Поиск по сайту: 
 

Архив
 февраль 
 2021 
пн вт ср чт пт сб вс
1234567
891011121314
15161718192021
22232425262728

 
 

 

Наши мокшанские сыновья и дочери

Максфт казнет журналисттненди

Ётай недялять, 19 февральста, МР-нь  Пресс-центраса ётафтовсь Мордовия
Республикань Журналистонь союзть правлениянц расширеннай заседанияц. Сонь
вятезе Союзть председателец В.В.Назаров. Пуромксса примась участия Мордовия
Республикань Оцюнять Администрациянц Массовай коммуникациянь сфераса
государственнай политикань управлениянц начальникоц В.А. Калугин.
Заседаниять ушедомста республикань ламоц  журналист-тненди максфтольхть
государственнай казнет. Сяльде тифтольхть итокт Мордовиянь Журналистонь
союзть творческяй конкурсонзонды. Тяфта, «2020 кизонь инь цебярь
журналистскяй работась» номинацияса казьфтольхть журналисттне, конат эсь
публикациясост аф аньцек кепсесть оржа прябалат, но и лезнесть синь
решандамасост. Тяфтама материалхт лисендсть кода республиканскяй
газетатнень, стане  и районнайхнень эсовок.
Стане жа азфтольхть Социалистическяй Трудонь Геройть А.Т.Куняевонь лемса
конкурсса сяськихнень лемсна. Тяса казьфтольхть инь цебярь журналисттне,
конат анокласть мялень салай публикацият и сюжетт велень хозяйствань темас.
Эсь казнеснон получазь и фотокорреспонденттне, конат лиссть сяськикс
Г.С.Власовонь лятфнеманкса конкурсса.
Пуромксса тифтольхть итокт «2020 кизонь инь цебярь районнай журналистсь»
конкурсти, конань вов ни колмоце кизось ётафнесы «Рузаевскяй газетась».
Изданиять главнай редактороц Л.Н.Резяпкина казезень сяськихнень дипломса и
ярмаконь премияса.
Тя шиня республикань кафта журналисттненди казнетне максфтольхть куломдост
меле. Синь ётксост «Эрзянь правда» газетань велень хозяйствань отделть
вятиец П.В.Зиновьев, кона меля тусь эряфста коронавируснай инфекциять
сюнеда. Казнесь максфоль сонь стиренцты.
Пара мяльса азсаськ, што пуромксса казьфнень лувксс сувась и минь работай
ялганьке—«Мокшень правда» газетань кулянь отделть вятиец О.В.Евдокимова.
Теенза максф Мордовия Республикань Оцюнять Благодарностец.
О.КОЛЕДИНОВА.
25.02.2021 №7

 

Тема дня

Теньгушевский район: ремонт дорог в 2021 году


 

Национальный проект «Здравоохранение». Региональный проект «Развитие детского здравоохранения, включая создание современной инфраструктуры оказания медицинской помощи детям»

В 2020 году в рамках регионального проекта проводилось дооснащение детских поликлиник и детских поликлинических отделений медицинских организаций необходимыми медизделиями и оборудованием.

 

Продолжалась работа по реализации организационно-планировочных решений внутренних пространств медучреждений, направленных на создание условий для внедрения принципов бережливого производства и комфортного пребывания детей и их родителей при оказании первичной медико-санитарной помощи.

 

Велось строительство хирургического корпуса детской республиканской клинической больницы (срок сдачи объекта – 2021 год).

 

В федеральных симуляционных центрах обучено 40 специалистов в области перинатологии, неонатологии и педиатрии. Проведены профилактические медицинские осмотры детей в возрасте 15-17 лет: девочек – врачами акушерами-гинекологами; мальчиков – детскими урологами-андрологами (всего около 18 тыс. чел.).   

 

25.02.2021

 

Ардатовский район: медицинская помощь для сельских жителей

В 2020 г. в Ардатовском районе в рамках регионального проекта «Развитие системы оказания первичной медико-санитарной помощи» нацпроекта «Здравоохранение» установлены новые фельдшерско-акушерские пункты в с. Солдатское, с. Турдаково, с. Луньгинский Майдан, с. Жаренки. Все они полностью оснащены медицинскими изделиями.

 

Для оказания выездных медицинских услуг в район поступили маммограф и передвижной мобильный ФАП, в котором есть все необходимое оборудование для диагностики заболеваний и оказания экстренной помощи. Автомобиль может работать в автономном режиме, поскольку он оборудован бензиновым электрогенератором, что позволяет проводить медицинские осмотры вне зависимости от электроснабжения самого населенного пункта. В состав специальных бригад включены офтальмологи, ЛОР-врачи, акушеры-гинекологи, по необходимости педиатры и хирурги.

 

25.02.2021

 

Национальный проект «Производительность труда и поддержка занятости». Региональный проект «Адресная поддержка повышения производительности труда на предприятиях»

В рамках проекта осуществляется адресная поддержка повышения эффективности работы предприятий со стороны Федерального центра компетенций в сфере производительности труда (ФЦК). В Мордовии специалисты ФЦК, начиная с 2019 года, работают на 10 промышленных предприятиях: ООО «Сарансккабель-Оптика», АО «Биохимик», АО «Рузхиммаш», ОАО «Саранский завод «Резинотехника», ООО «Кадошкинский электротехнический завод», АО «Медоборудование», ООО «Эпромет», ПАО «Саранский приборостроительный завод», ОАО «Лато», АО «Лидер-Компаунд».

 

В 2020 году эксперты ФЦК запустили проект еще на 4-х предприятиях региона, среди которых ООО «Мордовагромаш», АО «Мордовцемент», ООО «Хелиос-Ресурс» и ООО «ГАЗПРОМ МЕЖРЕГИОНГАЗ САРАНСК».

 

С 2018 года в Мордовии функционирует Региональный центр компетенций в сфере производительности труда (РЦК) на базе Фонда развития промышленности республики. Под руководством экспертов РЦК работают: АО «Тепличное», АО «Оптиковолоконные системы», ООО «ЭМ-Кабель», МП «САРАНСКГОРВОДОКАНАЛ», МП ГО Саранск «Горэлектротранс», ООО «КЗ «Цветлит», ПАО «Электровыпрямитель», ООО «НПО «НефТехГазМаш».

 

25.02.2021

 

Корхтамась ульсь оцю и эрявикс


 

Республикаса коронавирусса сярядихнень лувкссна кири

Мордовиянь Оцюнять аф лама пингс тевонзон тиендисна Артём Здунов 18
февральста ётафтозе республикаса коронавируснай инфекциять инголдаманц и
келемоманц коряс оперативнай штабть заседаниянц. Ванондовсть уликс
эпидемиологическяй ситуациять, COVID-19 эзда вакцинациять, здравоохранениянь
региональнай системать тевонь мольфтеманц, санитарно-эпидемиологическяй
вешфкснень ванфтомаснон мельге контролень вятемать коряс кизефксне.
Примсеви мератнень инкса республикаса коронавирусса урмаськодыхнень лувкссна
кири. Тяниень пингть ковиднай госпитальхнень эса пчкси 1000-да кржа пациент
(стака пинкнень ульсь 2000 ломань), кири лувкссна и амбулаторнайста
пчксихнень. Пчкафтомань учреждениятне меки мртцихть работань плановай
режимти, латцевихть специализированнай медицинскяй лезксонь максомань
объемтне.
Но райоттнень эзга тефне ащихть лиякс. Коса урмаськодыхнень лувкссна кири, а
коса меколанкт—касы. МР-нь Оцюнять аф лама пингс тевонзон тиендисна шарфтсь
тянь лангс башка мяль и кошардсь ваномс ся райоттнень эса тефнень
мольфтемаснон, коса эпидемиологическяй обстановкась аф цебярьготкшни.
«Ардатовскяй, Ельниковскяй, Большеберезниковскяй, Большеигнатовскяй,
Старошайговскяй, Чамзинскяй, Рузаевскяй, Ковылкинскяй и Кадошкинскяй
райоттне—тиньцонт урмаськодыхнень лувкссна сяда оцю, кда сявомс целайнек
марнек республикать эзга,—кемоста азозе Артём Алексеевич муниципальнай
райононь оцюнятненди.—Эряви максомс анализ ситуацияти, ваномс, кодама мерат
примсевихть».
Нинге  фкя таколфты кизефкссь—сядонга лама урмаськодыхнень лувксса эряфкшу
ломаньда. Ня даннайхнень кемокснесыне Роспотребнадзорсь.
«Тиемок анализ тя недялять урмаськодыхнень лувксснонды, минь няйсаськ, што
коронавирусса сярядихнень лувксса 65 кизоса и сяда сире ломаньда арась сяда
лама—27,7 процент, а ётай недяляня ульсь 23 процент, лиякс азомс, моли
касома,—отмечазе МР-ть эзга главнай санитарнай врачсь Татьяна Харитонова.—
50-60 кизосотнень ёткса урмаськодомась лядсь сяка уровеньца».
«Урмаськодыхнень лувкссна кири, но эряфкшу ломаттнень заразиндавомань
талекасна касы, а Ардатовскяй районца тя показательсь и ёфсикс няфни 40
процент»,—мярьгсь Артём Здунов.
Тянкса оперативнай штабсь кирдезе 65 кизоса и сяда сире ломаттненди
самоизоляциянь режимть сяда тов кувалгофтомань пингонц коряс предложениять.
Нинге фкя важнай темась, кона ванфоль заседанияса,—коронавирусть эзда
вакцинациясь. Мордовияса сон ётай активнайста, региону пачфтьф 33 тёжяньда
лама вакцинань комплект, прививка тифтсь пцтай 26 тёжянь ломанць.
Ладявсь аптекатнень эса лекарстватнень улемаснон мархта тевсь. Кой-кона
позициятнень коряс, кода азфоль, республикань государственнай аптекатнень
эса тиф запас  аф колма ковонди, а нльне кафтошка кизонди.
Но улихть прябалат льготнай лекарстваса обеспечендамать мархта, мезть лангс
шарфтсь башка мяль МР-нь Оцюнять аф лама пингс тевонзон тиендисна, и кемоста
азозе республикань Здравоохранениянь министерствати курокста ладямс тянь
мархта сотф ситуациять и сяда тов кирдемс башка контроль ала.
Оперштабть заседаниянц песта республикань руководительсь мярьгсь: сембе
главнай кизефксне, конат сотфт здравоохранениянь системать работанц мархта
пандемиять пингста, ванфнесазь эсь эрявиксшиснон. Од коронавируснай
инфекцияса сярятькстыхнень лувксснон кирьфтаманкса и сяда тов ситуациять
цебярьгофтоманкса организациянь руководительхненди,      республикань
эряйхненди эряви и сяда тов кемоста ванфтомс эсь прянь араламань мератнень и
санитарнай врачнень вешфксснон.
25.02.2021 №7

 

Национальная тематика

«Девятаев»

«Базелевс» кинокомпаниясь нолдась прокатс художественнай фильма легендарнай
лётчикть, Советскяй Союзонь Геройть М.П.Девятаевонь колга
Мяляфтса, пяк кенярдень, седиезон арась лад, мзярда кизода инголе кулине,
што содаф российскяй режиссёрсь Тимур Бекмамбетов и «Базелевс»
кинокомпаниясь ушедсть съёмкат художественнай фильмати, кона лемдеви Михаил
Девятаевонь подвигонцты. Фильмать ульсть кафта рабочай лемонза: «Девятаев» и
«Побег в небо». Кочказь и кадозь васенце лемть.
Тя кеняртьфти кулять квалма минь гайфтеме Казань ошу, коса эряй
М.П.Девятаевонь цёрац, Александр Михайлович, и максоме кой-мзяра кизефкс
фильмать анокламанц квалма. Лятфтасаськ, А.М.Девятаев съёмочнай площадкаса
ульсь главнай консультантокс. Сон кемокснезе эрь фактть алянц эряфста,
азондсь кодама ломанькс сон ульсь, мезе лятфнесь эсь подвигонц колга ряцок
эряензонды.
—Виденц мярьгомс, минцьке ашеме кема, што кемгафтува ковста тиеви тяшка оцю
работа, художественнай фильмати сёрмадовихть мекольце кадратне и аделави
монтажсь,—азонды Александр Девятаев.—Съёмкатне мольфтевсть Ленинградскяй
областьса, аф ичкозе Кронштадт портть-ошть маласа, Котлин островса. Вастсь
пяк ладясь фильмань сюжетти, ся событиятненди, конат ульсть алязень эряфса:
кода сон аф пелезь шавсь врагть эса, кода прафтозь сонь самолётонц, кода
повсь пленц и кода тоста сон ворьгодсь.
—Съёмочнай вастсь, кода тон, Александр Михайлович, азыть, пяк ладясь, но вдь
фильмань анокламась веши лама оборудования, декорация, арни и лиенди
техника, массовкас сядот ломань. Кода тянь ширде арьсефтольхть кизефксне?
—Сембось ащесь режиссёрть эзда. Тимур Бекмамбетов тевонь содай, оцю опыт
мархта ломань, специалист. Сатомшка лятфтамс сонь тяда ингольдень работанзон
«Ночной дозор», «Ирония судьбы. Продолжение», «Ёлки» и лия фильматнень и
шарьхкодьсак, кода ответственнайста сон тиендьсы эсь тевонц, мзяра
творческяй арьсеф мяль сувафни работати, штоба фильмась удалаль, кельговоль
ваныти. Монць лама няендень войнать колга фильмада, но  алязень колга
сюжеттне васенце минутастокиге пичетьфтихть, сельмоведьфтома ваномс аш кода.
    Осал, вийфтома, китькскянь-китькскянь щамса военнопленнайхне фкя-фкянь
кирдезь жувата лаца панцевихть вастста-вастс, пяксневихть лагернай
помещенияс. Ламонцне эздост сельминголе кулсихть.
—Тонь фильмань аляце, главнай рольть налхкиец актёрсь Павел Прилучный.
Мялезот сонь налхкомац, тяфтамоль аляце?
—Павел, актёрсь од, войнань кизотнень алязтивок тяфта жа ульсь 25 киза.
Тейне-арам, режиссёрсь ашезь эльбяде, сявомок тя рольти Прилучнаень. Сон  и
шамаска ладясь и семботь кадраса тиендьсы вишкста, смелста, маштозь.
Тяфтамоль характероц и алязень, мезьс аф кярьмоди—тисы тевонц педа-пес,
курокста. Аф стак корхнихть—мордватне упрямай ломатть, кодама ба  стакас-
сталмос афольхть пов, фалу мушендыхть вийхть, стакаста лисема вастт. Тя
мяльть пяк лац кемокснесы алязень, кона ворьгодсь врагть пизоста, примероц.
—Аляцень колга, Александр Михайлович, сёрматф лама очерк, повесть, аноклафт
документальнай фильмат, телевизионнай передачат, сёрматфт интервьют. Мезьса
тянь семботь поладозе художественнай фильмась, кодама ёжа марямаса ваномс
сон?
—Кда документальнай фильматнень и  очеркнень эса васенце вастти путневи
геройть биографияц идькс пингста сявомок сирешити пачкодемс, художественнай
фильмать лият вешфксонза, васенце вастса ся подвигсь, конань алязень лаца
мирса нинге кивок ашезе тиенде. А кда мяльс сявомс ся фактть, што салаф
вражескяй самолётса ульсть од оружиянь анокламать коряс секретнай документт,
тя геройксшить, подвигть  нинге сядонга касфтсы питненц, тисы сяда оцюкс.
—Фильмась, Александр Михайлович, анок, кода содаф, сон цветной, вертикальнай
форматса. А мзярда лиси экранц, няфтеви кинотеатратнень эса?
—Художественнай фильматне васенцекс няфневихть кинотеатратнень эса. Тяфта
кармай и алязень колга «Девятаев» картинать мархта, но «Базелевс»
кинокомпаниясь ванонды и стама вариантт, штоба тя фильмать няфтемс и
центральнай телевизионнай каналхнень эса. Содаф,  тяниень пандемиять мархта
сотф обстановкаса аф мярьгондеви кочксемс оцю залхт, сембе сяка ули надияма,
што стака пингсь, равжа шитне, туцятне курок туйхть эздонк, лядыхть фталу и
тя фильмать  ванцазь лама сядот тёжянь ломань.
—Спасиба, Александр Михайлович, азондомацень инкса. Аф кирдемшка учтама
фильмать эса. А тейть арьсетяма кеме шумбраши, паваз и лама кизонь эряф!
—Сюкпря цебярь валонкса!
Н.Лобанов.
25.02.2021 №7

 

«АРЬСЕФ МЕРОПРИЯТИЯНЬКЕ ЛЮБОЙ ФОРМАТСА ПАЧФТЕВИХТЬ ЛОМАТТНЕНДИ!»

Саранск ошень Военнай и трудовой подвигонь Мемориальнай музейть директороц
Н.А.Кручинкин:
—Кода содаф, ётай кизоня, кона, Россиянь Президентть В.В.Путинонь Указонц
коряс,  азфоль-ладяфоль Мялямонь и Славань кизокс, Военнай и трудовой
подвигонь музейсь ётафтсь лама историко-патриотическяй мероприятия. Тяддень
кизось Россиянь Президентть Указса азф-ладяф Александр Невскяень кизокс.
Николай Андреевич, сяс пара улель содамс, кодама од мероприятияса васьфтесть
и кодапт ётафты тядде Мемориальнай музейсь?
—Афкукс, ётай кизоня, аф ваномок прябалатнень лангс, конатнень тейнек
сембонди кандозень пандемиясь, Мемориальнай музейсь очнай или онлайн-
форматса ётафтозень сембе арьсеф мероприятиянзон. Инь няевиксне эздост
ульсть лемтьфт Великай Победать 75 кизонь юбилеенцты. Кепотьксонди,
«Бессмертный полк» акциясь, Сурскяй рубежть строяманцты лемтьф и лия оцю
мероприятиятне, хуш и савсть ётафтомс онлайн-форматса, но эсь патриотическяй
тевснон синь тиезь. Кода няфтезе ваныхнень коряс статистикась, онлайн-
форматса мероприятияньконь ванозь сядот тёжянь ломань.
Кда корхтамс тяддень мероприятияньконь колга, эряви азомс: историко-
патриотическяй мероприятияньконь ёткса васенце вастса тяфта жа кармайхть
ащема Великай Победати, Великай Отечественнай войнать ушедомста 80 кизонь
топодемати, народоньконь подвигонзонды лемтьф акциятне. Тяфта тиеви нинге
сяс, мес Россиянь Президентть Указонц коряс—Великай Победать 75 кизонь
юбилейда меле сяда товолдонь эрь кизось странасонк кармай праздновандавома
юбилейнай кизоть лаца.
Конешна, минь тядде тяфта жа ётафттама патриотическяй мероприятият, конат
лемтьфт А.Невскяень подвигонзонды, политиконь, дипломатонь и военачальниконь
путксонзонды Российскяй государствать ванфтомаса и виияфтомаса. Аф стак вдь
Александр Невскяень портретоц, конань сёрмадозе Россиянь Заслуженнай
художниксь И.В. Сидельников, Мемориальнай музеень «Полководецонь залса»
путф-повфтаф инь няевикс вастса!
Великай Победать лемс, Великай Отечественнай войнать историянцты,
народоньконь подвигонзонды, сонь и лия войнань пингста лемтьфт историческяй
экспонатонь, документонь, фотоснимкань, стрелковай оружиянь экспозициятне и
выставкатне панчфт «Славань», «Толонь фронтовой китне» и «Поколениянь
преемственность» Мемориальнай музеень залса.
Тяда башка, минь онлайн-форматса ётафтоськ «Тя пингс кайги эсон сонь мороц»
лем ала патриотическяй моронь Межрегиональнай фестивальть-конкурсть. Сон
лемтьфоль Великай Отечественнай войнать ушедома шиста 80 кизонь топодеманцты
и Сурскяй оборонительнай рубежть строяманцты.
Сайтсонк минь тяфта жа азонттама «Фкя солдатонь ратнай ки» рубрика ала
Мордовиянь воиттнень колга, конат мрдасть войнаста и лемдезь эсь эряфснон
мирнай трудти.
И башка васта тяддень работасонк ащи «Без срока давности» архивнай
документонь выставкась. Эсонза документтнень вельде, конат тя пингс
кирневсть архивса «Совершенно секретно» гриф ала, азондови фашисттнень
преступленияснон колга, конатнень синь тиезь странасонк.
Кода тя кизоня ётафтови «Бессмертный полк» акциясь—няфтьсы пингсь. Кда
аценди пандемиясь, тя ули пяк пара. Шествиять эста минь ётафтсаськ стане,
кода инголи—ульцяса. Кда ограничениятне аф валхтовихть, «Бессмертный полк»
акциять минь тага ётафтсаськ онлайн-форматса.
Но азса нинге весть: тя кизонь арьсеф сембе мероприятиятне любой форматса
сяка пачфтевихть ломаттненди!
—Николай Андреевич, койсот, мезенди эрявихть тяниень пингонь од
поколениятненди «Без срока давности» рассекреченнай документонь выставкатне?
—Тяфта ни лиссь, но минь лама мезе нинге аф содатама Великай Отечественнай
войнать колга. Тяфта жа нинге кржа содатама фашисттнень зверстваснон квалма,
конатнень синь тиендезь мирнай ломаттненди аккупированнай моданьконь лангса.
Сяс тяфтама выставкатне няфнесазь тяниень пингонь од поколениятненди, кодама
эряфса саволь теест эрямс, кда минь атянь атяньке афольхть сяське Великай
Отечественнай войнаса. И тяфтама выставкатне пяк и пяк эрявикст тячи нинге
сяс, мес НАТО военнай блоксь, коза сувсихть Европань пцтай сембе странатне,
ушедсь лемнема Российскяй Федерациять врагокс.
А омбоце 1941 кизоть нолдамс тейнек аш кода!
—Отечествань Аралаень шись, конань аф кунара минь васьфтеськ, тя контекстса
тяфта жа сувафнесы минь ёнезонк-ваймозонк эсь путксонц.
—Конешна. Кда инголи тя илась ульсь аньцек аляннекс, тячи сон эсь лемонц и
потмонь смузенц коряс арась илакс сембе россияттненди.
Лиякс азомс, тячи минь сембе, алятне, аватне, од ломаттне, Отечествань
аралайхтяма!
В.НЕСТЕРОВ.
25.02.2021 №7

 

Финскяй учёнайть Аксель Гейкелень «Мокшэрзятнень щамсна и орнаментсна» книгац

Мокшэрзянь ломаттнень эсь лацонь культураснонды шарфнесазь эсь              
 мяльснон ламоц этнографне. Мокшэрзятнень этно-
графияснон тонафнемац кемоста сотф финнонь содаф учёнайть, профессорть,
этнографть и археологть Аксель Олави Гейкелень мархта. А.Гейкель финскяй
исследовательхнень эзда  васенцесь, кона  шарфтсь мяль мокшэрзянь народть
эсь лацонь культуранц лангс.
Сон шачсь 1851 кизоня Финляндиянь Брэнде вастоняса шкаень валонь канды
ломанень семьяса. Аделазе Гельсингфорсса университетть, сяда меле кярьмодсь
философияти и 1880 кизоня арась философиянь магистркс, а 1887 кизоня—
докторкс. Тяда башка, тонафнезень археологиять, этнографиять и музеень
тевть. Хельсинки ошса тись панжада менельть ала этнографическяй музей  и оцю
мяльса вятезе сонь. Сёрмадсь этнографиять коряс монографият и атласт, конат
лемтьфт финно-угрань нароттнень национальнай щамснонды-карямснонды,
орнаментснонды, котф лангс сюреса сёрмадомаснонды. Эряфонц пингста А.Гейкель
оцю мяльса  тонафнезе    мокшэрзятнень материальнай и духовнай культураснон.
1883 кизоня учёнайсь кочкась материалхт Петербургса Наукань Академиять
музейса и нолдась корязост книга. Сяльде сон 1884 кизоня ульсь 
экспедицияса. Пяк лама материалонь тонафнемда, музейхнень этнографическяй
коллекцияснон ванондомдост меле, художникнень, фотографнень,  
лингвисттнень, национальнай культураньконь содаензон лезкс-снон вельде
А.Гейкель аноклазе и 1899 кизоня нолдафтозе «Мокшэрзятнень щамсна и
орнаментсна» пяк оцю исследованиянц, конань лаца аш аф кунардонь пингонь, аф
тяниень литератураса. Сонь ули кода лемдемс материальнай культураньконь
коряс иллюстрация мархта афкуксонь энциклопедиякс. Книгаса максф орнаментонь
рисункань 63 таблица, колма таблицаса няфтьфт ся рисункатне, конат сидеста
васьфневихть и лия народонь сюреса сёрматфнень эса. Учёнайсь сась мяльс:
ламоц тяштенятне, символхне, сёрматне, конатнень мархта мазопневсть щапне,
кудъётконь предметтне, шачсть первобытнай пингста, а кой-конат—эста, мзярда
атянь атяньке ушедсть сёронь касфнема.
А.Гейкель васенцесь максозе мокшэрзянь сёрматфса кой-кона тяштенятнень
семантикаснон, няфтезе, кодапт синь и азозень лемснон. Кепотьксонди: эрьгине
(тяштень тиема ожнаня), вишка крёст (ёмла крескат), суркст, локшеня, панчфт,
нумолонь пилет, вете кит, марь сёрма и лият. Учёнайсь сембе ширде няфтезе
мокшэрзянь щамть орнаментонц, сянь, кодама панархт каннихть ся или тона
вастса, сёрмаснон коряс няфтезе кодаптольхть мокшэрзятнень этнокультурнай
соткссна лия нароттнень мархта. Вов кода сёрмады: «Карелияса сюреса сембе
сёрматфне васьфневихть и мокшэрзянь масторса… Прикладной искусстваса тя
формась корхтай, што мзярда-бди синь эрясть марса».
А.Гейкель лятфни  и Мещерань эряйхнень мархта раднякс улеманц колга. Кле,
тянь квалма азондыхть сюреса фкя лацонь сёрматфне.
А.Гейкель «Мокшэрзятнень щамсна и орнаментсна» монографиясонза няфтезе      
   мокшэрзянь народть XIX веконь культуранц, сюреса сёрмадоманц и
орнаментонц. Сонь эсонза 312 страница, максф цветной 250 фотография, 2000-да
лама  иллюстрация, рисункат, конатнень эса няфневи орнаментонь пцтай кафта
тёжятть пялькс. Азондови, кода синь тиемат, максфт щапнень и пряс
путоматнень рисункасна и стак тов. Шарьхкодеви, учёнайсь лац тонафнезе
мокшэрзятнень материальнай культураснон, пцтай педа-пес шарьхкодезень синь
мяльснон-арьсемаснон и творческяй смузьснон.
Национальнай библиотекать фондсонза васьфневихть мялень салай  и питни
книгат.
1996 кизоня Финляндиянь народонь ведомствась  казезе МР-нь А.С.Пушкинонь
лемса Национальнай библиотекати «Одежда и орнамент мордвы» книгать. Ся
кизоста сявомок тя книгась ванфтови библиотекать шуроста васьфневи
отделсонза, кона максси оцю лезкс тяниень пингонь лувихненди мокшэрзянь
народть прикладной искусстванц тонафнемаса.
Тянемс учёнайть работац лувондови питникс сяс, мес сон маштозь няфтезень
ингольдень пингонь мокшэрзянь культурать историянц, ломаттнень крхка 
мяльснон-арьсемаснон,  маштсь семботь  лац-ряц пуроптомс марс, латцемс эсь
вастоваст. Эсь питни сатфксонзон  мархта А.Гейкель шарфтозень мокшэрзянь
культурать лангс Россиянь и омба масторонь учёнайхнень мяльснон.
 В.Пронина,
А.С.Пушкинонь лемса Национальнай библиотекань  главнай  библиотекарсь.
25.02.2021 №7

 

Мокшане о мокшанах

Ёмла родинась вайме эжни фалу

Велеса шачф-касф эрь ломанць, арьсян,  оцю кельгомаса  фалу  лятфни ёмла
родинанц колга, кона лихтезе сонь эряфонь кити, конанди сон фалу лажаткшни
и, кда ули ётка пингоц, эряскоды вели—раднянзонды или ялганзонды инжикс,
престольнай праздникс, а кой-коста и ёфси туфталфтома, сяс мес шачема ширесь
уски фалу.
Рузаевскяй районца ули Мокшень Пишля веле. Ащи сон Пишля ляйть лангса.
«Пишля» валсь мзярда-бди эвондась пяше и ляй кафта валхнень эзда. Эста ляйть
трваванза кассь лама пяшеда.
Кда варжакстомс историяти, содави, Пензенскяй губерниянь населённай пунктонь
спискатнень эса 1869 кизоня Мокшень Пишлясь казённай велель, эсонза
лувондовсь 170 малава куд. Архивнай документтнень эса Мокшень Пишлясь
лятфневи 1640 кизоня ни. Тястонь ломаттне касфнесть жуватат, витцесть сёра,
заняфтольхть торгавамань-мишендемань и ремесленнай тефнень мархта.
Мокшень тя велесь кармась сяда виияма и касома эсонза поташнай заводть
строямдонза меле. Заводса оцюфтольхть пянакуттне. Эсост плхневсть шужярь,
пенгат и палы лия ляткст. Тяфта получсевсь кальциень поташ. Меле эздонза
тиендевсь сапонь, сон нолявсь тевс клянцеконь нолямаса. Ламоц велеряйхне
работасть поташнай заводса и получсесть заработнай плата.
Мокшень Пишляса пцтай сембе куттне шуфтоннетольхть, вельхтяфтольхть
шужярьса. Крепостной крестьятт и помещикт ашельхть мзярдовок. Ульсть козя
оцю семьят, кой-конатнень эса эрясь 20-30 ломань и сембе—оцюнек-ёмланек
покодсть варьхмодемста сявомок шоподемс. Кой-коста козятне сивотькшнесть и
работникт.
Улема, эрь велеса, тяконь лувксса, и Мокшень Пишляса, оцю сембе тефне
ванондовсть марса. Ломаттне пуромкшнесть, мзярда эряви, и примсесть решеният
эрявикс кизефкснень коряс. Кой-коста марстонь тяфтама схоттнень эса тиендсть
эсь лацонь суд салайхнень, кальдяв ломаттнень лангса. Но целайнек велеса
эряфсь сетьмоль.
Коллективизациянь пингть велень колхозсь кармась каннема «Рузаевкань
Республикать» Президентонц А.П.Байкузовонь лемонц. Меле сон арась           
   совхозкс.
Мзярда аеркс врагсь апак учсек врьгятсь странаньконь лангс и  ушедсь Великай
Отечественнай войнась, Родинаньконь аралама Мокшень Пишляста тусь кота
сядода лама ломань, а Сяськомань шида меле ашесть мрда пялесновок. Тюремань
паксятнень лангса шавфнень лемсна тяштьфт памятникти, кона ащи Мокшень
Пишляса.
Мекольдень кизотнень массовай информациянь средстватне аф весть пачфнесть
Мокшень Пишляса тястонь церькавть, конань лемоц храм Рождества Пресвятой
Богородицы, одукс панжеманц колга. Кой-кит тянь лемдезь афкуксонь чудакс.
Ужяль, но тяни Мокшень Пишляса аш школа, иттне тонафнема усксевихть Пайгарма
шабрань вели.
Тя велень эрь эряйсь содасы и маряй гордость Мокшень Пишляса учителень
семьяса шачфть-касфть, мокшэрзянь содаф писательть, журналистть Юрий
Фёдорович Кузнецовонь инкса. Лувсайть произведениянзон и сельминголет
эвондайхть ёмла родиназень ульцянза—Кячказ курнясь, Оцю велесь… Содасайть ся
ломаттнень, конатнень колга мялень салайста пачфни классиксь. Юрий Фёдорович
ванфтозень синь лемснон, прозвищаснон: Жобон, Бдой атя, Аблай и ламотне
лиятне. Ю.Ф.Кузнецовонь  ламоц произведениянза улихть Мокшень Пишля велень
библиотекаса и лувихне сидеста сявондьсазь синь куду лувомс.
Мокшень Пишляса ули  клуб, конань видеса лама кизода инголе пуроптфоль
«Лихтибряня» фольклорнай коллективсь и вов ни кафта кизот работай «Мастера и
рукодельницы» творческяй мастерскойсь, коса эрти ули кода варжамс виензон
кодамаса, стамаса, лия кядьтевса. Ужяль, коронавирусть сюнеда ламоц
платтнень савсь полафтомс, арьсеф  пуромкснень ётафтомс онлайн-форматса или
кадомс лия пингонди.  Машты кядь аватне и стирьхне сяда лама работайхть
кудса, но ванат фотографиятнень вельде няфтьф работаснон лангс и седице
кеняртькшни. Ваттака, конашкава асу ломатть эряйхть Мокшень Пишляса! Мяль
салси и клубть видеса уликс музейсь.
Мелянь сёксеть мокшень тя велеса строяфоль кинь од участка—сембоц 235 метра.
Кись поладозень Молодёжнай и Байкузовонь ульцятнень. Тяда башка, асфальтса
ацафоль седсь ся кить лангса, кона вяти велень церькавти.
Кода удалась содамс, ёфси курок Мокшень Пишляса панжеви модульнай ФАП, кона
пцтай анок ни.
Сембе тефнень мельге ваны Мокшень Пишля велень поселениянь оцюнясь,
мокшавась Н.Я.Панюшкина, кона лама кизода инголе сась тяза Зубово-Полянскяй
райононь Мордовская Поляна велеста и арась эсь ломанькс.
Вов тяфта и эряй ёмла родиназе—Рузаевскяй райононь Мокшень Пишля велесь.
Конешна, фкя материалса сембось пяк келиста аф азови, аф фатяви. Вдь эрь
велеть козя историяц, ули мезе азондомс и тячиень шинц колга. Сяс
журналистонь блокнотсон Мокшень Пишлять колга тяштьф аф кржа. Тя и арай
ушетксокс лия материалненди.
Т.Альшина.
25.02.2021 №7

 

В.В.Родькина: «Содафнесть шабантень минценнеть мархта ёмластокиге»

Старошайговскяй райононь Сире Теризморга велесь содаф аф аньцек Мордовияса,
но и марнек странаса и омба масторсовок. Тя аймаксь национальнай культурань,
мокшень козя коень-обуцянь ванфтома уженя, а седи куцюняц—Национальнай
культурань центрась, кона панчфоль велеса 1992 кизоня. Видесонза пуроптф
этнографическяй музей, коза сувамста бта повондат атяньконь-бабаньконь
сядынгольдень эряфозост. Ваймонь эжди, сельмонь кеняртьфти тяфтама вастса
покоди минь тячиень героиняньке, мокшавась Валентина Васильевна Родькина.
Валентина Васильевна афкуксонь мокшень патриотка, теенза нинге шабакс
пингста пяк кельгови сембе минценнесь. Корхнят-тият мокшавать мархта и лад
арси седиезт, стама аруста сон корхтай родной кяльса, рузонь фкявок валня аф
кулят эздонза. А кодама лямбоста азонкшни Национальнай культурань музейть
колга, тяса сембе уликссь теенза ащи питнидонга питни козяши лаца.
В.В.Родькинась сафтсы эрь кодама тевса. Сон и стай-кодай, и сюреса сёрмады,
и бисерста аньцек мезе аф кярьксай, а нинге машты танцтиста пидема-
стряпшама. Сембода тяда башка казезе Шкабавазь мокшавать мазы вайгяльса.
Морось, кле, мархтон шабакс пингстокиге. Школаса Валентина Васильевна
морсекшнесь сембе пуромкснень-илатнень эса, сувсесь     велень      
самодеятельнай   артисттнень лувксс, конат сидеста выступандакшнесть шабрань
велетнень эсовок. Вов ни мзяра киза В.В.Родькинась морси Сире Теризморгань
народнай хорса. Вайгялец мокшавать пяк вии, кайги, вярьгак «усксы» любой
мороть. Но эстеенза сембода пяк кельговихть мокшень моротне, сяс мес крхка
смузьсна и пяк ламонь колга арьсефтихть.
Тячиень героиняньке цебярь кудазорава. Кудботмоц Валентина Васильевнань най
ару, валда. А куд пирьфоц пяшксе жуватада. Мирденц, Василий Алексеевичень,
мархта кирдихть тракс, вазнят, тувот, сараст. Тя, кле, нинге мезе,  одста
кали тняронь кирнекшнеме, аньцек тракстонк колмоль, а тяни ни сиредеме,
виеньке аф сят. Пара, мес Родькиттнень улихть лездысна—идьсна и уноксна.
Стирьсна семьянек эряй мархтост. А цёрасна хуш туф Саранскяи, тядянзон-
алянзон шири сашенды пяк сидеста и сембоса лезни. «Афи фатяме, кода кассть
шабаньке,—мярьгсь Валентина Васильевна.—Бта ёфси аф кунара  нюрямняса
нюряфнеськ, а тяни ни синцень идьсна ласькондихть».
—Валентина Васильевна, шачемас-касомас коре тон тястоконнят, Сире
Теризморганнят или сафат костовок?
—Мон, кода корхнихть, Сире Теризморгань коренной эряян. Тястоннет тядязе-
алязе, тяса шачень белай свету монга. Тядязе, Елена Григорьевна, и алязе,
Василий Филиппович, велень простой ломаттельхть, эряфоньберьф работасть
колхозса. Алязе цебярь плотниколь, кудоньконьге сонць шапозе.
—Строямань-тиемань тевсь, кулине, тейтьке содаф…
—Афкукс тяфта. Велень школать аделамда меле тонафнень Ковылкинскяй
строительнай техникумса, а сяльде работань Шайгавса стройкаса мастеркс. Тя
работась аф аньцек ламоти тонафтомань, но и содафтомань сай пингонь
мирдезень мархта. Колмогемоньда лама киза ни эрятама марняса.
—Кода тячи эряй-ащи Сире Теризморга велесь?
—Васендакиге азолине, што сембе минь, велеряйхне, пяк кельгсаськ эсь
шачема-касома уженяньконь и марятама инксонза оцю гордость. Эряфоньке,
мярьголень, аф кальдяв. Веденьке нолдаф куду, эряма вастоньке лямбот, киньке
такорхт. Мезе эряви, сембоньке ули—работайхть школась, медпунктсь, почтась,
лавкатне. Мезсь нинге касфни мяль, мекольдень пингть коль сяда лама од
ломань лядонды вели. Стройсихть эстеест кутт, пуропнихть семьят, шачендыхть
шабанясна.  Тя максси надияма, што Сире Теризморгать ули сай пингоц.
Ломаненьке сембе трудонь кельгихть, киньге аф няйсак стак ащекшнемда.
Работада башка эрть ули хозяйствац, сембе пяк кельгсаськ модать мархта
возсеманьконь.
—Лама киза ни тон покодят Национальнай культурань музейса, кона содаф лама
вастова. Коста сашендыхть ширезонт инжихть и мезсь сембода пяк тушенды
мялезост тяса?
—Туристта миньцонк уленди пяк лама. Ширесонк ульсть ломатть, улема, странань
сембе региоттнень эзда, а стане и омба масторста—ЮАР-ста, Португалияста,
Францияста, Италияста, Финляндияста и лама лия вастста. Этнографическяй     
  музейти эрь сувайть     сельмованфоц эстокиге      прашенды     
мокшэрзянь щапнень лангс. Тяса няфтьфт эрь кодама райононь национальнай
костюпне—сембоц кевейхксые щам.   Туристтне дивандакшнезь ванондсазь эрь
сёрматкскять, абонкшнихть, мзяра вийда, маштомошида эрявксни  эрь сюрекинять
 тиеманкса. Тияк шнашендсамазь, мес ванфнесаськ тя мазышить.
—Сире Теризморгаса мокшень щапнень ули кода няемс аф аньцек музеень
экспозициятнень ёткста, но и мокшаватнень лангста. Тонценьге, Валентина
Васильевна, няк, кодама мазы нарядце.
—Виде, минь велесонк аватне оцю мяльса наряжакшнихть мокшекс. Ламотне
стакшнесазь-сёрматкшнесазь щамснон эсь кядьсост. Мон, кепотьксонди, васенце
панарозень стайне-мазоптыне нинге стирнякс, школаса тонафнемстон. Эста
ушедонь и ёмла ожнаняста кодама. Мокшень костюмть аш кода арьсемс
мазоптомбяльфтома. Кунардонь пингста сявомок бабаньке-щаваньке мазопнелезь
щамснон цифксса, эрь кодама крганяса. Минь старандатама аф юкснемс тянь
семботь колга, а главнайсь—азонкшнесаськ-няфнесаськ шабатненди. Национальнай
культурань центрать видеса пуроптф «Бабазень арзяняц» лем ала кружок, коса
иттненди тонафневи национальнай вышивкась, стамань-кодамань тевсь. Койсон,
аш кода ванфтомс народоньконь историянц, культуранц, кда ёмластокиге аф
азонкшнемс тянь колга эсь шабаньконди. Мастер-класста башка иттне (а стане и
ширезонк сашенды туристтневок) содафневихть мокшэрзянь обрядовай илатнень,
сире пингонь койхнень-обуцятнень мархта.
—Мокшетнень нинге пяк танцтихть национальнай ярхцамбяльсна, конат, кода
содаф, кельговихть лия ширде саф ломаттненди. Мезьса каванякшнесасть омба
масторонь инжиентень?
—Пяк кельгови теест мокшень пянакудса пидефсь. Пянакудса пидема-стряпшама
нинге од стирькс тонафтомань щавазе, Акулина Семёновна, и тя кондястсь тейне
аф аньцек эряфса, но и работаса. Центрать видеса «Козя алянь куд пирьфса»
ули пянакудоньке, тоса и пицесаськ семботь: лямть, суронь ямть, алхнень,
капстать, модамарень пярякатнень и лиятнень. Но инь кельговсь инжиеньконди—
шапама капстань лямсь. Фкявок путерькскя аф кадондови шаванясост, а кой-кит
анцихть добавкавок. Тя ярхцамбялень рецептть мон пара мяльса азондса
«Мокшень правда» газетать лувиензондывок. Кинь ули пянакудоц, варжасть
пидемс, арьсян, мялезонт туй.
Шапама капстань лямть анокламанкса эрявксты:
8 литрань цюгуння; тувонь сиволь пакарь мархта—1 килограмма; шапама капстат
—1 килограмма; модамарьхть—1,5 килограмма; фкя свежай помидора; фкя
шурьхкяпря.
Пакарьхнень марамс цюгунняти. Модамарьхнень ваткамс и апак керсек путомс
сивольть лангс. Сяльде каямс фкя ведьса штаф капстатнень, меле—керсеф
помидорать и шурьхкяпрять. Салыяфтомс, пяшкодемс цюгуннять ведьта. Пянакуду
сон путома эста, мзярда тоса лядыхть аньцек сетть. Кирдемс 4-5 част. Меле
таргамс, тапамс шуфтонь тапамаса сивольть и модамарьхнень. Лямсь анок.
—Сюкпря, Валентина Васильевна!
О.ЕВДОКИМОВА.
25.02.2021 №7

 

 
 
 

 
НОВОСТИ
 

КИЗОНЬ КОФНЕНЬ ИТТНЕНЬ ВАЙМАМАСНОН И ШУМБРАШИСНОН ПЕТЕМАСНОН ЛАНГС ШАРФТОМА БАШКА МЯЛЬ

7 апрельста МР-нь Оцюнять аф лама пингс тевонзон тиендиснон Артём Здуновонь видеса совещанияса ванондовсть кизонь кофнень иттнень ваймамаснонды лемтьф кизефксне. Региононь руководительсь ётафтф работать мзярс лувондсы аф педа-пес лац-ряц тифокс. Тя важнай направлениясь веши сяда цебярьста аноклама, инь пяк сянь эса, мезсь токсесы досугонь ладямать и иттнень ваймама пингть аралафшиснон обеспечендамаснон.

 

 

 
Кода азозе МР-нь Правительствать Председателенц заместителенц тевонзон тиендисна Галина Лотванова, тядде планц коре кармай работама 337 лагерь, эздост 22-сь стационарнай (санаториятнень базаса), и шитемба улемань 315 лагерь образовательнай организациятнень и социальнай учреждениятнень базаса. Тяконь мархта Галина Лотванова отмечазе, што инголи работай 23 лагерсь тяни республикаса сёлкфт ташта, калада инфраструктураснон инкса, хуш синь ащихть Мордовиять инь мазы вастонзон эса.

 

15.04.2021  № 14
 

МОРДОВИЯНЬ УЧЁНАЙХНЕ ТИСТЬ НАУЧНАЙ ПОДВИГ!

15.04.2021  № 14
 
 
 

ЛОМАТТНЕНЬ ЭРЯФСНОН ЦЕБЯРЬГОФТОМАНКСА

31 мартста Мордовиянь Оцюнять аф лама пингс тевонзон тиендисна Артём Здунов ВКС-нь режимса примась участия МР-нь Промышленностень, наукань и од технологиянь министерствать расширеннай коллегиясонза. Совещанияса примасть участия Россиянь Промышленностень и торговлянь министерствать региональнай промышленнай политикань и проектнай управлениянь Департаментонц директороц Виталий Хоценко, региональнай отраслевой министерствань представительхне, республикань инь оцю производствань вятихне тисть итокт кизоньберьфонь работаснонды.

 

Артём Здунов шарфтсь мяль, што регионца трудса заняфнень нилецекс пялькссна покодихть промышленностьса, тя республикань экономикать флагманонзон эзда фкясь. Мордовиянь Оцюнять аф лама пингс тевонзон тиендисна азозень тематнень, конатнень коряс эряви мольфтемс корхтама коллегиять пингста. Васендакиге тя собственностень и предприятиятнень вятемаснон коряс кизефксне. Эряви содамс, кие ащи выгодань получайкс, кие отвечай трудовой коллектифнень инкса. Прябалакс арси собственностень праватнень кядьста кядьс ламоксть ётнемасна, мезсь шоряй предприятиятненди лац-ряц вииякшнемс.

 

08.04.2021  № 13
 

ЗАСЕДАНИЯСЬ ЛЕМТЬФОЛЬ КОРРУПЦИЯТЬ КАРШЕС ТЕВОНЬ МОЛЬФТЕМАТИ

МР-нь Оцюнять аф лама пингс тевонзон тиендисна Артём Здунов 30 мартста ётафтозе Мордовия Республикаса коррупциять каршес тевонь вятемать коряс Комиссиять заседаниянц. Заседанияса ванондозь 2020 кизоня коррупционнай преступлениятнень мархта сотф ситуациять. МР-ть эзга МВД-ть информациянц коряс, ётай кизоня сембе провоохранительнай оргаттне мусть коррупциять мархта сотф 205 преступления, инь оцю талекасна тиф государственнай властень сфераса и сотф разнай уровенень должностной лицатнень оцю вастса улемста закононь колсемать мархта. Приоритетнай направлениятнень эзда фкясь—национальнай       проекттнень эряфс ётафтомста правонарушениятнень инголдамасна, 2020 кизонь работань итокнень коряс, внутренняй тевонь оргаттнень мархта лихтьф 14 тяфтама преступления, корязост карьхцне лувондовсть 1 миллион цалковайть малава, синь мрдафтфт меки. МР-нь Оцюнять аф лама пингс тевонзон тиендисна азозе, што карьхцнень мрдафтомаснон коряс работась пяк важнай—средстватне улест мрдафтфт экономикати и нолдафт республикать виияфтоманцты.

 

08.04.2021  № 13
 

АРТЁМ ЗДУНОВ АЗСЬ СТРАНАНЬ ПРЕЗИДЕНТТИ РЕГИОТТНЕНЬ ФИНАНСОВАЙ СИСТЕМАСНОН ШУМБРАЛГОФТОМАСНОН КОРЯС ПРЕДЛОЖЕНИЯТ

Россиянь Президентсь Владимир Путин мярьгсь кафта недяляньберьф арьсемс тядде региоттнень дополнительнай финансовай ширень кирдемаснон коряс параметрат, штоба сявомс мяльс тя кизефксть Федеральнай Собранияти сай пингонь посланиясонза. Тянь колга азфоль Правительствань члеттнень мархта совещанияса, кона ётафтовсь 31 мартста.

 

«Федерациянь субъекттнень  финансовай положенияснон минь сембе пингть кирдьсаськ контроль ала,—мярьгсь Владимир Путин.—Мекольдень пингть эряфс ётафтовсь лама мера, штоба кирдемс региоттнень ширеснон и максомс теест эрявикс лезкс—васендакиге, конешна, сявоньдсайне мяльс решениятнень, конат примафтольхть пандемиять пингста». Странань Президентсь лятфтазе, што меля нолдафоль 280 миллиард цалковай прямой дотация и нинге 223 миллиард цалковай специальнай бюджетнай кредитт. «Российскяй экономикать пильге лангс стяфтоманцты тенденциятне нинге аньцек кемокснихть, минь тянь лац содасаськ. Аф сембе субъекттнень эса минь няйсаськ деловой активнайшить касоманц, сяс региоттнень доходнай базасна ламода аф стабильнай. Тянкса мялезе кулемс коллеганень, губернаторхнень эзда регионцнон финансовай состоянияснонды анализ, а стане жа предложеният сянь колга, кодама од решеният эрявихть, штоба аф аньцек обеспечендамс региональнай финанснень стабильнайшиснон, но и касфтомс экономическяй вииямать, вов мезсь ащи тейнек целькс—тиемс РФ-нь эрь субъектть кемоста виияфтоманкса основа».

 

08.04.2021  № 13
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин