Тядязе содазень тяфтама писательхнень и поэттнень кода И.М.Девинонь, Е.Я.Терёшкинать, А.Ф.Ежовонь, В.И.Мишанинать, лиятнень. Эрь уроконц ламос арьсекшнезе и тиендезе семботь, штоба сон ёталь мялень салайста, мяляфтовиста. Шачфтыезе ульсь школань завучекс, а меле—рузонь кялень и литературань, родной кялень и литературань учительхнень районнай методическяй объединенияснон заведующайкс»,—мярьгсь Г.В.Алямкина.
Тяда башка, сон оцю спасиба азонды маластонь и ичкоздень раднянзонды—учительхненди-словесникненди, конатнень лангс ванозь Галина Викторовна нинге шабакс ушедсь кельгомост валть и корхтамать. А художественнай литературати венемомась, сонь морафнемац вятезь сонь филологическяй факультету.
«Кельгсайне эсь тевозень, учениконень, предметозень. Сяс полафнян работань опытса работас коре ялганень мархта: ётафнян панжада урокт, рузонь кяльть и литературать коряс аф класснай пуромкст. Иттнень мархта примсетяма участия творческяй конкурснень, предметнай олимпиадатнень эса. И сатфксоньке кеняртьфтихть: улихть рузонь кяльть и литературать коряс олимпиадать муниципальнай этапонц сяськиенза и призёронза и республиканскяй этапонц призёронза, «Одарённые дети» Международнай форумть «Союз юных журналистов» номинациясонза Гран-прить сатыенза и призёронза, ламоц ученикне сяськсть и арасть призёркс лия олимпиадатнень, чемпионаттнень, конкурснень эса»,—азозе Галина Викторовна.
Совестьс коре лама киза трудендаманкса Г.В.Алямкина казьф Российскяй Федерациянь Образованиянь и наукань министерствать Почётнай грамотанц, Мордовия Республикань Образованиянь министерствать Почётнай грамотанц, асу иттнень мархта работаманкса Почётнай грамотатнень мархта. Сон сатозе Ковылкинскяй муниципальнай райононь оцюнять Грантонц.
И вов аф кунара, Учителень шити лемтьф торжественнай пуромксса, педагогическяй тевса оцю сатфкснень инкса теенза максфоль Россиянь Президентть Грантоц кода Россиянь инь цебярь учительхнень конкурссост сяськиенди!
Тя грантсь макссеви «Образование» национальнай проектть эряфс ётафтоманц мяльса кирдезь.
«Павазуван, мес кочкайне учителень тевть, тянкса, конешна, оцю спасиба тядязти. Арьсян, што рузонь кялень и литературань учительть профессияц ульсь, ули и кармай улема инь эрявиксокс. И хуш пингсь аф ащи фкя вастса и путни минь—валть и кяльть мархта работай педагокнень инголе од вешфкст, сембе сяка ульсть и лядыхть апак полафтт мазыста корхтамась, валть мазышиц и, конешна, иттненди кельгомась»,—тяфтама валса шумордазе корреспондентоньконь мархта корхнемать Галина Викторовна Алямкина. И азфоц виде!
Поздравляндасаськ Г.В. Алямкинать нинге фкя пяк оцю сатфксонц мархта!
Т.АЛЬШИНА.
12.11.2020 №44

 

Тема дня

Национальный проект «Образование». Региональный проект «Успех каждого ребенка»

Цель проекта: воспитание гармонично развитой и социально ответственной личности на основе духовно-нравственных ценностей народов России, исторических и национально-культурных традиций.

В 2020 году в рамках реализации проекта в 11 районах республики внедрена система персонифицированного учета дополнительного образования детей.

 

Так, вДубенском районе дополнительное образование предлагается по шести основным направлениям: техническому, естественнонаучному, туристско-краеведческому, художественному, социально-педагогическому, физкультурно-спортивному. Функционируют три учреждения дополнительного образования детей: Центр детского творчества, Дубенская ДЮСШ, Дубенская ДШИ.В районе реализуется 5 предпрофессиональных, 35 значимых и 10 общеразвивающих дополнительных программ, которые находятся в открытом доступе на портале mordovia.pfdo.ru . В них участвует 852 ребенка.По словам директора Центра детского творчестваТатьяныГрохиной, особой задачей остается привлечение в систему ДПО практиков из сектора экономики, особенно технической направленности.

 

В Доме детского творчества Кадошкинского районаблагодаря проектуобновились рабочие кабинеты, закуплено необходимое оборудование в соответствии с современными требованиями. Работает 21 кружок. Воспитанники Дома творчества занимаются не только рукоделием, но и общественной работой в сотрудничестве с республиканским молодежным центром.

 

По словам, заместителя директора Центрадопобразования для детей Ельниковского районаЛюбови Данилиной, в отличие от традиционной системы при персонифицированном финансировании формируется конкурентная среда как между бюджетными и частными организациями, так и внутри муниципальной сети, финансируются именно услуги, а не учреждения, происходит учет детей и количества посещений.

 

 

Напомним, что Президентом России Владимиром Путиным были объявлены 12 нацпроектов: «Демография», «Культура», «Здравоохранение», «Образование», «Жилье и городская среда», «Экология», «Безопасные и качественные автомобильные дороги», «Производительность труда и поддержка занятости», «Наука», «Цифровая экономика», «Малое и среднее предпринимательство и поддержка индивидуальной предпринимательской инициативы», «Международная кооперация и экспорт». Главная задача национальных проектов – реальные позитивные изменения в жизни каждого российского гражданина и каждой семьи.

 

Мордовия участвует в 56 федеральных проектах, которые являются частью национальных. 

 

 

12.11.2020

 

Ичалковскийрайон:кооператив «Подворье» развивается благодаря агростартапам его участников

С 2019 года в Ичалковском районе обладателямигранта по программе «Агростартап»нацпроекта«Малое и среднее предпринимательство и поддержка индивидуальной предпринимательской инициативы»стали 6 фермеров. В их числе индивидуальные предприниматели, главы крестьянско-фермерских хозяйств АлександрБогатырский, Евгения Устинова и Николай Яушев. На развитие своих КФХ каждый из них получил более 3 миллионов рублей. Все фермеры – пайщики кооператива «Подворье», который возглавляет игумен Митрофан (А.В. Коршунов).

 

«В нашей семье всегда держали подсобное хозяйство, поэтому для меня ухаживать за животными не в новинку. Полгода назад стал членом кооператива «Подворье», начал   работать на ферме. Спустя какое-то время отец Митрофан рассказал о программе «Агростартап», благодаря которой можно получить грант на развитие своего дела. Решил поучаствовать. На полученные деньги приобрёл 10 голов нетелей крупного рогатого скота и прицепной инвентарь для заготовки кормов, рассказывает АлександрБогатырский. – Если задуматься, то одному с нуля начать своё дело, даже с грантом, очень тяжело. Как говорится, один в поле не воин. Особенно когда ты новичок. Нужны опыт и знания. В кооперативе мы всё делаем вместе, сообща, поддерживая и помогая друг другу».

 

Многодетная мама Евгения Устинова в кооперативе с 2017 года.Супруг тоже в его составе, сейчас трудится на строительстве цеха по переработке мяса.

 

«Детей стараемся кормить только своими натуральными продуктами. Они любят молоко, а ещё делаю для них сливки, сметану, творог. Всё, что остаётся, сдаём: от кооператива приезжает машина и забирает молоко. Кооператив помогает нам с кормами и техникой, это удобно», – отмечает Евгения.На средства гранта женщина также приобрела 10 голов нетелей, а ещё косилку, дискатор и взяла в аренду землю.

 

Николай Яушевзакупил 10 голов нетелей, доильные аппараты и охладитель для молока. Основное направление деятельности кооператива – производство молока и его реализация. Но уже в ближайшее время благодаря агростартапам«Подворье» начнёт производить мясные полуфабрикаты.Выпуск первой партии продукции запланирован на декабрь этого года.

 

Стоит отметить, что по итогам конкурса, проводимого департаментом животноводства и племенного дела Минсельхоза РФ в рамках ежегодной сельскохозяйственной выставки «Золотая осень-2020», в номинации «Лучшийсельхозпотребкооператив» «Подворье» удостоено бронзовой медали за достижение высоких показателей в организации сбора и реализации молока.

 

 

Напомним, что Президентом России Владимиром Путиным были объявлены 12 нацпроектов: «Демография», «Культура», «Здравоохранение», «Образование», «Жилье и городская среда», «Экология», «Бе зопасные и качественные автомобильные дороги», «Производительность труда и поддержка занятости», «Наука», «Цифровая экономика», «Малое и среднее предпринимательство и поддержка индивидуальной предпринимательской инициативы», «Международная кооперация и экспорт». Главная задача национальных проектов – реальные позитивные изменения в жизни каждого российского гражданина и каждой семьи. Мордовия участвует в 56 федеральных проектах, которые являются частью национальных. 

 

12.11.2020

 

Тинь газетанте учи эсонт


 

Совещанияса ванондовсть республикань агропромышленнай комплексть виияфтоманц мархта сотф кизефксне

Мордовиянь Оцюнясь Владимир Волков 6 ноябрьста ётафтсь республикань агропромышленнай комплексть виияфтоманц мархта сотф кизефкснень коряс совещания. Ванондовсть аграрийхнень тя кизонь работань итогсна и платтне сай пингонди. Совещанияса примасть участия Мордовиянь Правительствать Председателец Владимир Сушков, Правительствать Председателенц васенце заместителец—МР-нь велень хозяйствань и продовольствиянь министрсь Владимир Сидоров, министрть заместителенза Иван Учайкин и Олег Литяйкин.
Лятфтасаськ, што велень хозяйствань тя сезонцта Мордовиясь кочкась сёронь и зернобобовай культурань рекорднай урожай—1 миллион 713 тёжянь тонна—тя 350 тёжянь тоннада сяда лама 2019 кизоть коряс. Средняйста гектарста сявфоль 36,7 центнер урожай. И погодань условиятне ульсть аф пяк цебярьхть. Мордовиянь Оцюнясь китькстазе, што получамс рекорднай урожай удалась касыксонь касфнихнень тевонь содазь и маштозь работамаснон вельде.
«Тяни республикань аграрнай производстваса тевс нолявихть сембода передовой технологиятне, тяконь лувксса модатнень аэрокосмическяй мониторингсна, касыксонь араламань эффективнай метоттне, оцю репродукциянь видьмотнень тевс нолямасна, наукать мяльса кирдезь, удобрениятнень сувафнемасна. И тя работась фалу цебярьгофневи»,—мярьгсь Владимир Волков.
МР-нь велень хозяйствань и продовольствиянь министрсь Владимир Сидоров азозе республикань Оцюняти, што цебярь основа тиф и сай кизонь урожайть алу—видеф 184 тёжянь гектар озимой культура.
Аф ащихть вастса и жуватань касфнихне. Алхнень, сивольть и лофцть производстваснон коряс, Мордовиянь фкя эряйть мяльс сявозь, республикась, кода фалу, занцесыне инголи моли позициятнень странаса, кизоста кизос цебярьгофнемок эсь показателензон. 2020 кизоське тяфтама. Главнай результаттнень эзда фкясь—лофцонь стадать продуктивностенц касфтомац, тя задачать Мордовиянь Оцюнясь Владимир Волков путнезе республикань Государственнай Собранияти Посланиясонза. Васень оценкать коряс, планц коре путф показательсь—7 тёжятть килограмма лофца кизоти фкя траксста ули ётаф.
Совещаниять пингста ванфтольхть велень хозяйствань производительхнень государственнай ширень кирдемаснон, тяконь лувксса удобрениянь и техникань рамамань, льготнай кредитованиянь, а стане жа инвестиционнай проекттнень эряфс ётафтомань кизефксне.
12.11.2020 №44

 

СТАрошайговскяй райононь новотроицкое велеса панчф мемориальнай комплекс

4 ноябрьста, Народнай единствань шиня, Мордовиянь Оцюнясь Владимир Волков ульсь рабочай поездка мархта Старошайговскяй районца. Новотроицкое велеса етась торжественнай церемония, конань пингста путфтольхть панчфт Великай Отечественнай войнаса шавф воиттнень памятникснонды.
«Тячи велеть эряфса важнай события—петемда меле минь панчсаськ Великай Отечественнай войнаса шавф воиттненди памятникть и од благоустроендаф парковай зонать. Шарфты мяль, мес тисаськ минь тянь тячи—Народнай единствань шиня и Победать 75 кизостонза,—мярьгсь Владимир Волков.—Тя мемориалсь строяфоль велеряйхнень мархта 35 кизода тяда инголе землякснон—геройхнень лятфнеманкса. Ломаттнень колга, конат максозь эсь эряфснон сянкса, штоба минь эрялеме сетьме менель ала, единай и великай странаса».
Великай Отечественнай войнань кизотнень аньцек Новотроицкяйста фронту тусь 500 малава ломань. 205 ломанць еткстост меки ашесть мрда. Ламотне няфтсть героизма и мужества, мезенкса казьфтольхть боевой орденца и медальса. «Сяс минь священнай долгоньке—ванфтомс сембе пингс народоньконь великай подвигонц колга мялямть, пачфтемс сай пингонь поколениятненди геройхнень лемснон и военнай реликвиятнень»,—мярьгсь Мордовиянь Оцюнясь.
Памятникть благоустроендаманкса нолдафоль 2 миллионда лама цалковай республиканскяй бюджетста. Нинге 800 тежяньда лама цалковай нолдаф аф бюджетнай источникнень эзда—тя «Новотроицкий» агрохолдингть средстванза.
Панчфнень памятникти путозь Мордовиянь Оцюнясь Владимир Волков, МР-нь Правительствать Председателенц васенце заместителец—велень хозяйствань и продовольствиянь министрсь Владимир Сидоров, МР-нь Государственнай Собраниянь депутатсь Владимир Руженков, Старошайговскяй райононь оцюнясь Геннадий Мухин. Минута кашт аф молезь ащемда меле етафтфоль молебен Отечествань аралайхненди памятникть святиндаманкса.
Владимир Волков стане жа ванозе Победань Паркть, кона благоустроендафоль «Велень территориятнень комплекснайста виияфнемасна»  МР-нь государственнай программать мяльса кирдезь. Одкстоптф памятникта башка, тяни тяса улихть брусчаткаса ацаф тротуархт, латцефт эземнят, тиф освещения, озафтфт сянгяря касыкст.
Республикань Оцюнясь спасибась агрохолдингонь руководствати бизнесть социальнай ответственностенц и родной велеснон колга заботендаманкса. Велень территориятнень комплекснайста виияфнемаснон коряс программать мяльса кирдезь тяса строяфтольхть ламоц социальнай объекттне: стадионць, идень садсь, социальнай центрась, коза сувсихть ФАП-сь, библиотекась, велень клубсь и концертнай залсь. Тяда меле велеть полафтсь марнек шамаликоц, тифт цебярь условият эряманди, велеряйхнень ули лац пандови работасна. Вели работама водендакшневихть тевонь содай специалистт, пуропневихть од семьят, шачендыхть шабат, агрофирмась стройси эсь работниконзонды од эряма вастт. Тядде новосельясна ульсь ни колма семьятнень, нинге ниле куттне тяниень пингть самай строявихть. А сембоц 2005 кизоста сявомок агрофирмась строясь пцтай 50 куд эсь специалистонзонды.
Республикань Оцюнясь надияфтсь, што велень территориятне  республикаса кармайхть виияфневома сяда товга, тяконь лувксса нацпроект-тнень коряс средстват нолдавихть Новотроицкое вели. «Кафта од ульцят строявихть Новотроицкяйса. Минь примаме решения, агрофирмась строяй кутт, а республикась нолдай ярмакт благоустройстванди, кинь строяманди,—мярьгсь Владимир Волков.—Но кит строявихть аф аньцек од ульцятнень эзга, карматама петнемост и сятнень, конатненди эряви ремонт. Штоба ломаттнень тяса улельхть тяфтама жа условиясна, кода и ошса.
Синць Новотроицкяень эряйхне и эсь велеснон, и предприятияснон инкса маряйхть гордость.
«Мон работан агрофирмаса нилеце кизось, тевозе мялезон, пандыхть лац,—азозе од специалистсь, инженерсь-механиксь Юрий Поликарпов.—Тядде тейнек макссть эряма васта, строясть од куд од ульцяса. Монь кафта емла шабане, сембось, мезе эряви, ащи маластонь вастса: и школась, и идень садсь, и сембось лядыкссь. Сембе условиятне од семьятненди!»
Республикань Оцюнясь спасибась Новотроицкяень эряйхненди трудонкса и велеть коензонды-обуцянзонды кородозь малаткшнеманкса, поздравляндазень Народнай единствань шить мархта, арьсесь сембонди шумбраши, мир и благополучия.
12.11.2020 №44

 

мордовиянь строительхнень тевдост лама

Мордовиянь Оцюнясь Владимир Волков ётафтсь ипотечнай кредитования мархта программатнень ширень кирдемаснон мархта эряма вастть строяманц коряс кизефксненди  лемтьф совещания. Совещанияса примасть участия Мордовиянь Правительствать Председателец Владимир Сушков, Правительствать Председателенц заместителец—МР-нь строительствань, транспортонь и дорожнай  хозяйствань министрсь Виктор Цыганов, Саранск ошень округонь оцюнясь Пётр Тултаев.
Республикань Оцюнясь шарфтсь башка мяль эряма вастонь строямать эрявиксшинцты и «Жильё и городская среда» национальнай проектть, конань азозе Россиянь Президентсь, эряфс ётафтоманцты. Лятфтасаськ, Владимир Путин путсь задача странаса эряма вастонь строямань объёмтнень пачфтемс 120 миллион квадратнай метра кизоти.
«Доступнай эряма вастть строямац—приоритетоньконь эзда фкясь маластонь кизотненди,—азозе Владимир Волков.—Башка васта тяса занци ипотечнай программатнень виияфтомасна. Тяниень пингть Мордовияса эряма вастть 90 лама процентоц,  кона регистрировандави первичнай рынкаса, рамсеви ипотечнай кредитованиять вельде».
Целайнек 2020 кизонь 9 ковста, аф ваномок пандемиять лангс, республикаса кредитнай организациятне макссть 5 тёжяньда лама эряма вастонь рамамс ипотечнай кредит—касомась 112,5 процент мелять тяка пингонцты. Льготнай ипотекать программанц коряс 6,5 процент ставкать коряс максф 750 лама кредит. Лятфтасаськ, тя программась, кона васенда арьсефоль 2020 кизонь 1 ноябрть самс и лац няфтезе прянц, кувалгофтфоль 2021 кизонь 1 июльти. Тя лезды аф аньцек цебярьгофтомс ламоц семьятнень эрямань условияснон, но и кирдемс строительнай отраслять ширенц.
Тияк, Президентть «РФ-ть виияфтомань стратегическяй задачанзон и национальнай цельхнень колга» Указонц коряс, 2024 кизоти ипотекать коряс средняй ставкати улема 8 процентта ёмлакс. Льготнай ипотекань программать вельде целевой тя показательть удалась сатомс пингта инголе: тяни странать эзга средняй ипотечнай ставкась 7,5 процент. Мордовияса 2020 кизонь сентябрьста сон 7,11 процентоль.
Совещаниять пингста ванфтольхть республикаса эряма вастонь строямань, тяконь лувксса Мордовскяй ипотечнай корпорациять мархта, кона сувси инь оцю застройщикнень ёткс—сонь талеканцты сашендови эксплуатацияс сувафневи лама квартирань эряма вастть шилеце пяльксоц, перспективатне.
12.11.2020 №44

 

Национальная тематика

Тольяттинь мокшетне и эрзятне примасть участия «Ялгаксшись границафтома» челленджса

4 ноябрьста марнек странась келиста васьфнесы Народнай единствань шить. Тя праздниксь кемокстафоль Россиянь Президентть В.В.Путинонь Указонц мархта 2004 кизонь декабрьста. Мяльс сявфтольхть 1612 кизонь событиятне, мзярда Кузьма Мининонь и Дмитрий Пожарскяень вятемаснон ала народнай ополчениясь нолдазе воляс Москуть польскяй интервенттнень эзда. Россияса васенцеда марнек народть тя праздникоц отмечафоль 2005 кизонь 4 ноябрьста.
Россиясь—лама нациянь страна. Тячиень шити Российскяй Федерацияса эряй 190-да лама народ, конат ванфтсазь, кельгсазь культурнай эсь койснон-обуцяснон. Эрти эздонк праздниксь лятфни эряфса инь васенцеть, инь главнайть, инь эрявиксть—родной ломаттнень и ялгатнень, историять, культурнай питнишитнень, нароттнень ялгаксшиснон и единстваснон, койснон-обуцяснон, великай Родинаньконди—Россияти кельгомать колга.
Тядде, Народнай единствань шити анокламать мяльса кирдезь, Самарскяй областень Нароттнень ялгаксшиснон Кудсна 12 октябрьста интернетса (социальнай сетьтнень эзда фкаса) ушедозе «Ялгаксшись границафтома» челленджть. Штоба примамс эсонза участия, эрявсь тифтемс или тиемс национальнай костюмса или национальнай узор мархта щамса (кудъётконь предмет мархта) фотография. И штоба тя фотографиять лангса улель «Шумбрат, ялгай» рузонь и родной кяльса сёрматфкс.
Сяда тов эрявсь тя фототь челленджть #ВсеМыРоссия# ДружбаНародов2020#здравствуйдруг хэштегонц мархта няфтемс социальнай сетьса эсь страницасот. Тяда башка, эрь участникти ульсь кода кучемс эсь публикациянзон ялганзонды, содафонзонды, тяфта тердемок синь участиянь примамати.
Челленджть ушедомстонза ни няевсь, што сон тусь ламотнень мяльс. Кода и арьсефоль, «Ялгаксшись границафтома» тя акцияса ашезь ляда ширеса Самарскяй областське. Сонь ширенц кирдезь шабрань областтне, населённай лия пункттне.
Кода удалась содамс корреспондентоньконди, челленджса примасть участия Самарскяй областень казахскяй, башкирскяй и лия  аф коммерческяй организациятне. Но васенце шиста сявомок инь активнай участникокс арасть Тольятти ошень Мокшэрзянь культурнай центрань участникне. Пцтай эрь шиня (а коста и шити несколькаксть) социальнай сеть-тнень эса центрать группасонза  эрявикс хэштегть ала эвондакшнесть «Здравствуй, друг»—«Шумбрат, ялгай» вал мархта фотографият. Лангсост—мокшень, эрзянь, стилизованнай щамса участницат и участникт. Ванат национальнай щамснон лангс и сельмоце аф явфтови. Кепси мяль, што ётксост аф кржа од ломаньда. Тя корхтай сянь колга, што стирьхне и цёратне кельгсазь родной кяльть, койхнень-обуцятнень.
«Ялгаксшись границафтома» челленджсь удалась. А социальнай сетьтнень эзда фкаса теенза лемтьф фотографиятне нинге ламос кармайхть лятфнема колганза.
Т.ВЛАДИМИРОВА.
12.11.2020 №44

 

Здоровье

Мезьда ярхцсема коронавируснай инфекциять инголдаманкса

Тяниень пингть фкя инь оцю прябалакс эряфсонк ащи коронавируснай инфекциять келемомац. Сёксеть саманц мархта тага ламода кассь од урмаса сярядихнень лувкссна. Синь ётксост лама эряфкшуда, но улихть оттка и шабатка. Кода араламс пря инфекциять эзда? Тя кизефкссь, улема, пичефтьсы эрть ёткстонк. Тяса, кода корхтайхть специалисттне, лездыхть араламань средстватне—маскатне, перчаткатне, конат эрявихть щашендомс общественнай васттнень эса, транспортса-коса. Тяда башка, ломань ёткса улемста кирдема социальнай дистанция—аф 1,5 метрада кржа.
Аф ёмла васта COVID-19 урмать эзда араламаса занци и ся, мезьда минь ярхцсетяма. Витаминца и минеральнай веществаса козя ярхцамбяльхнень вельде ули кода кемокстамс иммунитетть и кирьфтамс коронавируснай инфекцияса сярятькстомань пельксть.
Диетолокнень валснон коряс, сяда пяк организманьконди эрявикст А, С, D, Е, В2, В6 и В12 витамиттне, фолиевай кислотась, железась, селенць и цинксь. Кепотьксонди, D витаминць эвондафни ваймонь тарксемань китнень эса антимикробнай белок, мезсь лезды аф нолдамс респираторнай инфекционнай урматнень. D витаминда лама трескань максоса (тяса стане жа ули А витамин), калть, алтюжять, скалвайть эса. Оцю квалификациянь категориянь диетологть Екатерина Бурляевать валонзон коряс, кда шити сивондемс 10-15 грамма трескань макса (лиякс мярьгомс, фкя бутерброд), ули кода пяшкодемс D и А витаминца ломанть организманц суткань вешфксонц.
Стане жа ламоц инфекционнай урматнень эзда араламань виенц няфтезе Е витаминць, кона оцю лувксса кирдеви вайть (васендакиге постнай вайть) и пяшттнень эса. Е витаминца ломанть организманц суткань вешфксонц пяшкодеманкса сатомшка шити сивондемс 34 грамма постнай вай.
С витаминць лезни иммунитетть кемокснемаса. Эздонза лама офтоньбокорьксть, облепихать, ламбама перецть, равжа шукшторуть, капстать, цитрусовайхнень эса.  Специалисттнень валснон коряс, С витаминца суткань вешфксть пяшкодеманкса сатомшка шити сивондемс пяле ламбама перец.
Иммунитетть кемокснеманкса стане жа эрявихть цинксь и селенць. Цинксь ули траксонь и саразонь максоть, сырть,    пяшттнень эса. Селенда лама алтюжаса, мичкса и стане жа траксонь и саразонь максоса. Цинкса суткань вешфксть пяшкодеманкса сави сивомс 250 грамма сыр или траксонь макса, а селенца—5-6 алтюжя или пачка мичке.
Симондема лама ведьта. Начфтф слизистайхне—тя васенце перяфкссь вирусть кинц лангса. Мзяра симома? Специалисттне корхтайхть, кле, килограмма сталмоть лангс эрявксты инь кржась  30-40 миллилитра ведь. Симомбяльсь улеза комнатнай температурань или лямбаза.
Тага мрдатама иммунитетти. Кода содаф, сонь 80 процентоц пуропневи сюлотнень эса, а сяс эряви заботендамс тя органть микрофлоранц колга. Эряви ярхцсемс клетчаткада. Нят сифоньксне, сёротне, япне, перень сёротне. (Аф стак, лисенди, тунда рамсеме вельф лама люкшада! Хуш пинемське тянкса пяк ладяй). Стане жа сюлотненди эрявихть про- и пребиотикне. Тя эрь кодама шапама лофцонь продукциясь.
Ладяй калсь. Рационти эряви сувафнемс ваи севернай калть, васендакиге селёдкать, скумбриять, анчоуснень.
А вов модамарьда лама сивондемс аф кондясти. Специалисттнень валснон коряс, кле, крахмалсь—тя  сяка жа сахарсь, пингта пингс эвондакшни воспалениятненди туфталсь… Сахарсь эвондафни гликированнай гемоглобин, кона «киськорясыне» вер саттнень, срхкафнемок эсост воспаления. Тя самай ся сахарсь, конань пяк кельгсазь сюлонь патогеннай бактериятне и грибокне, машфнемок цебярь микрофлорать и лафчепнемок иммунитетоньконь.
Кда лиссь стане, што тинь сярятькстоде коронавируснай инфекцияса (или кельмофтеводе, урмаяде гриппса), эста прдасть шрантень лангста ламбама ярхцамбяльхнень. Исследованиятне няфнесазь,  сахарсь арси туфталкс     лимфоциттнень—организманьконь «аралаензон» вийснон лафчемомаснонды. Сяс медь или варения мархта чайсь, шоколадкась или печеньясь кодавок аф аралатядязь урмать эзда, меколанкт, стакалгофтсазь сонь. Тяда башка, рационть эзда лихтемат фастфуттне, консерватне и рястаф ярхцамбяльхне. Ня ярхцамбяльхне тяфтаковок аш кода  сувафтомс полезнай ярхцамбяльхнень лувксс. А кда нинге организмаса ули коронавируснай инфекция, эздост ёфси сави атказамс. Тевсь тоса, што «стака» ярхцамбяльхне эвондафнихть дополнительнай сталма лафчемф организмать лангс. Лисенди стане, што организманьке водендасыне эсь виензон аф вирусть каршес, а тя ваи продукциять переварендаманцты.
Материалть аноклазе О.ЕВДОКИМОВА.
12.11.2020 №44

 

Мокшане о мокшанах

Эряфонц лемдезе культурати

Мордовия Республикань культурань Заслуженнай работниксь, мокшавась Нина Васильевна Кулькова, конань колга минь тячи азонттама «Мокшаваня» рубрикасонк, лама киза ни эряй Темниковскяй райононь Темников ошса. А шачемас-касомас коре сон Ковылкинскяй райононь Од Пшень велеста. Серенц касозе простой крестьянонь семьяса. Аляц, Василий Андреевич, васенда работакшнесь велень колхозса, сяльде ушедсь якама ярмаконь добувама Саранскяи. Трудендась аф фкя предприятияса. Куду лядондсть рьвац, Екатерина Федоровна, и кота шабасна. Нина Васильевна лятфнесы: «Мзярда тядяньке тушендоль колхознай паксяв покодема, минь, шабатне, лядондолеме кудса «оцюкс», сембе тефне лангсонктольхть. Сембода пяк сатнесь эзрайхненди, синь и жуватань андыхне-симдихне, и ёмла дуганонь-сазоронь ваннихне. Но сембе сяка тя ульсь пара пинге, мзярда тонь аш пичефксне-ризфне, а кенярдема тейть казендсь одс рамаф анцяй налхкшкяське. Шабакс пяк кельгине якамс тядязень аканц шири, мон сонь лемнине Маша щавакс. Маша щавать ашельхть сонцень иденза, сяс сон най учсь эсон, кеняртькшнесь эрь самазти. Мон пара мяльса лезнень теенза, мезьса сафтовсь».
Тячиень героиняньке кассь отькорь шабакс. Школаса кенерькшнесь сембоса—и тонафнемаса, и общественнай тевса. Ёмла класса ульсь «звездочкань» командиркс, меле—дружинань советонь председателькс, комсомолонь комитетонь членкс. Пяк кельгозе мораманц. Нина Васильевнань тячивок мазы вайгялец, кайгозеви—седице солай. Школаса сон ульсь ёмла «тяштенякс», эрь иласа-пуромксса Нинась кштийсель-морайсель. Да аф най школаса. Эста тяфта ладяфоль, велень самодеятельнай коллектифне, артисттне якальхть велеста велес, няфнелезь фкя-фкянди маштомошиснон. Синь ётксост фалу ульсь тячиень героиняньке. Аф стак школада меле мялецоль поступамс тонафнема музыкальнай училищав. Но аляц кардазе, артистсь, кле, тя аф профессия, лия тевсь—учительсь.  Ашезе кола тряенц мяленц Нинась, максозень кагодонзон М.Е.Евсевьевонь лемса МГПИ-в, коса сатозе омба масторонь кялень тонафтыень специальностть. Студенткакс Н.В.Кульковась, кода и школаса, няфнезе прянц эрь кодама тевса: ульсь группань старостакс, институтонь профкомонь членкс, кафта кизот вятезе «Лингва» строительнай отрядть Темниковскяй райононь Тарханы велеса. Ся пингста сявомок эряфонь киц сотневсь Темниковань аймакть мархта. Институтта меле асу стирсь тертьфоль работама Урейскяй средняй школав. Колма кизот тонафтсь шабат, меле кефкие киза ульсь библиотекань директоркс. Но инь лама—комсь кафтува киза— мокшавась макссь культурати. Темниковскяй райононь администрацияса лама пинге вятезе Культурань управлениять. Сонць тянь колга аф лятфни, аф кельгсы прянь шнафтоманц, но тя аймаконь эряйхне лац мяляфтсазь, кодама оцю сереса ащесь райононь культурась Нина Васильевнань пингста. Тястонь оркестрась, ансамбльхне, мокшень творческяй коллектифне содафтольхть марнек республикаса. Мокшавась палозь палсь эсь тевонц инкса. Сонць арьсекшнезень концерттнень сценарийснон, улендсь артисттнень эрь репетициясост, фалу ащесь вешендемань ки лангса. Тяни Нина Васильевна пенсияса, но стак аф ащекшни, сон тячивок, кода корхнихть, стройса. Седиень-ваймонь путнезь покоди Темниковань Культурань кудса режиссёркс. Мокшавась аф ужяльнесыне виензон сянкса, штоба кеподемс райононь эряйхнень мяльснон, весялгофтомс-кеняртьфтемс синь. Тунда, содаф, республикасонк, кода марнек странаса, ладяфоль самоизоляциянь режим. Ламоц организациятне сёлкфтольхть, тяконь лувксса культурань учреждениятневок. Но Н.В.Кульковась тя пингтьке стак ашезе ётафне. Марса Культурань кудса покоди ялганзон мархта аноклакшнесь-ётафнесь мялень салай концертт онлайн режимса.
Нина Васильевна ломанць творческяй, сонць арьсекшни сиде моронят. Аньцек самоизоляциять пингста тяштсь колмогемонь колма сиде мороня. Эсост сон шнакшнесыне мокшень ломаттнень, Темниковань аймакть. Строчкатне эвондакшнихть прясонза апак фатяк кода, сидеста нльне веньгучкать.
Азома сявок, што лама киза ни Н.В.Кульковась вятьсы Мордовскяй (мокшень и эрзянь) народть Межрегиональнай общественнай организациянц Темниковскяй отделениянц. Лама вийда путни сянкса, штоба районца ванфневоль национальнай культурась, мокшень кяльсь, койхне-обуцятне. Нина Васильевна сонць пяк кельгсы сембе минценнеть, а сяс национальнайть вельмофтеманц коряс тевсь теенза пяк мала.
Тячиень героиняньке отькорь аф аньцек работаса и общественнай тевса. Сон нинге пяк цебярь кудазорава. Кельгсы пидеманц-панеманц. Аньцек мезе аф стряпай: и эчке пачат, и шуваня пачанят, и цюкорнят-месть. Пидефонц эзда кяльцень нильсак. Мзярда пуромкшнихть ширезонза иденза-уноконза, эрь мезне каваняй эсост мезень-мезень одняса. Миньге эняльдеме азомс танцти ярхцамбялень рецепт, конань тячи макссаськ лувиеньконди.
О.Евдокимова.
12.11.2020 №44

 

Люди и дела

Прьхчещандамась и теенза анокламась

Газетаньконь тячиень номерсонза Саранск ошень Никольскяй церькавонь священниксь Владислав Карякин азонды прьхчещандамать колга, мезенди сон эряви и кода теенза анокламс.
—Прьхчещандамась—тя Шкайть эзда ломаттненди питнидонга-питни казне. Сонь вельденза тейнек пачкотькшни Христость кельгомац, Шкайсь тяфта маласькофнесамазь Менелень райти (Царство Небесное) и максси пефтома (вечнай) эряф.
Мзярда монь кизефнесамазь, кода тейне удалси улемс фалу кепотьф мяльхть и отькорькс тевса, сатфнемс эрьгя приходса служаманди и макссемс духовнай лезкс стакаста сярядихненди, ётафнемс занятият аф шумбра   иттнень мархта и стак тов. Мон отвечсян, ронгть шумбраста кирдемаса тейне лезни спортсь, эрь кодама физическяй упражнениятне. Но ломанць вдь ащи аф аньцек ронгста, сонь ули ваймоц, ёнец. Тянь колга аф эряви юкснемс! Кода ронгти эряви ярхцамбяль и симомбяль, стане ваймоти эряви духовнай пища. Прьхчещандамась—тя святой ярхцамбяль, кона пяшкотькшнесы ломанть ваймонц благодатьса. Сон и максси вийхть пара тевонь тиеманкса, Шкайти и ломаттненди служаманкса.
Прьхчещандамась—тя Иняру (святой) Таинства. Иняру, сяс мес сон аруяфтсы ломанть ваймонц. Таинства, сяс мес прьхчещандамать пингста тиендевихть сельмоса аф няеви соткст, мзярда ломанть ваймоц сотови Христость мархта. Мзярда кшись и кагорсь арсихть Христосонь ронгокс и веркс, конат максфтольхть сембе ломаттнень пежеснон (грех) инкса.
Кда кизефтемс ломанть, кона прьхчещандафтсь пря, мезе сон маряй? Сидеста валхне афи эрявихть, сембось няеви шамас коре. Лангс ванозьге ломанць полафни, сельмованфоц палы валдса и кенярдемаса. Прьхчещандамась—тя стама таинства, конань колга стака корхтамс валса. Сонь эздонза ломанень ваймось и ронгсь маряйхть сятявши, тёждялгодома, мярьгат, лафтуста кев мархта кяскав валхтсть, эвондакшни мяль улемс Шкайти кулхцондыкс. Но, сяка пингть, сон аф эряви шарьхкодемс кода магия, конань примайть и тя сембе, тон павазуват. Ломанти эрявихть мумс вийхть отвечамс Шкайть кельгоманц лангс. И тя каршек валсь няеви ломаттнень ёткса прянь вятемаса. Библиясь тонафты: «Тиендеда ломаттнень мархта стане, кода мяленте, штоба синь тиендельхть мархтонт. Кельк маластоцень, кода эсь пряцень». И Шкаень Ваймопожфсь (Дух) касфтсыне ломанть эса Эсь «иможензон»: кельгомать, кемамать, эсь прянь кирдемать, кенярдемать, сетьмошить, паронь арьсемать и стак тов.
Мезе эряви, штоба молемс прьхчещандафтома? Васендакиге, споведамась, мзярда ломанць шарьхкодьсыне эсь грехонзон и каендай инксост. И Шкайсь пчкафтсы пежу ваймоть. Тяда башка, прьхчещандафтомда инголе эряви мирендамс маластотнень мархта. Аф аньцек мярьгомс: «Простямак монь, сяс мес мялезе молемс церькаву прьхчещандафтома». А виденцямс: «Мон муворуван инголет, простямак, сяс мес мялезе ушедомс эрямс лиякс».
.Вдь прьхчещандамать эзда ломанть кирдьсы аньцек прянь няемась и аф каендамась.
Церькавса священниксь тердьсыне прьхчещандайхнень самс Таинствати Шкайть эзда пелезь, кемама и кельгома мархта, сяс мес Библияса сёрматф: «Вдь кие ярхцай и сими, аф лувозь и аф арьсезь—тя Азорть (Шкайть) ронгоц, ся ярхцай и сими эсь прянц судендаманкса. Сяс тинь ётксонт лама лафчта, сярядида и аф кржа кулыда».
Мон пяк лац мяляфтса, кода васенцеда прьхчещандафтонь. Тейне ульсь кемнилиешка киза. Минь саме церькаву ялгазень мархта. Службась, тейне-арам, таргавсь пяк ламос, сярятькстсь карязозе, мялезель лисемс церькавста. Сембе арасть очередьс батюшкати и миньге ялгазень мархта араме. И вов прьхчещандамась… Ваймонь ся кенярдемать, тёждялгодомать, конань тейне казезе Шкайсь  прьхчещандамда меле, мяляфтса тячемс. Ульсь стама пара седиезон, мялезель сембонь ктморямс, мярьгат, марнек мирсь полафтсь перьфкан. И лама кизонь ётазь, мзярда содайне тя таинствать духовнай ширенц и лятфтайне, што минь нльне афи споведафтоме и педа-пес афи шарьхкодеськ, мезенди эряви прьхчещандамась, мон азондонь тянь колга батюшкати, кона лездсь тейне духовнай кизефксса. Сонь валонза лядсть мялямсон:
—Содак, Шкайсь ашезь вана, што тон ашеть анокла и аф кондястикс маладоть тя Иняру Таинствати. Но сякокс няфтезе тейть эсь кельгоманц и благодатенц. Тейть эряви мяляфтомс вов мезть: кда кядьстот вешихть кодама-бди лезкс и тон содасак, што анайсь мзярдовок аф пандсы парцень. Сякокс эряви лездомс. Лятфтак эсь пряцень, кода тон васенцеда сать Шкайти, а сон мезенге лангс апак ватт, венептезе кяденц.
Ялгат, прьхчещандамась—тя Шкайть кельгомац тейнек, пежу ломаттненди. Сяс аф эряви атказакшнемс тя питнидонга питни казнеть эзда.
Сёрмадозе Т.ПЕТРОВА.
12.11.2020 №44

 

 
 
 

 
НОВОСТИ
 
 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021  № 7
 
 

МР-нь Оцюнять аф лама пингс тевонзон тиендисна Артём Здунов Москуса васетькшнесь Россиянь культурань министрть Ольга Любимовать мархта

15 февральста Москуса ульсь РФ-нь культурань министрть Ольга Любимовать и
МР-нь Оцюнять аф лама пингс тевонзон тиендиснон Артём Здуновонь рабочай
васедемасна. Васедемаса главнай кизефксокс ульсть велень Культурань клубонь
строямась и уликснень петемасна, а стане жа региононь культурань
учреждениятнень эса кинозалхнень оборудованиясна.
«Велень Культурань клупне ломаттненди эрявихть. Минь фалу кирттяма соткст
региональнай власттнень мархта и ваттама ня объекттнень эса сяда тов тевонь
мольфтемать мельге. Тя тейнек эряви, сяс мес од площадкань панжемась и
уликснень петемасна панчсихть ки ломаттнень творческяй маштомошиснон
виияфтомаснонды и мушендомс асуфнень»,—мярьгсь Ольга Любимова.
Эсь ширденза Артём Здунов азсь благодарностень валхт Россиянь Культурань
министерствать лемс Культурань куттнень строямаса лезксонкса и отмечазе, што
Мордовияти велетнень эса Культурань кудонь строямась—тевонь вятемань важнай
направлениясь.
18.02.2021  № 6
 
 

Ванондовсь инвесторхнень мархта экотехнопаркть строяманц коряс кизефкссь

Мордовиянь Оцюнять аф лама пингс тевонзон тиендисна Артём Здунов 3 февральста васетькшнесь «Террикон» компаниянь, кона тиенди кархчнень-ляткснень обработкаснон коряс объектт,  группать руководстванц мархта. Компаниясь Мордовиянь руководительти макссь ваномс экотехнопарконь, конанди сувси единай межмуниципальнай полигон и кархчень сортировандамань комплекс, строямать коряс проект.
Лятфтасаськ, «Экология» национальнай проектть эряфс ётафтомань рамкаса путф задача кирьфтамс полиготтнень эса кархчнень калмамаснон лувксснон и кеподемс производственнай процесса вторичнай сырьять лувксонц тевс ноляманц. 2030 кизоти арьсекшневи пцтай сембе ляткснень кучсемс переработкас.
Артём Здунов педа-пес ванозе няфтьф проектть, конань эряфс ётафтомац арьсекшневи государственно-частнай партнерствань механизматнень вельде инвесторть эсь средстванзон лангс кредитнай ресурснень сувафтозь. Инвестициянь объёмсь лувондови 2,4 миллиард цалковайса, рабочай вастонь панжемась—250 ломаненди.
Артём Здунов шарфтсь башка мяль сянь лангс, штоба аф нолдамс тиф расчёттнень эса эльбятькст, проектть эряви няфтемс «Российский экологический оператор» компанияти, кона эряфс ётафнесы    ТКО-нень обработкаснон коряс государственнай программать.
11.02.2021  № 5
 

Тяфтама продукцияти ули вешфкс сембе вастова

Мордовия Республикань Оцюнять аф лама пингс тевонзон тиендисна Артём Здунов ульсь «Оптикэнерго» компаниятнень группаснон предприятиянзон эса, кона, 2020 кизонкса рейтинговай оценканзон результатонзон коряс, лувондови лидерхнень эзда фкясь республикань промышленнай предприятиятнень ёткса.
Сембоц компаниятнень группасост 22 предприятия, промышленнай направлениясь няфтьф «Сарансккабель-Оптика», «ЭМ-Кабель», «ЭМ-Кат», «ЭМ-Пласт», «Сармат» завоттнень мархта.
Мордовия Республикань Оцюнять аф лама пингс тевонзон тиендисна лац-ряц содафтсь предприятиятнень мощностьснон мархта, улемок компаниятнень группаснон производственнай сембе площадканзон лангса. Кода азондозе «Оптикэнерго»  ГК-ть директоронзон Советснон председателец Эвир Боксимер, предприятиятне обеспечендасазь потребительхненди кабельнай продукциять марнек производстванц комплексонц (катанка—пролоп—кабель—арматура подвесонди), тяка пингть 2020 кизоня инновационнай продукциять объёмоц ня предприятиятнень эса ульсь 80 процент ноляви изделиятнень марстонь объёмснон эзда. Холдингть кабельнай продукцияц пачфневи оцю госкорпорациятненди и ноляви тевс странань знаковай ламоц  объекттнень эса.
Республикать руководителенцты стане жа азондсь компаниятнень группаснон предприятиянзон эса корпоративнай культурать и работникненди дополнительнай социальнай гарантиятнень колга, конатненди сувафневихть работас и работаста служебнай транспортса питнефтома пачфнемась, пси ярхцамбяльса обеспечендамась, медосмотратне.
Сембоц компаниятнень группасост тяниень пингть работай 1700-та лама ломань, промышленнай направленностень предприятиятнень эса средняй заработнай платась 2020 кизоня ульсь 50 тёжянь цалковай.
Мордовия Республикань Оцюнять аф лама пингс тевонзон тиендисна стане жа ульсь «Оптикэнерго»  предприятиянь музейса, коса содафтсь компаниятнень группаснон историянц мархта и кадсь почётнай инжиень книгати тяштькс, арьсемок сяда тов лац-ряц работамс производственнай од платтнень ётафтомстост.
11.02.2021  № 5
 

Мордовияв рабочай визит мархта сашендсь Россиянь промышленностень и торговлянь министрсь Денис Мантуров

5 февральста Мордовияв рабочай поездка мархта сашендсь РФ-нь промышленностень и торговлянь министрсь Денис Мантуров. Ведомствань руководительсь, конань мархта сотрудничендамань сотксонь кирдемась пяк эряви республикати социально-экономическяй ширде виияфтоманкса, макссь питне республикать промышленнай потенциалонцты, панчсь од производственнай линия «Биохимик» заводса, содафтсь региононь инголи моли предприятиятнень продукцияснон мархта и ванозень МР-нь Оцюнять аф лама пингс тевонзон тиендиснон Артём Здуновонь мархта промышленностень и торговлянь сфераса марстонь  проекттнень эряфс ётафтомаснон коряс кизефкснень.
Мордовияса министрть рабочай программанц васенце пунктокс арась «ВКМ-Сталь» заводсь—Россиянь инголи моли металлургическяй комплексонзон  эзда фкясь, кона заняф машина кинь, автомобильнай и нефтегазовай отраслятненди, велень хозяйствати литьень нолдамаса. Предприятияса Денис Мантуров ванозень производственнай линиятнень.
Вагоннай литьянь производствать коряс «ВКМ-Стальсь» сувси Россияса инголи моли колмотнень ёткс. 2020 кизоня нолдаф 48 тёжянь тонна товарнай продукция, оцю вагоннай литьянь производствань объёмсь ульсь 10 тёжяньда лама вагонокомплект. Ноляви продукцияти лувкссь несколька кизоста кассь 30-ть эзда ушедомок 500-ти  молемс.
Холдингть Президентоц Константин Данилов азондсь литейнай производствать одкстоптомань васенце этапонц меля шумордаманц колга, нолдавсь тевс тяниень пингонь электродуговой сталеплавильнай пянакудсь, конань ёмкостец—16 тонна.
Азфоль, што модернизациянь программась сяда тов кармай мольфтевома мелкай и средняй литьянь нолямать коряс мощносттнень касфтоманкса. Тянь инкса  панжеви пцтай 500 рабочай од васта. Проектнай мощностьс лисемась арьсекшневи 2024 кизоня, инвестициянь объемсь—3,7 миллиард цалковай.
Тевс ноляви технологиятненди вийс коре цебярьгофтомс трудонь условиятнень, сяда касфтомс производствать экологическяй ширде  арукс улеманц. Кепотьксонди, 2020 кизоня путф 20 миллион питнеса кожфонь аруяфтомань системась аруяфнесы кожфть  тяфта лемневи «рдазу» металлургическяй производстваса.
Башка токсевсь производствать диверсификациянц и кадратнень коряс темась. Денис Мантуровонди азондозь, кле, профессиональнай металлургонь анокламань системась ладяф ни несколька киза и тяниень пингть вузса тонафнемать пингста кочксевихть асу цёратне  и аф аньцек минцень регионцтонк. 
«Ушеткшнеськ кадрань кочкамать несколька кизода инголе кафта профессиональнай металлургста, тяни ни анокламе 50 специалист, и нинге кемоттне аделасазь тонафнемаснон тядде»,—мярьгсь «ВКМ-Стальть» управляющай директороц Николай Чалов.
Предприятияса средняй зарплатась 42 тёжянь цалковай.  «ВКМ-Стальсь» сувси республиканскяй 10 предприятиятнень ёткс, коса пандови ломаттненди оцю зарплата.
11.02.2021  № 5
 

Евгений Алушкин: «ТЕЙНЕ АШ КОДА ЛЯДОМС ШИРЕСА»

Россияса коронавируснай инфекцияса васенце сярядись муфоль 2020 кизонь 31 январьста. Пцтай киза ни минь эрятама тя пелькс урмать мархта. Тяддень 20 январти ковидть мархта савсь васедемс Мордовиянь 15173 эряйти. Кода аф ужяль, 119 ломанць (стане жа 20 январти) ёткстост кулость урмать сюнеда.
Пандемиять пингста, шарьхкотьф, сембода стакаста сашендови медицинскяй работникненди. Ащемок, кода корхнихть, передовойса, синь шинек-венек эсь прянь аф ужяльдезь тюрихть урмать каршес. Сидеста врачне аф сатнихть, теест лездома сашендыхть    студенттне—сай пингонь докторхне. Фкясь синь ёткстост од цёрась, Н.П.Огаревонь лемса МГУ-нь Медицинскяй институтонь тонафнись Евгений Алушкин. Аф фкя ков ни сон работай 5№ Республиканскяй клиническяй больницяса, кона пандемиять ушетксста ётафтфоль ковиднай госпиталенди, лиякс мярьгомс, тяса тяни пчкафневихть коронавируснай инфекцияса сярядихне. Аф кунара Евгениень мархта удалась корхнемс минь корреспондентоньконди. Сон азондсь аф тёждя тевонц колга, кода ётни рабочай шиц, мезсь сембода стакась и кода вятьсазь пряснон сярядихне.
04.02.2021  № 4
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин